القوى الأجنبية وتدخلها لتصعيد الأزمة المصرية… اللي ما يشوفش من الغربال ( ج5 )

السبت 29 يناير

أوباما يجدد دعوته إلى وقف العنف وضبط النفس في مصر.

للمرة التانية بقولكوا أظبطوا نفسكم… ده الإنذار التاني … لولا إني ما خلصتش لسه دراسة الملف ولولا إنك لسه ع الكرسي وواقف صامد يا حسني كان زماني جاي بقولكوا إظبطوا نفسكوا من على برج القاهرة.

حكومات بريطانيا وفرنسا وألمانيا دعت الرئيس مبارك إلى تشكيل حكومة موسعة. و مكتب رئيس الوزراء البريطاني ديفيد كاميرون يعلن في بيان مشترك مع الرئيس الفرنسي نيكولا ساركوزي والمستشارة الألمانية أنجيلا ميركيل انه دعا الرئيس مبارك إلى إجراء عملية تغيير من خلال حكومة واسعة التمثيل وبانتخابات حرة ونزيهة. وجاء في البيان “نعبر عن قلقنا البالغ للأحداث التي تجري في مصر. نحن نثمن المواقف المعتدلة التي اتخذها الرئيس مبارك في الشرق الأوسط على مدى سنوات، ونحثه الآن على أن يتعامل مع الأحداث الحالية بنفس الاعتدال، وندعوه لتجنب العنف مهما كلف الأمر”.

 

إحنا اتلمينا على بعض إحنا التلاتة من خوفنا وقلقنا وقعدنا نبحث وندرس في موضوع اننا كدة بصدد حرب عالمية تالتة لو مبارك تنحى… وعاوزين نقول إن لازم حكومة جديدة بسرعة تعرف تنقذ الوضع قبل ما الدنيا تخرب عليك يا مبارك وعلينا وإحنا عاوزينك تاخد بالك كدة وتعدي الامور بطريقة دبلوماسية زي ما كنت بتعمل مع الغريب بقالك سنين وبلاش تضرب في الشباب عشان هما كدة مش هيهدوا ولا يتهدوا… وإحنا جاهزين بس انت إمشى وسيبها لينا وإحنا نتعامل

 

عشرات من السوريين يحتشدون قرب السفارة المصرية بدمشق حيث يهتفون منددين بالرئيس حسني مبارك.

أمال إيه ده إحنا سوريا مش هزار يعنى… وتعبانين قوي من ظلم الحكومة المصرية لينا… أبو عمار السوري اللى في المهندسين مابقاش شغال بسببك يا مبارك إرحل دلوقتى حالاً

البيت الأبيض يعلن أن الرئيس الأمريكي باراك أوباما عقد اجتماعا مع مستشاريه للأمن القومي بشأن الأوضاع في مصر.

أمن مصر مرتبط بيه امن العالم كله… دي الدولة الاتقل في منطقتها سواء عربياً او أفريقياً او حوض البحر المتوسط كمان… وبعدين كدة الأوضاع داخلة على خراب هناك ولازم نعرف لو مبارك تنحى فى ظل الضغط عليه هنعمل ايه بالظبط وايه اللى يضمنلنا مصالحنا وأهدافنا في الشرق الأوسط بعد ما الخريطة السياسية كلها اتغيرت في مصر دلوقتي ومبارك مضطر يفوق ويعدل البلد ويعدل سياساته داخلية وخارجية… ده حتى مشروع التوريث اللى صرفنا عليه دم قلبنا طار…

وزير الخارجية البريطاني ويليام هيج يحث الحكومة المصرية على ضبط النفس، مضيفا أن على الرئيس المصري “الاستماع بصورة عاجلة” للمتظاهرين. ويضيف في بيان “لا نزال قلقين بشدة بشأن مستوى العنف الذي شهدناه خلال الأيام القليلة الماضية”.كما يدعو مبارك “للاستماع الآن إلى التطلعات التي عبر عنها المصريون”.

 

إحنا قلقانين وهنفضل قلقانين… حرام عليكوا إحنا ما بنامش قبل ما نعرف مصر إيه اللى حصل فيها ونفصصه ونشوف مرة واتنين وتلاتة… إنجزوا بقة وحلوها عشان كدة وجع دماغ وأعصاب

 

رئاسة الحكومة البريطانية تعلن أن رئيس الوزراء ديفيد كاميرون أجرى اتصالا هاتفيا بالرئيس حسني مبارك أعرب فيه عن قلقه الشديد تجاه تطورات الأوضاع في مصر.

ايه يا مبارك ما تخوفناش عليك… لو مش قدها قولنا عشان نبدأ نتعامل… ولو هتهرب لاغيني كدة بيني وبينك وانا احضر مع أمريكا وقوى حفظ السلام الدولية ونيجي نظبط الامور لحد مانت تشرب اللبن بحليب عندنا في أي قصر تشاور عليه إنت وعيلتك… وما تخافش على مصر إحنا هنعرف نتعامل.

المتحدث باسم المنطقة الشمالية في اسرائيل يعلن أن المئات من عرب اسرائيل خرجوا في تجمعات في المنطقة الشمالية دعماً للمظاهرات الجارية في مصر. وتجمع المتظاهرون في مناطق سخنين وحيفا وأم الفحم وقرى عربية أخرى.

مش قولنالكم اللي بيحصل في مصر ده مصيبة على اسرائيل.. أرجوكوا لموا الليلة بدل ما تقومهم علينا إحنا كمان عشان الوضع بقة مرعب لينا وهنضطر نلجأ للخطة ب.

جون كيري رئيس لجنة الشؤون الخارجية بمجلس الشيوخ الامريكي يعبر عن قلقه من سوء الأوضاع في مصر داعياً مبارك إلى الاستجابة لمطالب شعبه.

هو احنا هنفضل نعيد نفس النغمة بس هنغير اللي بيقولها… أصل هي جملة واحدة اللى علموهالنا واللي صرحولنا إننا نقوله ” قلقانين قوي ” والقلق بيتعبنا ” قوي ” إحنا مش عاوزين نتدخل بس انتوا عارفين القلق ” شديد قوي ”

مئات المتظاهرين امام السفارة المصرية في لندن يهتفون بشعارات ضد الرئيس المصري حسني مبارك، ويطالبونه بالتخلي عن السلطة ويعلنون تضامنهم مع المتظاهرين في مصر، ويتعهدون بمواصلة الاحتجاجات حتى الاستجابة لمطالب المتظاهرين في مصر.

إحنا مصريين بس ما لحقناش اللي حصل يوم التلات اللى فات فقولنا نيجي بعد الهنا بسنة… بس التوقيت غلط بس إحنا مش واخدين بالنا بقة راعوا فرق التوقيت الساعتين بيومين

وزارة الخارجية الروسية تدعو السلطات المصرية إلى تأمين “السلم الاجتماعي” وإعادة الاستقرار إلى البلاد.

إحنا طول عمرنا بيهمنا مصر وبنحبها ومالناش أطماع في أي حاجة… وبنقولكوا ما تسمعوش كلام أعدائنا اللدودين اللي دمروا الإتحاد السوفيتي بتاعنا قبل كدة بالحرب الباردة… إرجعوا بيتوكوا وشغلكوا وأديكوا بدأتوا تنضفوا البلد… خلوها تنضف بس في نفس الوقت حافظوا على الإستقرار في بلادكوا عشان ما تروحوش في داهية

الاتحاد الافريقي يعرب عن قلقه تجاه الاضطراب السياسي في مصر.وجين بينج رئيس مفوضية الاتحاد يقول في مؤتمر صحفي ان ” مصر تمر بوضع نحتاج لمراقبته، إنه وضع مقلق”.

مصر دي عمتنا وخالتنا… والي بيحصل ده ما يرضيش حد…دول واخدين كأس الأمم 3 مرات ورا بعض كدة ما ينفعش

رئيس الوزراء الياباني ناوتو يحث الرئيس المصري على بدء حوار مع شعبه. ويقول في كلمة أمام الملتقى الاقتصادي العالمي في دافوس “نتوقع أن تبدأ الحكومة المصرية حوارا مع الشعب فورا وأن تقدم على إصلاحات”.

احنا كمان قولنا المفروض الحكومة المصرية تعمل ايه واهي مساعدة لوجه الله عشان احنا ما صدقنا خلصنا من آثار الحرب العالمية التانية ومش عاوزين واحدة تالتة .

وزارة الخارجية الايرانية تدعو المسؤولين المصريين الى الاستجابة لمطالب المتظاهرين “المطالبين بالعدالة” وتجنب اعمال العنف وتقول ان “تظاهرات المصريين هي حركة تطالب بالعدالة”.

كلنا بقة هنكرر نفس الكلام… وبعدين هنرجع نغيره بس مش اليومين دول… إحنا اصلنا سبحان الله كلنا وصلنا لنتيجة واحدة لحد دلوقتى… منها لله الجامعات الخاصة بقة.

الرئيس الفلسطيني محمود عباس يؤكد لمبارك تضامنه مع مصر وحرصه على امنها واستقرارها.

ده انت اللي مظبطنا يا مبارك… أوعى تروح في حتة أرجوك… إنت لو وقعت أعمل ايه انا!

انطلاق تظاهرة في العاصمة الفرنسية باريس تأييدا لمطالب المحتجين في مصر.

 

إحنا مصريين شرفاء بس سيبنا البلد وروحنا على باريس وبصراحة ما نعرفش شكل ميدان التحرير قوي… بس الرجالة اللي عملت كدة هناك أخواتنا… والموضوع مش لازم يخلص عند يوم الجمعة ولا عند تغيير حكومة ولا عند تعيين نائب ريس ولا عند حركات تطهير واصلاح واسعة لأ… لازم نكمل… نكمل ايه بقة مش عارفين بس إحنا بنحتج وخلاص زي أخواتنا.

متظاهرون مؤيدون لحركة الاحتجاج في مصر يحتشدون امام مبنى السفارة المصرية في لندن.

أوعى تنسونا إحنا لسه قاعدين هنا أهوه عشان نقول لأ لمبارك.

المستشارة الألمانية أنجيلا ميركيل تحث الحكومة المصرية على السماح بالمظاهرات السلمية. وتقول للصحفيين على هامش الملتقى الاقتصادي العالمي المنعقد في دافوس ان استقرار مصر “مهم جدا ولكن ليس على حساب حرية التعبير”.

مش مهم الإستقرار ولا الكلام ده ولا تقولى اقتصاد يتدهور ولا بلد تتأخر… المهم الحرية يا رجالة… انتوا لسه ما خدتوش حريتكم وما تقفوش أبداً مهما حصل ولا مهما البلد ولعت

وزيرة الخارجية الفرنسية ميشيل اليوت ماري تدعو الى ضبط النفس والحوار بين الأطراف في مصر.

لألألأ كدة وسعت منكوا… أقعدوا اتفاهموا مع بعض بقة وبطلوا مظاهرات وعنف ودي نصيحة لوجه الله

 

وزارة الخارجية الايطالية تدعو في بيان لها إلى “الوقف الفوري لاعمال العنف” في مصر.

 

إنتوا كدة هتخربوا البلد… أوقفوا العنف من أي نوع وبأي شكل ولموا الليلة.

مفوضة العلاقات الخارجية في الاتحاد الأوروبي كاثرين أشتون تدعو في بروكسل الحكومة المصرية الى إطلاق سراح المعتقلين في الحال. وتحث السلطات المصرية على البحث عن وسائل سلمية وبناءة للتعامل مع الاحتجاجات وقال البيان إن “ايطاليا تتابع عن كثب وبقلق بالغ الأحداث في مصر، وتعرب عن اسفها العميق للضحايا المدنيين”.

 

ماحدش يتحبس وماحدش يعتقل وماحدش يحصلوا حاجة… وانا اتحاد اوروبي آه بس احب أقولكوا إن ع الناحية التانية من البحر المتوسط في إيطالياً وهي أقرب حاجة ليكوا ومتابعة اللي بيحصل عندكوا..

توني بلير مبعوث الرباعية الدولية إلى الشرق الأوسط يقول في تصريحات خاصة لبي بي سي إن ما يحدث في مصر يعني وجود حاجة لتغيير “مستقر”. ويضيف إنه مع الأخذ في الاعتبار مطالب المحتجين، فإن الأهم هو دفع “الإرهابيين” بعيدا عن الساحة.

انا بقة بقول اللي يمليه عليا ضميري وخبرتي… انا عاوز الأمور تتحل مش عاوز ولا أشعللها ولا اقول كلام فاضي… لازم التغيير يحصل بس باستقرار ولازم تطلعوا المدسوسين من بينكوا اللي عمالين يرهبوا المواطنين الشرفاء

رئيس الاتحاد الاوروبي هيرمان فان رومبي يدعو إلى “انهاء العنف” في مصر.

دي جملة النهاردة… إنهوا العنف يا رجالة إنهوا العنف

باري مارستن المتحدث باسم الخارجية البريطانية يقول انه “من الواضح ان مئات الالاف من المصريين يريدون الاصلاح واحداث تغييرات جذرية للنظام في مصر ولذلك على الحكومة المصرية الاستجابة بطريقة سلمية لهم دون اللجوء الى العنف او القمع ومحاولة منع وصول المحتجين الى الشوارع”.

غيروا بقة تغيرات جامدة في النظام بتاعكوا بهدوء وإستقرار ولموا الليلة دي من غير ضرب ولا قنابل ولا بلطجية ولا عنف… بس حاولوا تخلوا الناس تطلع بيوتها عشان ده خطر على استقراركوا اليومين دول.

وسائل اعلامية تقول ان الملك السعودي عبد الله بن عبد العزيز اتصل هاتفيا بالرئيس المصري حسني مبارك، وأعرب عن تأييده له قائلا إنه لا يمكن قبول “العبث بأمن واستقرار مصر” من قبل مندسين “باسم حرية التعبير”.

إنت صح يا مبارك… أوعى تهرب عشان ما يقعدوش يسمونا بلد الهروب… وما ينفعش أمن واستقرار مصر يضيع في الرجلين.. الناس اللى عبرت عن رأيها عبرت.. وانت استجبت وبدأت إصلاحات جذرية من شأنها تغيير الخريطة السياسية المصرية بالكامل.. بس أوعى تمشى قبل ما تظبط الامور.

عشرات من السوريين يتظاهرون قرب السفارة المصرية بدمشق ويرددون هتافات مؤيدة للشعب المصري ومنددة بالرئيس حسني مبارك.

مجموعة من الشباب اللبناني تنظم تجمعا أمام السفارة المصرية في بيروت تعبيرا عن تضامنهم مع الشعب المصري.

إحنا كلنا معاكوا ووراكوا مش مهم إيه اللى بيحصل في بلادنا المهم مصر تتخلص من حسني مبارك

Facebooktwittergoogle_plusredditpinterestlinkedinmail

نُشرت بواسطة

Ahmed Samy

Digital Strategist | Social Media Strategist | Digital Marketing | Online Marketing | Online Advertising Strategist | Digital Strategist | Digital Marketing in the Middle East

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *