القوى الأجنبية وتدخلها لتصعيد الأزمة المصرية … اللي ما يشوفش من الغربال ( ج13)

إستكمالاً….

 

الأحد, 6 فبراير :

 

اندرياس شوكنهوف نائب رئيس الكتلة البرلمانية لحزب الاتحاد الديمقراطي المسيحي : ” إذا أرادت أن تلعب ألمانيا دورا بناءا في انتقال سلمي للسلطة في مصر عن طريق السماح للرئيس مبارك للسفر إلى ألمانيا فيجب علينا أن نستضيفه إذا أراد ذلك”.

 

وده كرم من سيادتكم ولا دعوة للرئيس إنه يستسلم ولا خبر عشان الناس تفتكر غنها قربت توصل للي عاوزاه وانه راحل حالاً على ألمانيا بحجة إجراء الفحوصات ويكملوا على اللي هما فيه؟

صرحت الكيه هوف المتحدثة باسم الحزب الديمقراطي الحر الشريك في الائتلاف الحكومي بأنها ترحب باستضافة مبارك ومغاردته إلى ألمانيا لتعزيز الاستقرار في مصر.

وأوضحت أن الأمر ” لن يكون لجوءا سياسيا”.

 

تصريح تاني من ألمانيا…. بيرحبوا بمبارك عندهم عشان استقرار مصر… عشان هو ده الحل الوحيد لإستقرار مصر وانتوا عارفين مبارك سافر ألمانيا مرتين لتلقى العلاج فهما الناس بتسهل عليه الامور للخروج بشكل شيك قال يعنى رايح ياخد العلاج وجاي… دي رسالة موجهة لمبارك نفسه قبل ما تكون موجهة للمعتصمين انه لازم تبدأ تفكر في الهروب بقة يا باشا.

صحيفة بيلد الألمانية : أن الحكومة الألمانية لا تريد أن تفرض على مبارك البالغ من العمر 82 عاما أن تكون ألمانيا منفاه عقب خروجه من مصر.

 

مين قال إنه خلاص اتنفى؟؟؟ وأجزمتوا منين إنه خارج خارج؟؟؟ ولا دي برضه رسالة للناس غنها تكمل وفاضل ع الحلو دقة وما نبوظش الطبخة عشان بقرش ملح؟ ما تخافوش المعتصمين لسه معتصمين!!

صحيفة نيويورك تايمز الأمريكية نشرت تقارير حول مباحثات سرية تجريها الإدارة الأمريكية مع القادة العسكريين في مصر حول إمكانية إنهاء التوتر في مصر في حال مغادرة مبارك البلاد لتلقي العلاج في ألمانيا.

 

صباح الفل ده انتوا كمان بتختاروا للراجل هيروح فين بعد ما مخطط الرحيل الفوري يتم… ولما لقيتوه مش هايسيبها كدة قولتوا توجهوه في حالة انه يزهق ويمل ويحس انه مش قادر يستحمل أكتر من كدة إزاى يسيبها تضرب تولع بطريقة شيك.

أعلن الأمين العام للأمم المتحدة بان كي مون أن مرحلة انتقالية “منظمة” في مصر ضرورية لعملية السلام بين الاسرائيليين والفلسطينيين.”مصر لعبت دورا استراتيجيا مهما في عملية السلام في الشرق الاوسط لهذا السبب اننا قلقون ونود ان نرى العملية الانتقالية تتم بشكل سلمي ومنظم من دون آثار سلبية على السلام والاستقرار في المنطقة برمتها”.

إنت رجعت تحافظ على علاقتك بمبارك بعد ما ادركت انه مش هيسيبها ويخلع… وبتجر ناعم مع الراجل بتذكير الناس بأدواره في عملية السلام والمناقشات الاسرائيلية الفلسطينية…

 

شددت بريطانيا على ضرورة اجراء “تغيير حقيقي وواضح وشامل” في مصر. 

بريطانيا جابت ورا يا جدعان خلاص…. لغت نغمة الانتقال الفورى… ولا الانتقال السريع… ولا الانتقال المنظم… دلوقتى بتنبه الناس ان في تغييرات وعلى كافة المجالات في مصر وبتستعيد صداقة مبارك لبريطانيا!!

 

وزير الخارجية البريطاني وليام هيغ  “نريد مواصلة الضغوط لتتم العملية الانتقالية بشكل منظم وواضح”. ودعا الى “تغيير حقيقي وواضح وشامل يجمع الشعب المصري” مع وجود جدول زمني محدد لتنظيم انتخابات”. كما دعا إلى تشكيل “حكومة اوسع تشمل شخصيات لا تنتمي الى النخبة التي تحكم البلاد منذ سنوات”.

 

انت بتقول ضغوط علني كدة؟ يا عم ده انا كنت بقول ماحدش حاسس يا راجل!! طب انت مش كنت من بتاع تغيير فوري حالاً وانه لازم يرحل برضه حالاً … دلوقتى اتنقلت لموضوع منظم وواضح؟ وبعدين مين قالك ان الحكومة الحالية دي بتحكم البلاد من سنوات؟؟ مش كلها يعنى يا عم وبعدين ده كلهم كام شهر ولا انت مش فاهم؟

 

العشرات من دعاة الديمقراطية يشاركون في تظاهرات في عدة مدن أمريكية وكندية، ويدعون إلى وضع حد لحكم الرئيس المصري حسني مبارك.

 

تشكروا… بس مش بدري شويتين؟

رئيس وزراء تركيا رجب طيب اردوجان يدعو الى “تحول ديمقراطي في مصر باسرع وقت ممكن”.

 

إنت جيت متأخر شوية عن أخواتك بس عادي… اسرع وقت ممكن دي هتتحول كمان يومين إلى آمن او سلمي!!

وزيرة الخارجية الامريكية هيلاري كلينتون تؤيد اشراك حركة الاخوان المسلمين المعارضة في الحوار الجاري بين الحكومة المصرية والقوى المعارضة للخروج من الازمة السياسة التي تمر بها مصر.

 

إنتوا دايماً باتمنوا على مصلحتكم!!! إخوان إيه بس حرام عليكوا… انتوا عاوزينها توصل لولا حاجة ولا بتحموا ضهركوا لو مصر تحولت لحكم الإخوان؟؟

 

الرئيس باراك أوباما يقول إنه مهما كانت تطورات الأمور في مصر، فإن الأوضاع لن تكون أبدا كما كانت من قبل.

 

البركة فيك وفي اللي زيك يا باشا… إحنا ثورتنا كانت صح… وحكومتنا الجديدة وتغيير خريطتنا السياسية كان صح… لكن باللى انتوا عملتوه ولسه بتعملوه كلنا هنبقى غلط في غلط ومصر هتخرب بينا وعمرها ما هترجع مصر اللي كنا كلنا بنحبها مهما كانت تعبانا!!

Facebooktwittergoogle_plusredditpinterestlinkedinmail

نُشرت بواسطة

Ahmed Samy

Digital Strategist | Social Media Strategist | Digital Marketing | Online Marketing | Online Advertising Strategist | Digital Strategist | Digital Marketing in the Middle East

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *