القوى الأجنبية وتدخلها لتصعيد الأزمة المصرية – اللي ما يشوفش من الغربال ( ج9 )

إستكمالاً….

 

الأربعاء, 2 فبراير :

 

الولايات المتحدة تنصح رعاياها بمغادرة مصر فورا وتعلن أن من يريد السفر فعليه التوجه فورا إلى مطار القاهرة. ومسؤولون امريكيون يؤكدون ان حوالى 1900 مواطن امريكي تم اخلاؤهم مع اسرهم منذ الاثنين.

 

حالاً يا رجالة بدون تحفظات… إسحب كله إحنا خلاص على اتم إستعداد ومعادنا يوم السبت الجاي الصبح بعد ما حسني يمشى يوم الجمعة وحركة جمعة الرحيل دي تمشي… وهيبقى إسمه سبت الحضور للأمريكان… هتنور يا مارك إنت وجاك.

 

وزيرة الخارجية الامريكية هيلاري كلينتون تدين في اتصال هاتفي مع نائب الرئيس المصري عمر سليمان ما تصفه بالاشتباكات “المروعة” التي دارت في ميدان التحرير بوسط القاهرة بين موالين للرئيس حسني مبارك ومعارضين. وبيان صادر عن الخارجية الامريكية يوضح ان “الوزيرة طالبت الحكومة المصرية بمحاسبة المسؤولين عن اعمال العنف”.

 

إحنا بندين وبنشجب وبندد وانتوا كدة وجعتوا قلبنا ومش راضيين تفهموا  وأديني قولتها قدام العالم كله للمرة التامنة في خلال 8 ايام وكشفت راسي عليكوا.

 

البنتاجون يعلن أن وزير الدفاع الأمريكي أجرى اتصالات بنظيره المصري المشير محمد حسين طنطاوي. والمتحدث باسم الوزير الاميركي جيف موريل يكشف عن “انه اتصاله الثالث بالوزير المصري منذ نهاية الاسبوع الفائت” من دون ان يوضح فحوى المشاورات.

 

مافيش فحوى… ده كلام ناس كبيرة… إحنا بنرتب للحرب ودي حاجات ما ينفعش تتقال ع الملأ كدة يا اخوانا… بنضغط ع الراجل إنه يسلم مصر وبنشوف آخره إيه لو مش هيسلمها بعد ما حسني يمشي.

 

رئيس الوزراء الاسرائيلي بنيامين نتنياهو يحذر من ان عدم الاستقرار والتظاهرات ضد الحكومة في جميع انحاء مصر ستؤدي الى “زعزعة الاستقرار لسنوات” في المنطقة. ويضيف في خطاب امام الكنيست الاسرائيلي “سيكون هناك صراع في مصر بين من يؤيدون الديموقراطية ومن يريدون الاسلام الراديكالي”.

 

وانا بأكد على وجود الصراع ده وانه هيستمر واننا هندعمه لحد ما نولعها ونخربها وأهي كلها خطوات ناحية الحلم الاكبر لدولة اليهود الكبرى من النيل للفرات. وبعيد نغمة الحكم الديني عشان إحنا يهود ودول مسلمين وهتبقى دي هرمجدون والنهاية لو حصل كدة.

 

وزير الدفاع ايهود باراك يستبعد وجود خطر تهديد عسكري فوري لاسرائيل بسبب الاحداث في مصر، ويضيف “لا شك ان عهد مبارك انتهى. هناك امر يبدأ لا يشبه في شيء ما كان سابقا”.

 

أنا بحذر أي حد ان اللى هيقرب مني هاعوره… واللي فات خلاص مات… وشكلها مافيهاش ولا معاهدة سلام ولا اي حاجة وربك يسترها يا عم الحاج.

 

المتحدث باسم البيت الابيض روبرت جيبس يقول ان الرئيس باراك اوباما وادارته “يدينان بشدة العنف المؤسف الذي وقع في شوارع القاهرة” ويضيف “اذا كانت الحكومة وراء هذا العنف، فيجب ان يتوقف فورا” مؤكدا ان اوباما يتبلغ بالتطورات في شكل دائم.

 

يا اخوانا خدوا بالكوا… اللي حصل ده من الحكومة…. يا شعب مصر… الحكومة عاوزة تموتكوا كلكوا ويبقوا عايشين في بلد فاضية… يا مبارك لو انت ورا الكلام ده الكلام بيوصل لأوباما أول بأول… طب لما هو بيوصل لأوباما ولو كان حسني مبارك اللي وراها… اوباما اللي بيحب مصر قوي وجمعيات حقوق الإنسان والكلام الفاضي ده ما استغلوهاش ليه؟

 

الخارجية الامريكية تعرب عن “املها” في ان تحافظ مصر في المستقبل على “دور بناء” في عملية السلام في الشرق الاوسط كما جاء على لسان المتحدث باسم الخارجية فيليب كراولي الذي قال “نأمل ان تؤدي الحكومة المقبلة في مصر دورا بناء في عملية السلام”.

 

خلاص إحنا بنتعامل على إن مبارك ماشى ماشى… مش إحنا بنرتب لجمعة الرحيل ولا إيه؟ وبعدين بننقل كلام بنتنا الصوغننة إسرائيل ونغمة إتفاقيات حفظ السلام… والجريمة الفلسطينية الإسرائيلية وغيرها من القضايا.

 

السناتور الأمريكي الجمهوري جون ماكين يدعو الرئيس المصري حسني مبارك الى التنحي. ويكتب على موقع تويتر “انه امر مؤسف (لكن) الوقت حان ليتنحى الرئيس مبارك ويتخلى عن مقاليد الحكم”. مضيفا ان “هذا الامر يصب في مصلحة مصر وشعبها وجيشها”.

 

هيصب في مصلحة مصر وشعبها وجيشها… من امتى وانتوا بتعملوا حاجة لصالح أي حد غير نفسكوا… ما تنسوش المثل اللى عندنا ” المتغطي بالأمريكان عريان ” .

 

المتحدث باسم البيت الأبيض روبرت جيبس يقول ان التغيير يجب ان يبدأ الان و هذه الرسالة نقلها اوباما لمبارك خلال اتصالهما الامس بصراحة و صدق. نراقب تطورات الاحداث المتسارعة و ندرس كافة السيناريوهات المحتملة. يجب أن يبدأ التغيير و الانتقال الان.

 

حالاً يا مبارك إنت مش قد اللي إحنا بننظمله وبنعمله… رجالتنا وسط الشباب والبرادعي عندك وداعمين كل حاجة ومرتبينلك جمعة رحيل زي الفل… إمشى دلوقتى حقناً للدماء يا نجم… مش أوباما لاغك على الصح؟؟ إعمل الصح… إعمل الصح.. إعمل الصح… على رأي الاستاذ غسان مطر.

 

الحكومة المصرية تعلن رفضها لدعوات تنحي الرئيس مبارك والمتحدث باسم وزارة الخارجية المصرية حسام زكي يقول ان “الحديث عن مرحلة انتقالية ذات ترتيبات مغايرة لما اوضحه رئيس الجمهورية يتناقض مع الدستور بل وينقض على الشرعية الدستورية بشكل واضح”.

 

كله يسكت عشان اللي بتعملوه ده ولا هيجيب نتيجة معانا كنظام ولا هيجيب نتيجة مع الشباب الواعي… فكل واحد يخليه في حاله… يعنى انت في حالك وانا في حالي وبلاش هراج.

 

رئيس البنك الدولي روبرت زوليك يقول في تصريحات صحفية إن الوضع في الشرق الأوسط هش، حيث هناك بلدان كتونس ومصر واقعة في مأزق “التحديث الجزئي” الذي يعني أن طبيعة النظام السياسي لا تسمح للجماهير بالاستفادة من النمو الاقتصادي. ويؤكد إن البنك مستعد لدعم أي بلدان في المنطقة بعد تقدمها باتجاه الإصلاحات السياسية الاقتصادية.

 

ماحنا بنغير اهوه يا رايق… خليك إنت بس رايق نسد اللي علينا الأول وبعدين نقولك عاوزين تاني.

 

انخفاض قيمة شهادات الايداع الدولية المصرية المدرجة في لندن بعد مصادمات في القاهرة بين انصار الرئيس حسني مبارك والمطالبين برحيله ومؤسسة موديز للتصنيف الائتماني تخفض تصنيفها لخمسة بنوك مصرية ونظيرتها ستاندرد اند بورز تخفض التصنيف الائتماني لبنكين مصريين.

 

فليحيا الإنهيار الإقتصادي يا جدعان… إلى جوار ذلك بنخسر 350 مليون جنيه يومياً على الأقل في كل يوم من ايام الازمة… فليسقط يسقط حسني مبارك ويسقط يسقط الإقتصاد المصري في داهية.

 

مايك مولن رئيس هيئة الأركان الامريكية المشتركة يعلن عن “ثقته” في قدرة الجيش المصري على توفير الأمن في البلاد بما في ذلك أمن قناة السويس الاستراتيجية وسط الاضطرابات التي تشهدها مصر.

 

ده بعد التليفونات اللي كانت بين وزيرين الدفاع اللى بقالها أسبوع ولا إيه؟ ولا إنت بتشاورلنا على القناة عشان نفهم إنكم موجهين صاروخ ليها ولا ايه مش فاهمك؟؟ على أي حال إحنا بنتبادل نفس الثقة في الجيش بتاعنا اللى انت ما تعرفش عنه حاجة وما كشفناهوش في ظل كل الظروف دي.

 

البيت الأبيض يدين أعمال العنف في ميدان التحرير.

 

ما كلنا بندين… هو انت المفروض تطلع تسقف مثلاً؟ وكلنا عارفين ان في عنف في ميدان التحرير وبنحاول نتخلص منه في أسرع وقت… ما تفكرش الناس انتا عشان إحنا بنهدي الموضوع أهوه.

 

الخارجية الأمريكية تبدي قلقها من اعتقال صحفيين وإعلاميين.

 

اللي عاجبني فيكوا إنكوا ورا الحرية بأي شكل وكل طريقة… حرية مواطن شغال حرية صحفي اوكي حرية إعلامي برضه تهمكوا… لكن لو ظهر عندكوا واحد بينادي بسقوط امريكا يبقى إبن كلب إرهابي وما يستحقش أي حرية… وإحنا برضه بنسقفلكوا.

 

وزارة الخارجية المصرية حديث أطراف أجنبية عن “مرحلة انتقالية تبدأ الآن” فى مصر هو حديث مرفوض ويهدف الى تأجيج الوضع الداخلي.

 

حط مليون خط…. ولا صحيح إحنا كمصريين ما بنصدقش كلام الحكومة عشان دول وحشين… حتى لو الحكومة اتغيرت والخريطة السياسية إتغيرت… حتى لو انا شايف بعيني إنهم بيولعوها نار من برة برضه مش هاصدق حكومتي… هو مين سماها حكومتي أصلاً!!

 

رئيس الوزراء البريطاني ديفيد كاميرون يصف مصادمات ميدان التحرير بأنها امر مشين ويدعو الحكومة المصرية إلى البدء الفوري بالإصلاح السياسي. مؤكدا على أن تكون “المرحلة الانتقالية في مصر سريعة وان “تتسم بالمصداقية وتبدأ الآن”.

 

انت ما كنتش لحقت تسمع كلام الخارجية المصرية ولا انت تجاهلتوا وطلعت برضه تقول نفس الكلام؟ طب حتى لو انا غيرت كلامي هتقول نفس الكلام؟ انا مت موتات كتير قبل كدة مش هخاف ” احمد حلمي 1000 مبروك “

 

رئيس الحكومة التركية رجب طيب اردوجان يقول إن على الرئيس المصري حسني مبارك اتخاذ خطوة مختلفة عن تلك التي اعلن عنها في كلمته التي القاها مساء الثلاثاء ويحث الرئيس المصري على البدء في عملية نقل السلطة في اقرب وقت ممكن، مشددا على ان “من المهم جدا ان تتولى ادارة مؤقتة شؤون البلاد في هذه الفترة الانتقالية”.

 

ياه ده انا كنت قربت أنسى إنه قال بيان إمبارح… ماحدش علق على البيان ولا وصفوا ولا قال اى حاجة عنه غيرك… أخيراً حد قال إنه سمع الراجل لما طلع فى التليفزيون… مش مهم بقة انت بتقول عليه بيان فاضى ومالوش لازمة مع انه خلى نص مصر تعيط ” أنا ما عيطتش على فكرة ولا أثر فيا بنكلة “

Facebooktwittergoogle_plusredditpinterestlinkedinmail

نُشرت بواسطة

Ahmed Samy

Digital Strategist | Social Media Strategist | Digital Marketing | Online Marketing | Online Advertising Strategist | Digital Strategist | Digital Marketing in the Middle East

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *