9 نصايح للحصول على زيارات أكبر لموقعك من خلال فيسبوك

إنك تنشر لينكات من موقعك على صفحتك في فيسبوك مش كفاية عشان تاخد أكتر زيارات للموقع, عشان تجيب ترافيك لموقعك من خلال فيسبوك لازم تركز على مجموعة من العوامل الأساسية اللي بتأثر بشكل أساسي في ده.
إن الناس تعمل شيير أو لايك هي من العوامل المهمة.. لكن ده برضه مش كفاية,
لازم تفكر في الطرق اللي بيها تقدر ترفع معدلات الضغط على اللينكات من خلال فيسبوك ( CTR ) وتتعامل مع كل لينك على إنه إعلان كامل, محتاجله تصميمه الخاص ورسالته الإعلانية بالتفصيل, مع تطوير طريقتك في العرض اللي تتناسب مع الروح الإجتماعية لموقع فيسبوك اللي بتنشر عليه اللينك بتاعك. هوا إعلان كامل لكنه إعلان مجاني!

فكر فيها وجربها… إنتا ممكن تنشر نفس اللينك على صفحتك بأكتر من طريقة من حيث طريقة العرض والصورة والعنوان والوصف والكلام المكتوب مع اللينك نفسه, وكل طريقة منهم تقيس عدد الزيارات اللي وصلتك منها, إيه النتيجة؟ هتحقق متوسط كليكات وزيارات مختلفة عن التانية أكيد!
وإنتا بتقيس النتايج, ما تقيسش إجمالي الزيارات اللي جاتلك, ولكن فكر في عدد اللي شافوا اللينك مقارنة بعدد اللي داسوا عليه. الكليكس على الريتش في 100 Clicks/Reachx100
على سبيل المثال: البوست الأولاني وصل لألف شخص وداس على اللينك اللي في البوست 200 شخص. في الحالة دي معدل الضغط = 20%
مثال البوست التاني: وصل لألفين شخص وداس على اللينك اللي في البوست 1000 شخص. في الحالة دي معدل الضغط = 50%

ملحوظة جانبية: المعدلات العالمية للضغط على اللينكات من خلال فيسبوك من خمسة إلى سبعة في المية. بمعنى إن لو البوست بيوصل لألف شخص, وداس منهم 50 إلى 70 شخص يبقى إنتا كدة ماشي مع المعدل الطبيعي.

بناءاً عليه, يبقى أهمية معدل الضغط على الرابط CTR يعتبر أهم بكتير من معدل الوصول نفسه Reach… لأن مافيش فايدة إنك تحقق معدل وصول عالي لكن بدون ضغطات!

يالا بينا, خلال النقط الجاية دي هنتكلم عن شوية حاجات تعلي معدل الضغط على اللينكات والبوستات بتاعتك عشان تحصل على أعلى ضغطات ممكنة من خلال فيسبوك:

1- أطلب من المتابع بتاعك يدوس على الصورة: الكول تو أكشن ( CTA )

الصفحة الرئيسية لفيسبوك عندك فيها عشرات البوستات المختلفة من أصحابك ومن باقي الصفحات اللي انتا متابعها والإعلانات وغيرها, وكتير منها بيكون عبارة عن صورة أو فيديوهات ” على الأقل بنسبة 65% في سنة 2015 من الهوم على فيسبوك عبارة عن صور وفيديو ”
معنى كدة إن اللينك بتاعك هيكون في تحدي شرس مع باقي الصور والفيديوهات اللي ظاهرة للمتابع بتاعك.. وعشان تكسب التحدي ده, لازم تضيف زرار أو حاجة تدعوه للضغط, حتى لو فكرت بالشكل التقليدي وضيفتله زرار بسيط على الصورة وعليه كلمتين تقليدين زي: ” إضغط هنا ”
قارن بين الصورتين دول:
بحوث التسويق

يا ترى أي من الصورتين قابلة للضغط أكتر؟ أكيد اللي فيها زرار ” دوس هنا وأعرفها! ”

لمحة جانبية: نسبة كبيرة من الناس لو شافت كل تفاصيل الصورة وهي صغيرة ” حتى لو حلوة ” مش هيكليك على الصورة عشان يشوفها بحجم أكبر, الإعتماد بس على إن الصورة تكون حلوة مش كفاية… لازم تفهمه إن الصورة دي بيتداس عليها عشان يدوس!
ملحوظة كمان: الصور اللي عليها زرار CTA بتاخد ضغطات أكتر بنسبة 14% عن نفس الصور اللي بتتضاف بدون CTA

على صعيد آخر: ليه تطلب طلب واحد لما ممكن تطلب طلبين؟
الصورة مكتوب فيها إنك تدوس على اللينك, ليه ما يكونش في البوست نفسه إنتا كاتب إنك لو عجبك البوست تدوس شيير مع صحابك؟
الحاجات اللي بتطلبها من المتابعين بتوعك بتعلي إمكانية حدوثها, ممكن ناس تشوف اللينكات بتاعتك وتدوس عليها وتعجبها لكن ما يجيش في بالها إنها تعملها شيير, لو طلبت منهم يعملوا شيير ده هيعلي فرصتك في الوصول لناس أكتر.

2- قول رأيك الشخصي حوالين اللينك اللي بتنشره, أو إدي المتابعين إيحاء إنك بتقولهم رأيك!

أكيد لازم تكتب بوست أو كلام معين مع اللينك وانتا بتشيره, لأنك لو شيرته بدون أي كلام بيفقد على الأقل 18% من قدرته على الوصول للمتابعين لصفحتك!
ولكن إزاي تكتب الكلام المناسب وانتا بتشير لينك عاوز ياخد أعلى كليكات من فيسبوك؟
الشبكات الإجتماعية من إسمها ” إجتماعية ” فكل شيء بيدور حوالين الحوار وتبادل الآراء ووجهات النظر غالباً خاصة في صفحات فيسبوك الخاصة بقضية معينة أو بإهتمام معين ” Community ”
بالتالي إنك تضيف مع اللينك شوية كلمات عن رأيك الشخصي في اللينك اللي بتشيره أو تلمح لده, بيدي فرصة لمتابعينك إنهم هما كمان يبقوا مهتمين بتكوين رأيهم الخاص حوالين اللينك ده, وده بيدفعهم أكتر للضغط…
قارن بين الصورتين دول:
share-thoughts

يا ترى أي من الصورتين قابلة للضغط أكتر؟ أكيد اللي فيها رأيي الشخصي عن المقال!

لمحة جانبية: في ناس كتير بتفتكر إنك لما تكون بتتكلم بإسم براند يبقى لازم تتكلم كأنك واقف على المسرح وكأن الشركة نفسها اللي بتتكلم, ولكن في فيسبوك وفي عالم الشبكات الإجتماعية الوضع مختلف كتير عن باقي قنوات التواصل, لازم على الشبكات الإجتماعية تضفي على الأمور لمسة آدمية وتخلي الأمور تبدو موجهة بشكل شخصي من شخص إلى التاني.
ملحوظة كمان: اللينكات اللي بتضيف في البوست بتاعها كلام يعبر عن رأيك الشخصي عن محتوى اللينك بياخد ضغطات أكتر بنسبة 8% عن نفس اللينكات اللي بتتضاف بدون إبداء رأيك عن المحتوى.

على جانب آخر, فكر في إستخدام ال feelings وإنتا بتنشر اللينكات للتعبير عن الموود العام للمحتوى ده ورأيك فيه, شوف المثال التالي:
العلامة التجارية المؤثرة

3- ألوان الصورة مهمة جداً! وفي فيسبوك الوضع مختلف تماماً عن مانتا متخيل…

حقيقة علمية: ألوان الصورة بتأثر كتير على جذب العين في اللقطة الأولى, وتخلي المستخدمين للموقع يقفوا قدام الصورة للحظة وسط ما هما بيعملوا سكرولينج للموقع سواء من الكمبيوتر أو الموبايل!

ولكن الألوان اللي بتجذب العين ممكن تكون بتختلف من شخص لآخر, أو بمعنى أدق, من مجموعة لمجموعة… لازم تعمل شوية تجارب في البداية لمجموعة من اللينكات بإستخدام صور من درجات معينة في يوم معين, وتدرس معدل الكليكات في اليوم ده مقارنة بمعدل الوصول, وبعدها تجرب في يوم تاني نفس اللينكات في نفس معدل الوصول ولكن بإستخدام صور درجات ألوانها مختلفة…
لحد ما تعرف أفضل درجات ألوان بيفضلها المجموعة المتابعة لصفحتك واللي بتحقق معاهم أحسن معدل تحويل conversion rate او اعلى معدل ضغطات على اللينكات CTR

كمان تصميم الشبكة الإجتماعية نفسها وألوانها الغالبة هتكون معامل أكيد ومؤثر في درجات الألوان اللي هتستخدمها في الصور…
من تجاربي مع فيسبوك, الوضع مختلف تماماً عن باقي الشبكات الإجتماعية…
من المفترض في كل الشبكات الإجتماعية إن أزرار ال CTA اللي اتكلمنا عنها في النقطة رقم 1 تكون بألوان ظاهرة شوية ومميزة وبحجم كبير, وتكون الصورة نفسها بألوان هادية شوية… أو العكس, إن الصورة نفسها تكون ألوانها فاقعة وقوية وال contrast بتاعها عالي جداً عشان تكون ظاهرة بشكل بارز وسط تصميم الشبكة الإجتماعية وتلفت النظر بالتالي تاخد أعلى كليكس..
لكن في فيسبوك, الوضع مختلف شوية – حسب التجارب – كل ما كانت الصورة ممتزجة أكتر مع تصميم الفيسبوك نفسه كل ما كان معدل الضغط على الصورة أعلى, أكتر الصور اللي بتاخد ضغطات هي الصور اللي غالب عليها اللون الأبيض والرمادي والأزرق من درجات زي #4c66a4 … وكل ما كانت الصورة بسيطة وهادية كل ما كانت الكليكات عليها اعلى اكتر…

قارن الصورتين الجايين وتخيلهم على فيسبوك:
colors

إذا كنت متخيل إن الصورة اللي على اليمين هتحقق كليكات أكتر, تبقى محتاج تجرب بنفسك!

ملحوظة هامة: إتباع الألوان البيضا والرمادي مع الأزرق في الصور اللي بتشيرها على فيسبوك مع اللينك, بيرفع معدل الضغط بشكل عالي جداً بيتراوح بين 16% إلى 28% .

4- إستخدم بروتوكولات فيسبوك open graph

لو كنت ما تعرفش فيسبوك أوبن جراف, فهي مجموعة من اكواد meta اللي بتتحط في منطقة ال head في موقعك عشان توصف المحتوى وتسهل على فيسبوك إنه ينشر اللينكات بتاعتك بالشكل المفضل ليك – إستعين بمطور مواقع أو إستشير مصمم ويب في النقطة دي لو ما عندكش الخبرة الكافية.
لو كنت لسه ما بتستخدمش فيسبوك أوبن جراف في موقعك, لازم تبدأ من دلوقتي حالاً إستخدامه!
لأن الناس اللي هتشير اللينكات بتاعتك على فيسبوك ممكن تكون بتشير اللينك بشكل مش حلو, ما يحققش زيارات بشكل كويس, وانتا بتخسر الشيرز دي على الفاضي!

قارن بين الصورتين الجايين, اللي على الشمال هوا شكل اللينك لما يتشير من غير أكواد open graph :
open-graph

لاحظ:
open graph بيستخدم عشان تقول لفيسبوك معلومات الصفحة الاساسية, ومن اهمهم النقط دي:
أ- صورة اللينك لما حد يشيره هتكون إيه؟
ب- عنوان الصفحة.
ج- وصف الصفحة ” الكلام اللى تحت العنوان ”
د- مين كاتب الصفحة أو الصفحة الرسمية على الفيسبوك.

من التجارب, إستخدام open graph كان أكتر حاجة حققت نجاح في رفع معدلات الضغط على اللينكات والحصول على ترافيك أعلى من فيسبوك, حوالي 38% إرتفاع في معدلات الضغط من اللينكات اللي الناس بتشيرها من الموقع بعد إستخدام فيسبوك open graph بطريقة صحيحة.

5- وقت نشر اللينكات ومعدلات النشر:

التوقيت اللي بتنشر فيه اللينكات تحديداً لازم يكون مدروس بنسبة كبيرة, لازم يكون وقت مناسب للمتابعين ليك إنهم يكونوا في الموود والحالة المزاجية المناسبة اللي تخليهم يقروا مقال كامل مش مجرد إنهم يشوفوا اللينك ويقرروا يقروه بعدين أو يحسوا إنه مش وقته..
فكر إمتى بيكون المتابعين بتوعك قاعدين أونلاين بأكبر عدد, ومستعدين لقراءة المقال ده تحديداً أو الضغط على اللينك ده؟

لمحة جانبية: في مصر الضغط على اللينكات أعلى في نص الأسبوع – تحديداً يوم التلات – عن ايام الأجازات زي الجمعة والسبت, غالباً الأيام التلاتة اللي في نص الأسبوع في نهاية اليوم ” من الساعة 10 إلى 1 بالليل ” هي أحسن وقت تنشر فيه لينكات وتاخد أعلى كليكات, الإتنين والتلات والأربع. في حين إن باقي أيام الأسبوع بتاخد فيه البوستات كومنتات أكتر أو تفاعل من خلال زرار لايك أكتر من الكليكات. وابعد عن نشر اللينكات في أيام الأجازة والراحة الأسبوعية, زي الجمعة تحديداً.

اللمحة دي هي الوضع الغالب, لكن يمكن الوضع عندك مختلف بإختلاف الشريحة المستهدفة من المتابعين أو نوع المحتوى الموجود عندك…
من خلال فيسبوك insights تقدر تعرف أكتر وقت الناس عندك بيكونوا فيه أونلاين, وبشوية تجارب لنشر لينكات في ساعات مختلفة من اليوم وأيام مختلفة مع قياس معدلات الضغط على اللينكات في الأوقات دي, هتقدر تحدد الناس الموجودين عندك أفضل وقت ليهم إمتى اللي فيه بيكونوا مستعدين للضغط على لينكات موقعك وقراية محتواه.
كمان التجارب دي هتعرفك:
أ- أكتر وقت المتابعين بتوعك بيتفاعلوا من خلال الردود إمتى؟
ب- أكتر وقت المتابعين بتوعك بيعملوا فيه شيير للمحتوى بتاعك؟
ج- أكتر وقت المتابعين بتوعك بيدوسوا عشان يقروا المحتوى بتاعك؟
إستخدم google analytics كمان مع تحديد العرض للزوار بالساعة خلال أيام الأسبوع هيساعدك في إستكشاف الساعات والأيام الأمثل!

بعد ما تخلص تجاربك, وتعرف الأوقات الأمثل لنشر اللينكات بتاعتك على فيسبوك للمتابعين بتوعك, حاول إنك تلتزم بيه بعد كدة قدر المستطاع, لأن نشر لينك واحد يحقق أقصى نتايج أفضل من نشر 10 لينكات بشكل عشوائي بيحققوا نتايج ضعيفة!

ملحوظة هامة: دورة حياة المستخدم داخل الفيسبوك حوالي 3 ساعات في المرة الواحدة, بالتالي إنتا تقدر تنشر اللينك نفسه هوا هوا أكتر من مرة في نفس اليوم من غير ما تقلق إنه يكون مكرر, طالما فاصل بين المرة الأولى والتانية بمعدل 3 ساعات فهو هيظهر ناس مختلفة.

ملحوظة كمان: معدلات نشر البوستات ممكن تزوده عشان تجيب ترافيك أكتر لو كان المستخدمين بتوعك معدلات ضغطهم على اللينكات عالي, مثال صفحة اليوم السابع على فيسبوك, تقدر تنشر لينك كل 10 دقايق لأن متابعينها معدل ضغطاتهم عالية على اللينكات.

6- الإهتمام بالتفاعل, بالذات أول 5 ردود في أول 5 دقايق!

والمقصود بالتفاعل هنا تحديداً هي الردود والكومنتات, هل تعلم إن كل ما زادت الكومنتات في أول ما اللينك ينزل, كل ما ده زود الكليكات على اللينك بتاعك؟
وبمجرد ما المتابعين بتوعك يسيبوا كومنتاتهم على البوست, لازم ترد على الكومنت بأسرع وقت ممكن… لأن ده بيعلي من ثقل البوست نفسه post weight كمان بيديله أولوية ظهور أكبر, وباقي المتابعين لما بيلاقوا ردود من ناس تانية على اللينك, ده بيثير فضولهم إنهم يدوسوا هما كمان على اللينك ويشوفوا في ايه بيحصل!
الرد على كل كومنت بينزل على اللينك بتاعك بيعلي الكليكات بمعدل حوالي 9% وخلي دايماً ردودك بتفتح الطريق لمزيد من التعليقات, لأن كل ما زادت التعليقات كل ما زادت الكليكات على اللينك بتاعك, بالتالي إنتا الكسبان…
تفاعل مع المتابعين بتوعك, فيسبوك شبكة إجتماعية ولازم تكون إجتماعي, أوعى تنسى ده.
وإبداء المتابعين رأيهم في اللينك اللي بتنشره يرجعنا للنقطة رقم 2, كل ما كان في آراء تثير فضول المتابعين للضغط على اللينك كل ما زاد معدل الضغط عليه.

ملحوظة جانبية: في أول 5 دقايق من نشر اللينك, فيسبوك بيحاول يحدد أهمية البوست نفسه كإجمالي وأولويته في الظهور وسط ال news feed لباقي المتابعين, الإهتمام بالدقايق الاولى شيء بالغ الأهمية… من التجارب, البوستات اللي بترد على الكومنتات بتاعتها في أول 5 دقايق بشكل سريع بتحقق معدلات وصول أعلى وكليكات أعلى بحوالي 11%

7- طول الجملة اللي بتتضاف مع اللينك وعدد كلماتها.

زي ما وضحت في النقطة رقم 2 إنتا محتاج تكتب بوست مع اللينك تقول فيه رأيك, لكن هل تعتقد إن طول البوست بيفرق؟

حسب كل التجارب, كل ما كان الكلام اللي هتكتبه وانتا بتشير البوست أقل كل ما كان أحسن, في تقسيمات للبوستات على الشبكات الإجتماعية عموماً من ناحية عدد الحروف ونسبة التفاعل مع طول البوستات:
قصير جداً : من 0 إلى 40 حرف.
مختصر: من 41 إلى 70 حرف.
متوسط: من 71 إلى 100 حرف.
مثالي: من 101 إلى 140 حرف.
طويل: أكتر من 141 حرف.

على فيسبوك, الوضع الأمثل هوا إن البوست يكون ” متوسط ” من 71 إلى 100 حرف, خاصة مع كترة إستخدام فيسبوك من الموبايل, ماحدش عنده القدرة إنه يقرا كتير في المقدمات, كمان كل ما كانت المقدمة مختصرة ومباشرة وجذابة وتثير الفضول كل ما ده أدى إلى كليكات أكتر.
حاول تلتزم بأقل من 100 حرف ” يتضمن المسافات والعلامات ” ده هيجيبلك تفاعل أعلى بنسبة تصل إلى 66% أعلى من البوستات اللي أكتر من 141 حرف. بالتالي كليكات أكتر بنسبة ما تقلش عن 15%

8- إستخدم الإيموشنز وبخاصة اللي بتظهر كويس على الموبايل emoji

إنتا في شبكة إجتماعية زحمة جداً, إنك تلفت النظر شيء مهم عشان تكسب اليوزر اللي بيقعد يعمل سكرول يدور على حاجة تعجبه وسط النيوز فيد عشان يتفاعل معاها او يقراها او يشوفها.
إستخدام الايموجي أو الرموز التعبيرية بالذات السائدة والمستخدمة بكثرة على الموبايلات هتعلي الكليكات على اللينكات بتاعتك بشكل لا تتوقعه, لأنها هتلفت النظر في البداية, وبعدين هتضفي على اللينكات بتاعتك روح اكتر إجتماعية تخلي المتابعين يدوسوا وهما عندهم إحساس مسبق ناحية المقال..
شوف المثال ده:
إزاي تخلق حالة

لمحة جانبية, لو عاوز تستخدم الايموجي الخاصة بالموبايل ومش عارف تجيبها وانتا على الكمبيوتر, إستخدم الموقع ده للبحث وإستخدام الرموز التعبيرية زي ما تحب getemoji.com وما تقلقش لو ظهرتلك في شكل مربع كود, خد المربع ده كوبي وبيست وهينزل في البوست عادي شكله مربع لكنه من الموبايل هيبان بشكل الرمز التعبيري المقصود..

9- عنوان اللينك, أخطر شيء!

شوف الفيديو ده الأول:

لو ما اشتغلش معاك الفيديو, جرب من اللينك ده:
https://www.facebook.com/a.samy/videos/10155926929605430/

بعد ما شوفت الفيديو ده خليك فاكر, نفس المعنى ولكن بكلمات مختلفة…. ده شيء لازم تفكر فيه مليون مرة قبل ما تنشر أي لينك على فيسبوك… إزاي تستخدم الكلمات المهمة اللي بتأثر في المتابعين بتوعك وبتشد إهتمامهم وبتخليهم يتفاعلوا أكتر ويدوسوا أكتر على النوعية دي من اللينكات, وتخلي عنوان المقال بتاعك بيتضمن الكلمات دي…
ممكن تستخدم كمان الايموجي في عنوان اللينك, وممكن تحط في عنوان اللينك CTA
فكر كمان إنك ممكن تنشر اللينك مرتين بعنوانين مختلفين, وتقيس معدل الضغط على اللينك في كل عنوان نزلته…

عشان تعرف الكلمات المؤثرة في المتابعين بتوعك, راجع الزيارات اللي حصلت على موقعك من بدايته ولحد دلوقتي, مع تحديد المصدر فيسبوك, وشوف عناوين المقالات, غالباً هتلاقي بينها كلمة أو اتنين متشابهين في المعنى والمضمون, إعرف إن دي الكلمات الكسبانة وابدأ إستخدمها هي ومرادفاتها دايماً في عناوين المواضيع.
كمان من عناوين المواضيع اللي دايماً كسبانة مهما إختلف المجال اللي بتتكلم عنه:
أ- الإختبارات والألعاب اللي بتتضمن الأسئلة وتحديد الشخصية Quizzes
ب- صيغة أفعل + رقم ” زي: أفضل 10 كذا كذا أو أكبر 7 كذا كذا ”
ج- الحاجات المتعلقة بالأكشن والدراما, زي العناوين المتعلقة بالمصايب والكوارث والتعذيب – للأسف – ولكن تقدر تستخدمها بطريقة إنها كانت هتحصل لكن ما حصلتش.. أو يمكن كانت تحصل لو ما قريتش المقال ده 😉
د- العناوين اللي بتحكي قصة وبعدين تقف في نص القصة ” زي: هذا الرجل كان ينوي إحتلال شبرا ولكن بعد تدخل تلك المرأة شاهد ماذا حدث.. ”
هـ – الحاجات العلمية الصادمة اللي لا يصدقها عقل طبيعي, زي مثلاً ” إكتشاف جبل من اليورانيوم المخصب في الصحراء الغربية يعود إلى عهد الفراعنة ”

الأمثلة السابقة على قد ما تبان ما تنفعش غير في حالات معينة أو نوعية معينة من المحتوى, ولكن تقدر تعيد تهيئة عناوين لينكات موقعك عند نشرها على فيسبوك عشان تكون بنفس معانيها الموجود في مضمون النص ولكن بطريقة العرض المناسبة أكتر للنشر على فيسبوك والحصول على كليكات أكتر.

ملحوظة: عنوان اللينك اللي بتنزله على فيسبوك ممكن يوصل لحد سطرين مافيش مشكلة, ولكن أفضل شيء إنه يكون برضه لا يتجاوز 100 حرف وبحد أقصى 140 حرف, وحاول تبعد عن حروف الجر أو الكلمات اللي بتاخد مساحة على الفاضي.

الخلاصة:

المرة الجاية قبل ما تنزل لينك على صفحتك على فيسبوك للمتابعين بتوعك, راجع الأول النقط التسعة اللي إتكلمنا عنهم هنا:
1- الكول تو أكشن.
2- قول رأيك الشخصي في البوست وانتا بتشير اللينك.
3- خلي ألوان الصورة اللي هتستخدمها مايل للأبيض بشكل أكبر مع الرمادي والازرق ” وأوقات الموف بيظبط ”
4- راجع الديفولبر وإتأكد إنك بتستخدم facebook open graph بشكل صحيح وكامل
5- إعمل تجارب وتحليل للوقت الأمثل اللي تنزل فيه اللينكات.
6- إهتم بالكومنتات وما ترميش اللينك وتمشي.
7- خلي البوست اللي نازل مع اللينك ما يزيدش عن 100 حرف.
8- إستخدم الرموز التعبيرية والايموجي.
9- عنوان اللينك لازم يتضمن الطريقة اللي تجيبلك أعلى كليكات ” نفس المعنى ولكن كلمات تانية ”

دلوقتي بقى معاد التطبيق العملي, شيير المقال ده عندك وطبق فيه الحاجات دي, وما تنساش تعملي منشن 😉

Facebooktwittergoogle_plusredditpinterestlinkedinmail

نُشرت بواسطة

Ahmed Samy

Digital Strategist | Social Media Strategist | Digital Marketing | Online Marketing | Online Advertising Strategist | Digital Strategist | Digital Marketing in the Middle East

13 رأي حول “9 نصايح للحصول على زيارات أكبر لموقعك من خلال فيسبوك”

  1. سبحان الله … الكلام دا فعلاً كنت بعمله باغلب التفاصيل وعارف انها الطريقة الصح لجذب الانتباه والSM …… بس عمري ما فكرت انها متقسمة استراتيجيات فالتسويق بالشكل دا بالظبط ^_^

  2. فعﻻ محتوى محترم . وكﻻم اكثر من ممتاز .
    استفدت منه كتير جدا .
    انتظر منك كل جديد

  3. شكرا على المقال المفيد

    بالنسبة للاوبن جراف فهو رح ياخد الصورة بشكل آلي من الموقع

    ازاي اجبره على انه ياخد الصورة اللي فيها CTA ،، فيها زر مكتوب عليه اضغط هنا مثلاً؟

  4. اوبن جراف بياخد الصورة بشكل تلقائي لو انتي مش محددة اكواد og:image في منطقة ال head/meta
    استعيني بديفولبر يساعد في النقطة دي, او استخدمي Yoast wordpress seo plugin لو مدونتك أو موقعك بيعتمد على وردبريس

  5. شكراً ليك محمد, بتمنى تقيس النتايج بعد تطبيق المعايير دي وتبلغني بالتغيرات في معدل الزيارات من فيسبوك بعدها

  6. من أفضل المقالات التي قرأتها باللغة العربية عن السوشيال ميديا. ا. أحمد سامي اسلوبه قريب جدا من اسلوب احمد عزت الاثنين يحترموا عقلية القارئ جدا، بمقالات محترمة جدا.. منتظر جديد مقالات.. ربنا يوفقك إن شاء الله

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *