الوداع

واتقابلنا بعد طول البعاد
نفس المكان نفس المعاد
قلبى لسه دايب ومشتاق
لهفة عنيا زى ماهيا

راجع بشوقى وبين ايديا الهدية
لكن مش دى لمسة ايديها
ده مش الشوق اللى فى عنيها

سألتها مالك أيه غير حالك
بصت فى عنيا وقالت:
أنا آسفة على اللى ضاع من أيامك
أعذرنى أنا مش أميرة احلامك

ضعفت ايديا ووقعت الهدية
وصرخت عنيا وردت وقالت:
ازاى تنسينى وتنسى حبى
ازاى قدرتى تدوسى على قلبى

ما جاوبتش ما ردتش
وردت عليا دمعة عنيا الحزينة

نسيت حبيبتى سهرنا الليل
حبنا كان زى حلم جميل
وصحيت على جرح ونار
لقيتنى وحيد فى حياتى محتار

حبيبتى لأ مش أنا اللى هيموت
جرحك جرح زى غيره هيفوت
أنا اللى فى مدرستى ربيتك
وفتحتلك قلبى وخليته بيتك

لكن إنتى وقلبك الغادر
على نسيانك ونسيانه قادر
هبدأ من تانى حياتى
هقطع شهادة ميلادى
ومن وسط ليلى هخلقلى نهار
مش قلبى أنا اللى يعيش فى النار

آسف حبيبتى العنوان غلط
وزى ما علمتك الحب
هاعملك معنى اللألم
مش هفكر أبدا فى الندم
مش هبكى على اللى راح
اأنا قادر أداوى كل الجراح

آسف حبيبتى العنوان غلط….
هارميكى جنب جواباتك
هخرج تماما من حياتك
وهخرج قلبك من برة كل حساباتى
هاشيل كل مواعيدك من أوقاتى
وهتفضلى جوة قلبى مجرد ذكرى
ما أحلمش إنها تتكرر بكرة

آسف حبيبتى العنوان غلط…
أيوة….
كنا اتنين عايشين دايبين
كنا احلى حدوتة عاشقين
كنا أسطورة حكاها زمانا
كنا لما نمشى فى بستان
الورد كان يغير منا
وخلاص الحلم كله ضاع
نهاية حزينة وقلبك باع
دلوقتى حبيبتى خلاص آسف

آسف حبيبتى العنوان غلط……
حبيبتى خلاص إنسى الحنان
إنسى الأحضان
اللى حمتك من الطوفان
مين اللى مد ايده
ومسح دموعك ومعاها الاحزان
إنسى حكايتنا
وأعتبريها حدوتة وكان ياما كان
قصة هتحكيها هترويها
لكن أحسنلك إنسيها
اكتبيها ورقة وقطعيها
وفى ملف الماضى إرميها
ما تفكريش فيا تانى
سيبينى لوحدى لأحزانى
ولو فى يوم احتجتينى
أوعى تفكرى تجينى
إنتى جرحك إتنقش على جبينى
أنا عاوز أفضل وحيد لباقى سنينى
وداع حبيبتى…..

Facebooktwittergoogle_plusredditpinterestlinkedinmail

نُشرت بواسطة

Ahmed Samy

Digital Strategist | Social Media Strategist | Digital Marketing | Online Marketing | Online Advertising Strategist | Digital Strategist | Digital Marketing in the Middle East

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *