الدعوة عامة : شغل دماغك – 3 فبراير

مصر المصريين بشبابها, إحنا ضربنا كل المقاييس العالمية كشباب وشعب مناضل على مر العصور… وأثبتنا قوتنا وسيادتنا في ثورتنا الصحيحة من أجل تصحيح اوضاعنا, من أجل تحقيق مطالبنا المشروعة بأي حكم في التاريخ… واللي كانت تتلخص في نقط رئيسية وواضحة ” طبقاً لما كنا نتناقش وأعلناه في المايكروفون في قلب ميدان التحرير يوم 25 يناير 2011 في حدود الساعة 7 مساءاً تقريباً ” :

 

1- اسقاط النظام الفاسد والتخلص منه.

2- اسقاط مجلس الشعب المزور.

3- إلغاء قانون الطوارىء.

4- تشكيل حكومة شعبية طبقاً لإنتخابات شرعية ونزيهة.

 

تعالوا نفكر سوا واحدة واحدة في اللي قدرنا نوصله من أهدافنا الرئيسية ونناقشهم نقطة نقطة بشكل من الهدوء…

 

” إسقاط النظام الفاسد والتخلص منه “

 

– انت قدرت يوم الجمعة بالليل من خلال بيان الرئيس مبارك انك تحل الحكومة… مما يعني إنك تخلصت من واحد كان من رؤوس الفساد في بلدك من سنة 2004 تقريباً لحد 2011 وهو أحمد نظيف.. واللي كنت في وسط المظاهرات لما بتفصل الأسماء واحد واحد.

– تخلصت تاني يوم من أحمد عز اللي خرب البلد بإنتخابات مجلس الشعب المزورة واللي كان متحكم في سعر الحديد وبالتالي سعر البناء والشقق وسبب رئيسي في غلو الاسعار في كل المجالات وبخاصة الشقق السكنية… وآدي تاني واحد من اللي كنت بتنادي بإسقاطهم.

– تخلصت في تالت يوم مع تشكيل الحكومة الجديدة من رؤوس فساد من اللى عمرك ما تخيلت تخلص منه وهو حبيب العادلي اللي كان مدي للداخلية والشرطة حق التعذيب والضرب والبهدلة في ولاد مصر ومضيع كرامة المواطن المصري تماماً.

– تخلصت من أحمد زكي بدر اللي كان ناس كتير بتقول عليه خارب الدنيا على مستوى الطلبة والمدارس والمدرسين والعاملين في التربية والتعليم.

– تخلصت من صفوت الشريف اللي كان وزير مجلسي الشعب والشورى باستفزازه للشعب ليل نهار.

– تخلصت من يوسف بطرس غالي اللي كان وزير المالية اللي طلع عنينا ضرايب أشكال وانواع ومبهدل مرتبات الناس واقتصاد البلد.

– ظهر عندك ناس جديدة لا غبار عليها فى مناصب انت ما كنتش تتخيلها زي عمر سليمان رئيس المخابرات السابق ومن أقوى رجال مصر في التفاوض كنائب للرئيس.

– ظهر عندك أحمد شفيق كرئيس للوزراء وهو شخصية قوية ومحترمة وحازمة جداً وكان مخلى الطيران المدني لما كان وزيره من أقوى المؤسسات المصرية.

– ظهر عندك سمير محمد رضوان كوزير للمالية وهو راجل صاحب دراسات قوية في رفع الانتاجية وفتح اسواق العمل وبيستعان بيه في دول كتير عشان يحط خطط للقضاء على البطالة ورفع مستوى المعيشة.

– عملك وزارة جديدة مختصة بشئون الآثار.

– فصل مجلس الشعب عن الشورى.

يعني من الآخر ما فاضلش من النقطة دي من اللي كنت عاوزه يحصل فيها غير حسني ومبارك كرئيس جمهورية, وجمال مبارك كأمين السياسات في الحزب الوطني والحزب الوطني كحزب حاكم!!

 

 

” اسقاط مجلس الشعب المزور”

 

– قبول الطعون في المجلس الحالي وبدء النظر فيها من خلال المحكمة المختصة.

– الطعون لما هتعدي نص المجلس وتثبت حقيقتها ” وطبعا ً لا في واسطة ولا محسوبية ولا رشوة خلاص الزمن ده راح ” هيتحل المجلس او هيتعاد الانتخابات بتاعة تلات اربعه.

– اتشالك مسئول التنظيم اللي كان مسئول اصلاً بشكل مباشر عن تزوير المجلس السابق.

 

” إلغاء قانون الطوارىء”

 

– انت كسرت شوكة الشرطة, وهديت خيال المآتة اللى كانوا بيخوفوك بيه.

– بعد يوم جمعة الغضب مافيش لواء يقدر يقولك ” يالا ” ولا ” ياروح امك” ولا تتاخد اشتباه وتلبس قضية ولا حد يضربك على قفاك.

– بدأ يرجع الشعار القديم بتاع ” الشرطة في خدمة الشعب ” بدلاً من ” الشرطة والشعب في خدمة الوطن ” يعني حذف الكناية القديمة اللي كانت بتقول اننا كلنا كلاب للنظام وان الشرطة من حقها تعمل اللى هى عاوزاه في الشعب بحجة الوطن او مصالح الفاسدين المتحكمين فيه.

– ما يقدرش يلغى القانون نهائياً في ظل الظروف دي وانت مش مديله فرصة… البلد فعلاً في حالة طوارىء عارمة حالياً.. ده إحنا لو في فرنسا بلد الحرية والقانون كانوا عملوا قانون طوارىء لو بيمروا بظروف زي اللى احنا فيها.

– خلي كل الهم اللي احنا فيه ده يخلص عشان يعرف يلغى قانون الطوارىء.

 

” تشكيل حكومة شعبية طبقاً لإنتخابات شرعية ونزيهة”

 

– انت قضيت تماماً على ملف التوريث وتفاصيل أجندته وأعلنت انه مستحيل نتورث.

– الراجل قال ع الهوا انه مش هيترشح لولاية جديدة, مش هينفع يطلع عيل ويقول انه هيرجع يترشح لأي سبب حتى لو قالك أبو الهول عاوزنى ابقى رئيس مصر.

– فتحلك باب تعديل مواد الدستور المتعلقة بترشيح رئيس الجمهورية يعني هيعدل الشروط اللي ما كانتش تسمح لحد ينجح غير جمال مبارك.

– مبارك فاضله في ولايته حوالى 10 شهور بحد أقصى يا دوب يلحق فيهم يبني أقسام الشرطة من تاني ومؤسسات الدولة اللى ولعت ويرجع للبلد اليوم العادي والأمان للمواطنين.

– المترشحين لرئاسة الجمهورية بيبدأوا حملاتهم الانتخابية وترشحهم من قبلها بتلات شهور على الاقل, يعنى كمان 5 أو 6 شهور ع الاكثر هتكون بدأت تشوف مين رئيسك اللى هتختاره بحريتك واللى هيبقى عارف انه جاي على شعب مش هيقبل الاسود ولا الرمادي… ابيض وبس.

– ماحدش هيعرف يسرق ولا يعمل حاجة بالسلطة في خلال 6 شهور في ظل كل التوترات اللى احنا عملناها دي.

– حسني مبارك لازم يسلم كل القضايا المفتوحة خارجياً وداخلياً لحد تاني مكانه… ده رئيس بقاله 30 سنة يعنى فى ملفات ما حدش يسمع عنها ولا يعرفها غيره, لو راح فجأة القضايا دي كلها هتروح معاه من غير ما تعرف بلدك وصلت لفين فيها.

– حسني مبارك هيحاول يعمل أقصى ما عنده من جهد عشان يعمل لقطة حلوة يعوض بيها شتايمه لمدة 30 سنة وبالاخص العلنية على الفضائيات فى الفترة اللى فاضلاله.- عندك نائب رئيس زكي وقوي ويقدر يشيل البلد لو حصل أي حاجة لا قدر الله… وزمانه دلوقتى بيشرب من حسني كل الاسرار والملفات المفتوحة واحدة واحدة عشان لو حسنى تنحى فى اى وقت يبقى ده اللى يشيل الحكومة الانتقالية لحد ما تنتخب رئيسك بحرية..

 

 

دي كانت مطالبنا.. وده الشكل اللي استجابوا بيه… اللي وصلناله بقالنا 30 سنة ما كناش نحلم بيه وحققناه في 3 أيام.. دلوقتى المواطن بقة ليه صوت والتغيير بيحصل من تحت, من اللشعب مش من فوق لفوق… هو ده كله ما يستاهلش نوقف الإنهيار اللي بلدنا رايحاله وشحن المتعصبين؟

 

 

 

طيب وبعدين؟

 

– الدول لما بتحارب وبتكسب الحرب بتكون مش كسبانة 100% , يعني مثلاً إحنا لما كسبنا أكتوبر ما كناش خدنا سيناء كلها… لكن قدرنا نثبت اننا قادرين على أخدها كلها بالقوة… لكن الذكاء السياسي بيقول إنك توقف نزيف الإقتصاد والسياسة والشعب بتاعك من جراء الحرب وتبدأ تفكر في طاولة المفاوضات وتاخد من خلالها كل اللي انت عاوزه خطوة بخطوة وواحدة بواحدة… بدل ما تبقى غبي وتخسر كل مواردك في الحرب دي وفي الآخر تلاقى نفسك دمرت بلدك ودمرت العدو وماحدش وصل لحاجة في الآخر!

 

– اللي وصلناله ضيف عليه حاجات أهم من المطالب الرئيسية.. زي كشفك للكثير من الرموز الواهية اللي طول عمرك كنت فاكرهم كويسين وطلعوا ولا حاجة, زي عودة الروح الوطنية لكل الناس, زي عودة التكاتف الشعبي, زي مسحك للفتنة الطائفية وكتمك لأي حد يقول في انقسام طائفي في مصر, زي عودة الأمل للشباب في إنهم قادرين على التغيير وان ليهم صوت مسموع مش مجرد عيال سيس بتوع نت وكمبيوتر, زي إحساسك بكرامتك وحريتك وقدرتك إنك تعمل وطن, زي إحساسك بمعني إنك مصري وأثبت للعالم كله يعني إيه إنك مصري ممكن تتحمل أي حاجة وأي ظلم لكن دايماً للصبر حدود على رأي كوكب الشرق.

 

– الناس اللي بتندس بيننا عشان مصالح شخصية, القوى السياسية اللى بتشحن فينا, الدول الأجنبية المتربصة بينا ومستنية تشوفنا بننهار بس أو حتى مغمضين عيننا عنهم ولو لحظة… كل دول لازم نكشفهم ونبينهم ونجيبهم نعلقهم من ديولهم ونقولهم اطلعوا من وسطنا إحنا في رباط إلى يوم القيامة زي ما رسولنا قال… وصدق الرسول.

 

– كفاية إننا ندور على رمز ونقول عليه يبقى ريس… أحمد زويل عالم ذرة ماله ومال الرئاسة… البرادعي اللي ما يعرفش شكل ميدان التحرير اللي اتمرمطنا فيه… حمدين صباحي اللي صباح الفل… ولا أيمن نور اللي سابنا في نص المظاهرات 25 يناير وراح يتغدى وينام ساعتين ورجع! كلهم مالهمش لزمة ولا يعبروا عننا في شيء ولا ينفعوا قادة سياسيين… لو كانوا فعلاً بيحبوا مصر كانوا خافوا على مصر وماقعدش كل واحد فيهم يحاول يركب الموجة ويسوق الشباب لمصير الله أعلم بيه… لو كانوا فعلاً ناس ليهم إحترام لنفسهم ولمعنى كلمة وطن كانوا عملوا زي العظيم عمرو موسى الذي لا غبار عليه اللي ما اتكلمش غير كلمات محدودة بعبارات مباشرة: ” أرجو من الجميع وضع مصر نصب الأعين ” إحنا مش محتاجيين حد يجي جري ينقذ المركب… إحنا عاوزين نشوف برنامج انتخابي مفصل وحملة انتخابية تنافسية بين مرشحي رئاسة الجمهورية في إنتخابات شهر نوفمبر القادم… إحنا مش بنجيب مدير فني محبوب وخلاص عشان نسكت الجمهور.

 

– ندي فرصة للحكومة الجديدة تشتغل وتورينا شطارتها أو تثبت فشلها وتروح لمزبلة التاريخ مع اللي راحوا… المرة دي عندك كوادر تستحق فعلاً تاخد فرصتها وساعدت في مؤسسات ودول عالمية انها تنهض بيها وتحطلها خطط تقوم بالدول دي من الضياع إلى الرقي… ناس بتاعة شغل بجد مش بتاعة بناء جامعات خاصة ولا قصور في أكتوبر ولا مصانع حديد وصلب ولا بتاعة واسطة ومحسوبية وتزوير وكل القرف اللي عانيناه من يوم ما اتولدنا.

 

– نسكت كل الشعارات الكدابة ونكتم كل الناس ونعرفهم إن الشباب اللي بدأ كل ده هو نفسه اللى يقدر يخرج بمصر من المحنة اللى وصلتلها بسبب الكلاب اللي باعوها… وساعتها هنعرف نحاسب صح اللى باعنا بعد كل الهم ده ما يزول… على المبدأ المصري المعروف ” لينا عتاب بعدين “

 

– تحيا مصر حرة بشبابها مستقلة بحكمائها

Facebooktwittergoogle_plusredditpinterestlinkedinmail

نُشرت بواسطة

Ahmed Samy

Digital Strategist | Social Media Strategist | Digital Marketing | Online Marketing | Online Advertising Strategist | Digital Strategist | Digital Marketing in the Middle East

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *