القوى الأجنبية وتدخلها لتصعيد الأزمة المصرية … اللي ما يشوفش من الغربال ( ج11 )

إستكمالاً….

الجمعة, 4 فبراير :

 

العشرات يتظاهرون في ساحة تايمز سكوير في نيويورك تضامنا مع تظاهرات المحتجين في مصر المطالبين بتنحي الرئيس المصري مبارك.

 

الناس دي ببتظاهر رغم إنهم عشرات مش ميات ولا آلافات ولا ملايين في أماكن مخصصة للتظاهر عشان ما يعطلوش بلدهم…

 

الرئيس الامريكي اوباما يقول في مؤتمر صحفي مع رئيس الوزراء الكندي ان مستقبل مصر يحدده ابناؤها، وعملية انتقال السلطة يجب ان تبدأ الان وتؤدي الى انتخابات ديمقراطية.وعملية التفاوض لنقل السلطة في مصر قد بدأت بالفعل، واستخدام العنف ضد الصحفيين والناشطين في حقوق الانسان والمتظاهرين امر غير مقبول.

 

تفاوض بدأت بالفعل لنقل السلطة؟؟؟ طب مين اللى بيتفاوض يعنى لا مؤاخذة؟؟ سيادتك وسيادته ولا مين بالظبط؟ وهتيجي منين إنتخابات ديموقراطية في ظل المقلب الدستوري اللي إحنا لابسينه ومضطرين عشانه نستحمل مبارك الكام شهر اللى فاضل في ولاية سعادته الكريمة… عم أوباما إرحمنا وشوفلك شغلانة غيرنا انت كدة بقالك 11 يوم ماوراكش غير مصر… هي أمريكا مش محتاجة وقتك ده ولا ايه؟

 

منظمتا العفو الدولية وهيومن رايتس ووتش للدفاع عن حقوق الانسان تدعوان الى الافراج الفوري عن عاملين معهما اعتقلوا في القاهرة الخميس مع اكثر من عشرة ناشطين اخرين يعملون في المجال نفسه.

 

طب عاملين وقولنا ماشي… ناشطين دي بقة تعبير عن ايه؟ ناشطين في العمل يعني بيشربوا نيدو كل يوم الصبح؟؟ ولا دول بعيد عنك وعن السامعين جواسيس ومدسوسين وإحنا مش داريين؟؟ ركزوا في كلامكم أمال!

 

المتحدث باسم البنتاغون يقول ان وزير الدفاع الاميركي روبرت جيتس تحادث هاتفيا الجمعة مع نظيره المصري المشير محمد حسين طنطاوي ويؤكد انها “رابع محادثة هاتفية مع وزير الدفاع المصري” منذ بدء الاحداث في مصر.

 

المحادثة الرابعة ولسه برضه ما نعرفش فحوى المحادثات ولا ندرى بيها… طب وكلمت مثيله الاسرائيلي برضه المرة دي ولا اسرائيل خلاص برة اللعبة والحرب المتوقعة دلوقتى بين مصر وامريكا بس؟

 

البيت الابيض يحث الحكومة المصرية على اتخاذ “خطوات ملموسة” لتحقيق انتقال منظم للسلطة، ويحذر من ان الاضطرابات قد تستمر دون اتخاذ مثل هذه الاجراءات.

 

طب ماهو الراجل يعملكوا ايه تانى… يقول كن فيكون!! واحدة واحدة بس علينا احنا سخنين بما فيه الكفاية ولسه الرجالة بتاعتنا واقفين فى التحرير اهيه عمالة تصرخ أرحل حالاً أرحل حالاً ولا انت بتدق ع الحديد وهو سخن عشان ما يلحقش يبرد؟

 

امين عام حلف شمال الاطلسي (الناتو) اندرس فوغ راسموسن ينتقد التخفيضات في ميزانيات الدفاع الاوروبية ويقول على هامش مؤتمر الامن في ميونيخ ان الاضطرابات الجارية في مصر وفي اماكن اخرى في شمال افريقيا والشرق الاوسط تظهر الحاجة لمزيد من الاستثمار في مجال الامن.

 

يا أخوانا في حرب علامية هتقوم لو حسني تنحى وأمريكا وإسرائيل حاولوا يهجموا على مصر… لازم نلحق نامن نفسنا إنتوا مش دريانين ولا إيه؟

 

روسيا تصف دعوات الامين العام للامم المتحدة للتغيير في مصر بأنها سياسية بشكل جلي وتتجاوز مهام الامم المتحدة، جاء ذلك على لسان السفير الروسي في الامم المتحدة فيتالي تشوركين الذي قال للصحافيين ان دور الامم المتحدة “لا يشتمل على تقديم نصائح سياسية للدول ذات السيادة التي تربطها بالامم المتحدة علاقات طويلة”.

 

الموقف الروسي هو الموقف السليم الوحيد طوال المشوار… الناس دي من أيام عبد الناصر وهي موالية لمصر قلباً وقالباً… وماتنساش كرهها الدائم لأمريكا وخوفها من سيطرتها على مصر.

 

الرئيس الروسي ديمتري مدفيديف يدعو الى “تسوية سلمية للمشاكل القائمة وفي اطار القانون”. في مصر، ووزير الخارجية الروسي سيرجي لافروف يحذر من الحل الخارجي ويقول “اننا نعتبر فرض اي حلول من الخارج وتوجيه الانذارات امرا غير ايجابي. وان القوى السياسية المصرية هي التي يجب ان تتوصل الى التوافق”.

 

والله قاعد بقول كدة من يوم الجمعة اللى فاتت لحد ما صوتي أتنبح… بس حتى لو صوتى راح خالص هبدأ أشاور للناس وأقولها كدة.

 

اكثر من الف بحريني يتظاهرون بالقرب من السفارة المصرية للتعبير عن تضامنهم مع الاحتجاجات المستمرة في مصر المطالبة برحيل الرئيس المصري حسني مبارك.

 

مش دي البلد اللي البرادعي الامريكاني قال إن حسني مبارك هيهرب عليها؟

 

اعتصامات في العاصمة اللبنانية بيروت ومدينة طرابلس في شمال لبنان تضامنا مع المتظاهرين المصريين.

 

آه وماله مش عيب! يعنى هي جت عليكوا… والقرعة تتباهى بشعر بنت أختها!

 

الشرطة الماليزية تستخدم خراطيم المياه لتفريق تظاهرة شارك فيها حوالى 600 شخص امام السفارة الاميركية في كوالالمبور تضامنا مع الاحتجاجات في مصر.

 

والنبي هم يبكي وهم يضحك… الناس الماليزين بيتظاهروا قدام سفارة أمريكا عشان يتضامنوا مع مصر… عاشت مصر حرة مستقلة يا رجالة!! شوفتوا وصلتوا بينا لفين 🙁

 

قادة الاتحاد الاوروبي يدعون في بيان مشترك السلطات المصرية الى البدء “الان” بعملية الانتقال الديمقراطي، ويحثون كافة الاحزاب المصرية على الدخول في حوار جاد ومثمر للتوصل الى انتخابات حرة ونزيهة.

 

حلوة يحثون دي… وهي الاحزاب المصرية بسم الله ما شاء الله حاجة تشرف وفاهمة سياسة صح…ده حتى من قوتهم نصهم لسه تحت التأسيس والنص التاني ماكنش عارف الدستور وهو بيتكلم!!

 

وزارة الخارجية الروسية تنتقد ما تسميه القمع “غير المقبول” ضد الصحافيين الذين ينقلون وقائع التظاهرات في مصر.

 

ايه بس يا روسيا… إحنا بس محتاجين نقفل على نفسنا حبتين… احنا عارفين إنك متضايقة برضه من جواسيسك اللي متحدد إقامتهم حالياً بس إدينا فرصة بس نتعامل مع بعضينا وبعدين نبقى نتفاهم.

 

رئيس الحكومة الايطالية سيلفيو برلوسكوني يدعو الى انتقال ديمقراطي في مصر “دون قطيعة” مع الرئيس حسني مبارك الذي يصفه بالرجل الحكيم.

 

نار نار نار

 

مفوضة الشؤون الخارجية في الاتحاد الاوروبي كاثرين اشتون تحذر من “اندلاع العنف مجددا في الشوارع” المصرية، وتدعو السلطات المصرية لاطلاق “حوار مع المعارضة دون تأخير”.

 

ايه يا رجالة انتوا هديتوا ليه… فين أيام الأكشن والضرب والحرق والدمار… ولا خلاص الحكومة عرفت تسيطر على الوضع وتمنع أي حركات من المخربين والمدسوسين؟

 

المستشارة الالمانية انجيلا ميركل تدعو السلطات المصرية الى ضمان ان تكون تظاهرات الجمعة “حرة وسلمية”.

 

ايه رأيك يا إنجي؟؟ عرفت حكومتنا الجديدة القوية الذكية تظبط الأمور صح؟ صباح الفل يا قوى الشحن الخارجية

 

رئيس الوزراء البريطاني ديفيد كاميرون يحذر من استخدام العنف ضد المتظاهرين في مصر ويقول عند وصوله لحضور قمة الاتحاد الاوروبي “إذا رأينا اليوم في شوارع القاهرة اعمال عنف ينظمها النظام او اللجوء الى (البلطجية) لمهاجمة المتظاهرين، فستفقد مصر ونظامها ما تبقى من مصداقية ودعم يتمتعان بهما في الغرب بما فيها بريطانيا”.

 

على فكرة يا باشا بس عشان نكون متفاهمين… غنتوا خلاص وصلتولنا فكرة إن البلطجية لازم يكونوا تابع الحكومة… أصلا مافيش بلطجية في بلدنا مصر العظيمة غير بلطجية الحكومة… ما فيش بلطجي عندنا أعمال حرة ولا فري لانسر… كلهم موظفين حكوميين!

 

القادة الاوروبيون المجتمعون في قمة بروكسل يحذرون السلطات المصرية من أي اعمال عنف جديدة ضد المتظاهرين.

 

هي دي نغمة النهاردة… نحذر من أي اعمال عنف ها… اعمال عنف… اعمال عنف… اعمال عنف!

 

البيت الأبيض يقول انه يجري حاليا مناقشات مع شخصيات مصرية بارزة لضمان انتقال سلمي فوري ومنظم للسلطة.

 

اللي هو البرادعي ولا زويل؟؟  برضه انا عاوز أفهم انتوا مالكوا ومال انتقال السلطة…. انتوا اللى هتنقلوا السلطة يعني؟؟ يا فرحتي انا وأمي وأهل الحتة كلهم… امريكا يا ولاد هتنقلنا السلطة وهتختارلنا رئيس ” السلطة ” الجديد!!

 

المتحدث باسم الخارجية الأمريكية فيليب كراولي يقول: “نحن على تواصل بشكل يومي مع قيادات الجيش ووزارة الدفاع. الجيش يلعب دورا بناءا لضمان الاستقرار ، الاربعاء كان يوما سيئا لمصر ، واليوم الجيش عدل اداءه و تعامل مع الاحداث على الارض”.

 

على أساس إنه كان بتوجيهاتكم صح؟ ولا كنتوا عاوزين تبدأوا تقومونا ع الجيش كمان؟؟؟ إحنا جيل شباب متربي على حب جيش مصر زي حب نيل مصر بالظبط… ريحوا بالكوا وانتوا اصلا ما شوفتوش حاجة من جيشنا… كل الموجود لحد دلوقتى دول حرس جمهوري وجيش مدني!!

 

مرشد الجمهورية الاسلامية الايرانية آية الله علي خامنئي يقول إن الانتفاضة المصرية “حركة تحرير إسلامية” و يدعو في خطبة ألقاها باللغة العربية الشعب المصري الى مواصلة انتفاضته حتى “اقامة نظام شعبي إسلامي”.

 

اهلاً أهلاً…. الأخوان هما اللى هيمسكوا البلد يعنى من وجهة نظرك يا باشا ولا انت بتنادي على الناس تطلع بقة تقول عاوزينها اسلامية اسلامية!! بس هتقابل مشكلة كبيرة لو بقينا دولة إسلامية… غن إحنا هنبقى إسلامية سنية وإنتوا شيعة!!

 

المفوضة العليا لحقوق الانسان في الامم المتحدة نافي بيلاي تقول ان التغيير “جار في مصر كما حدث في تونس”، داعية السلطات المصرية الى الاستماع لصوت الشعب.

 

يعني من الآخر هاتوا الكتالوج على رأي أحمد شفيق وطبقوه… وإثبتوا على اللى انتوا فيه ده لحد ما مبارك يزهق ويطق ويموت او يهرب ويسيبها تخرب

Facebooktwittergoogle_plusredditpinterestlinkedinmail

نُشرت بواسطة

Ahmed Samy

Digital Strategist | Social Media Strategist | Digital Marketing | Online Marketing | Online Advertising Strategist | Digital Strategist | Digital Marketing in the Middle East

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *