دراسة إحصائيات الديجتال وتحليل التحركات من خلال فيسبوك, دراسة حالة على صفحة سيو صح

بنكمل في الجزء ده محاولة التحليل ودراسة إحصائيات الديجتال أكتفتيز بشكل مبسط, مع التطبيق على موقع سيو صح.

في الجزء الأول إستكشفنا القنوات اللي بيتحرك من خلال موقع سيو صح على شبكة الإنترنت, وبعدها بدأنا بتحليل أول القنوات دي وهي الموقع نفسه, تقدر تراجع الجزء الأول من هنا: دراسة إحصائيات مواقع الإنترنت وتحليل التحركات من خلال الإنترنت, دراسة حالة على موقع سيو صح

في الجزء ده, هنبدأ بتحليل صفحة الفيسبوك لموقع سيو صح خلال السنتين اللي فاتوا من عمر الموقع بالتفصيل…

في البداية – زي ما عملنا في اول خطوة – هنبص بصة سريعة على الصفحة نفسها https://www.facebook.com/SeoS7.Official وندوس على عدد اللايكس اللي مكتوب فيها

seos7-page
seo-s7-first-look

ونجمع المعلومات الأولية من النظرة السريعة:

  • تصنيف الصفحة: موقع انترنت website
  • التابس الإضافية الموجودة Tabs: الفيديوهات ( فيها 6 فيديوهات ) – يوتيوب سيو صح – تابات خاصة بإعلان عن الكورسات ( 3 تابات منهم اتنين غير نشطين ) – تاب خاصة بالبيع من خلال الصفحة للكورسات المدفوعة المقدمة من سيو صح بإستخدام خدمة selz
  • الصفحة ما بيستخدموش البومات الصور, ولكن بينشروا بوستات بالصور ( أكتر من 400 بوست صور )
  • إجمالي عدد المتابعين : 16283 متابع
  • عدد المتفاعلين النشطين: 292 شخص
  • معدل زيادة المتابعين نسبة إلى الإجمالي حوالي 2% ومعدل الزيادة في المتابعين علي الأسبوع الحالي عن الأسبوع اللي قبله بنسبة حوالي 40%
    معنى كدة إن تقريباً الصفحة بتزيد من ناحية المتابعين من 162 إلى 320 متابع جديد أسبوعياً…
  • نظرة سريعة على البوستات الموجودة في الصفحة في آخر أسبوع, الصفحة نشطة وبتنزل بوستات بمعدل غير ثابت, لكنه في متوسط 6 بوستات أسبوعياً, معدلات التفاعل من ناحية اللايك للبوستات والشير عالي, الكومنتات مش كتير ويمكن تعتبر قليل بالمقارنة بباقي الصفحات من نفس التخصص ” الصفحات المتخصصة في الأونلاين ماركيتنج “

ثم نبدأ ندخل جوة التفاصيل بشكل أوسع, في البداية هنستخدم أداة Fanpagekarma.com لتحليل صفحة الفيسبوك لموقع سيو صح, وهنحدد التاريخ في آخر سنتين اللي هما فترة عمل الصفحة. ونضغط على Times & Types عشان نلقي نظرة

karma-choice

 

تحليل سريع للمحتوى على صفحة سيو صح:

  • إتنشر على صفحة سيو صح على فيسبوك 782 بوست
  • منهم 466 صورة وبتشكل نصيب الأسد حوالي 60% من بوستات الصفحة, متوسط التفاعل من المتابعين للصورة الواحدة 56 تفاعل.
  • ثم 171 لينك بنسبة حوالي 22% من إجمالي البوستات, متوسط التفاعل من المتابعين للينك الواحد 47 تفاعل.
  • ثم 62 فيديو يوتيوب بنسبة حوالي 8% من الإجمالي, متوسط التفاعل من المتابعين للفيديو الواحد 58 تفاعل.
  • و 83 بوست نصي بنسبة حوالي 10% من الإجمالي, متوسط التفاعل من المتابعين للبوست الواحد 69 تفاعل.

total-posts

 

  • أكتر الأيام نشاطاً في نشر البوستات للصفحة هو يوم الجمعة, إتنشر فيه 161 بوست واللي بيمثل 20% من الإجمالي تقريباً
  • يليه يوم الأحد برصيد 116 بوست ونسبة 15% من الإجمالي تقريباً
  • ثم أيام الإتنين والأربع والخميس بين 102 بوست إلى 108 بوست بنسبة أعلى من 13% لليوم الواحد فيهم من الإجمالي.
  • وأقل الأيام نشاطاً في النشر هو يوم السبت, البوستات اللي اتنشرت في أيام سبت كانوا 83 بوست فقط, بنسبة 12% من الإجمالي.

seos7-posting-weekly

  • أكتر ساعات تم نشر فيها بوستات على صفحة سيو صح بين الساعة 10 بالليل إلى واحدة بعد منتصف الليل بتوقيت القاهرة… في أيام الأسبوع كلها ما عدا الأربع!
  • لكن الغريب والملفت للنظر, إن أكتر ساعة على الإطلاق إتنشر فيها بوستات كانت متأخرة عن التوقيت المعتاد, الساعة 2
  • إلى 3 بعد منتصف الليل بتوقيت القاهرة يوم الأربع من الأسبوع, واللي اتنشر فيه خلال الساعة دي 18 بوست بنسبة 2% تقريباً من إجمالي بوستات الصفحة…
  • وإن يوم الجمعة اللي يعتبر أكتر يوم بتنشر فيه الصفحة بوستات, بيكون معدل النشر في توقيت بدري شوية عن المعتاد, حيث إن في 16 بوست نزلوا يوم جمعة في حدود الساعة 5 إلى 6 المغرب بتوقيت القاهرة…

نبدأ نلقي نظرة على المتابعين والتفاعل مع البوستات دي:

المتابعين للصفحة, واللي عملوا أكتر من 7960 تفاعل مع بوستات الصفحة بين لايك وشير وكومنت, كان أفضل التوقيتات اللي بيتفاعلوا فيها مع البوستات هو يوم الجمعة بعد الساعة 6 مساءاً بتوقيت القاهرة ولحد الساعة 12 مساءاً بتوقيت القاهرة. واللي بيحقق معدل تفاعل أكتر من 70 تفاعل للبوست الواحد في التوقيت ده اللي نزل فيه 58 بوست من إجمالي بوستات الصفحة.

وأسوء الأوقات اللي بتقل فيها نسبة تفاعل المتابعين هي أيام التلات من بعد الساعة 12 منتصف الليل ولحد 6 الصبح, واللي بيحقق معدل تفاعل 35 تفاعل للبوست الواحد في التوقيت ده واللي نزل فيه 32 بوست من بوستات الصفحة.
ونشوف تأثير يوم الأربع الغريب على التفاعل, فنلاقي إنه من أفضل أيام اللي بيتفاعل فيه المتابعين خلال الأسبوع ويمكن ده عشان كترة البوستات فيه ونزولها في توقيت مختلف في بداية اليوم لكنه جامع بين الناس السهرانة وبين الناس اللي هتصحى الصبح تشوف البوست, حيث إنه بيحقق بين 66 إلى 82 تفاعل للبوست الواحد خلال ساعات اليوم كلها ما عدا الفترة بين 6 صباحاً حتى 12 الضهر.

المتابعين للصفحة عملوا أكتر تفاعلاتهم على الإطلاق في أيام الخميس من الأسبوع, حيث إنهم تفاعلوا من خلال الكومنتات واللايك والشير برقم يصل إلى 2196 تفاعل مختلف, ودي نسبة تصل إلى 27% من إجمالي التفاعلات في باقي الأيام.
وأقل أيام التفاعل على الإطلاق كانت أيام السبت, بإجمالي 870 تفاعل ونسبة 11% من إجمالي التفاعلات في باقي الأيام.

هننتقل بعدها إلى الزرار الخاص بتحليل محتوى الصفحة ” Content “

karma-content

واللي فيه هنلاقي الخلاصة عن التفاعل مع البوستات المختلفة على الصفحة:
seos7-posts

  • متوسط التفاعل من خلال زرار ” لايك ” حوالي لايك للبوست الواحد.
  • متوسط التفاعل من خلال التعليقات حوالي 14 تعليق للبوست الواحد.
  • متوسط التفاعل من خلال زرار ” شيير ” حوالي 5 شيير للبوست الواحد.

أما من حيث مضمون البوستات, من الواضح إن صفحة سيو صح بتحاول دايماً تلعب مع المتابعين بتوعها الألعاب اللي بيتم فيها طلب التفاعل من المتابعين بشكل مباشر CTA عشان يكسبوا الكورسات والدورات التدريبية اللي بتنشرها الصفحة…
أعلى البوستات من حيث التفاعل كانت بتعتمد على الطريقة دي في بدايتها, حيث إن معظمهما كانت في سنة 2013 وسنة 2014 ويمكن ده اللي سبب إنتشار الصفحة في الفترة دي بشكل قوي, ولكن واضح إن الصفحة بدأت ترجع للطريقة دي مرة تانية في 2015 حيث إن أعلى البوستات من حيث الشير كان في يوليو 2015, وهوا كمان محقق المرتبة التانية من حيث معدل التفاعل من خلال اللايك…

 

  • أعلى البوستات تحقيقاً للتفاعل من خلال لايك أو الإعجاب: 29 ابريل 2014, عدد المتابعين للصفحة وقتها كان 4691 متابع

مساء الخير , ببساطة سحب على كورس ماستر سيو نسخة مجانية لعضو واحد فقط الليلة ولمرة واحدة …لايك (Y) عشان تدخل السحب…

Posted by SEOS7 on Tuesday, April 29, 2014

 

  • أعلى البوستات تحقيقاً للتفاعل من خلال الكومنتات والتعليقات: 12 أغسطس 2014, عدد المتابعين للصفحة وقتها كان 6512 متابع

السؤال الأول وصاحب الإجابة الصحيحة هيكسب 20$ بمناسبة مرور سنة على إنشاء #سيو_صح السؤال هو :-أى إيرور يخبر جوجل أن ا…

Posted by SEOS7 on Tuesday, August 12, 2014

  • أعلى البوستات تحقيقاً للتفاعل من خلال الشيير والمشاركة مع الاصدقاء: 12 يوليو 2015 عدد المتابعين للصفحة وقتها كان 15261 متابع

• مسابقة الحصول على كورس STEP SEO •بمناسبة قرب إنتهاء شهر رمضان نقدم لكم مسابقة جديدةوالجائزة كورس STEP SEO بملفاته ا…

Posted by SEOS7 on Saturday, July 11, 2015

أما أعلى البوستات اللي حققت نجاح بدون CTA أو طلب للتفاعل, والمفاجأة كانت إن منهم اتنين بوست نصي فقط بدون صورة أو لينك, وإنهم لم يكونوا لينكات تعليمية أو محتوى في صلب موضوع الصفحة:

  • التفاعل من خلال لايك: 12 يوليو 2015, عدد المتابعين للصفحة وقتها 15296 متابع

كيف تحصل على 10 مليون زيارة شهرياً دراسة حالة أجنبية قريباً على سيو صح (Y)

Posted by SEOS7 on Sunday, July 12, 2015

  • التفاعل من خلال كومنت: 12 مايو 2014, عدد المتابعين للصفحة وقتها 4778 متابع

 

لأن لكم حق على فى المعلومة , سأطرح عليكم بشكل سريع الأسباب التى إستدعتنى للإعتذار عن حضور ما يُسمى بـ ” قمة الأفيلييت ال…

Posted by SEOS7 on Monday, May 12, 2014

 

  • التفاعل من خلال شير: 27 يونيو 2015, عدد المتابعين للصفحة وقت نشر البوست 14772 متابع

 

7 نصائح للصعود بمقالتك للصفحة الأولى خلال 21 يوم !• عنوان مقالتك يجب أن يبدئ بالكلمة المفتاحية المستهدفة• إنشئ مقالة…

Posted by SEOS7 on Saturday, June 27, 2015

ملحوظة هامة: أعلى البوستات التي حققت تفاعل دون طلب التفاعل CTA على صفحة سيو صح كان بوست نشر كورس مجاني كصدقة جارية على روح والد صاحب الصفحة أحمد عزت لكني إستبعدته من الإحصائيات السابقة, لو كنت بتقرأ الجملة دي, أتمنى إنك تقرأ له الفاتحة وتدعو له.

لتحميل قائمة البوستات المنشورة في سيو صح مع تفاصيل التفاعل والتواريخ ونوع البوست وعدد متابعين الصفحة وقتها إضغط على الجملة دي

لو حابب تشوف أي بوست منهم على فيسبوك, إنسخ الرقم المكتوب في خانة Post_Id وحطه في نهاية الرابط التالي بعد posts/ :
https://www.facebook.com/SeoS7.Official/posts/

أما عن أكتر الكلمات والمفردات اللي بتتكرر في بوستات سيو صح:
seos7-keywords

أكتر الهاشتاجات المستخدمة في بوستات سيو صح:

seos7-hashtags

أكتر اللينكات اللي بتتشير على سيو صح بتكون من:
aeoa7-domains

متوسط طول البوستات اللي بتنزل على صفحة سيو صح بيختلف حسب نوع البوست, ودي ملاحظة مهمة جداً:

  • متوسط طول بوستات الفيديو حوالي 30 كلمة, بين 200 إلى 300 حرف, وحوالي 3 سطور.
  • متوسط طول بوستات الصور حوالي 70 كمة, بين 350 إلى 450 حرف, وحوالي 5 سطور.
  • متوسط طول بوستات اللينكات حوالي 65 كلمة, بين 300 إلى 350 حرف, وحوالي 4 سطور.
  • متوسط طول بوستات التكست العادية, حوالي 150 كلمة, بين بين 800 و 900 حرف, حوالي 11 سطر.

في حين إن أعلى البوستات تفاعل على صفحة سيو صح, اللي بتكون أقل من 25 كلمة, 110 حرف, وحوالي 3 سطور.

هنبص بصة على اللي موجود في الأوبشن الخاص بعرض مجموعة من المؤثرين في صفحة الفيسبوك اللي بتحللها… والأوبشن ده هتلاقيه تحت زرار ” Influencers “

karma-influncers

من خلال الأوبشن ده بتقدر تستعرض قايمة بأكتر المتابعين نشاطاً وتفاصيل نشاطهم داخل الصفحة, فايدة إنك تعرف مين الناس المؤثرين أو النشطين داخل الصفحة إنك ممكن من خلال بروفايلاتهم – اللى تقدر توصلها من خلال فيسبوك بالبحث عن اسمائهم ومطابقة الصور – إنك تعرف طبيعة المستخدمين اللي بيتعاملوا مع الصفحة, وتجمع معلومات عنهم أكتر تساعدك في إستهداف الشريحة المتابعة للصفحة دي بعد كدة, كمان بتقدر تعرف من خلال البوستات اللي بيتفاعلوا معاه أكتر نوع بوستات بيعجب المتابعين الأكتر ولاءاً للمجال اللي بتتكلم فيه الصفحة 😉

تطبيق الاوبشن ده على صفحة سيو صح, ودانا للنتيجة التالية:
influ-seos7

نسب التواجد الجغرافي لجمهور صفحة سيو صح:

  • 52% من مصر ” 8388 متابع “
  • 20% من المغرب ” 3197 متابع “
  • 7% من الجزائر ” 1070 متابع “

8-7-2015 7-40-49 AM

ومن أهم المعلومات اللي هتعرفها من خلال المنطقة دي, هي كام مرة بيرجع المتابعين للتفاعل مع محتوى الصفحة من جديد؟

بمعنى آخر, إذا المتابع ساب النهاردة كومنت أو داس لايك أو عمل شيير, هل بيرجع مرة تانية ولا لأ؟ ولو بيرجع تاني… فكام مرة بياخد تفاعل بعد كدة؟
وده مؤشر مهم جداً في صفحات المجتمعات او ال community لتوضيح مدى فعالية الكوميونتي ده ومدى اهتمام متابعينه بيه, وفي نفس الوقت ممكن يديك مؤشر عن مدى نشاط المتابعين الفعليين والدائمين مقارنة بالعدد الإجمالي…

بتطبيق ده على صفحة سيو صح, كانت النتيجة:

  • 60% من المتابعين يتفاعلوا لمرة واحدة فقط ولا يعودوا للتفاعل.
  • 20% من المتابعين يعودوا للتفاعل مرة تانية.
  • 6% من المتابعين يتفاعلوا أكتر من مرتين.
  • 5% من المتابعين يعودوا للتفاعل أكتر من 3 مرات.
  • 9% من المتابعين يتفاعلوا أكتر من 4 مرات وحتى 8 مرات!

seos7 Fan-Retention

بعد كدة, هنروح على القائمة ” History & Benchmarking ” وهنبدأ نقسم الفترة اللي هندرسها إلى Quarters ” ربع سنة أو 3 شهور “

seos7 history

نبص بصة على معدل الزيادة في المتابعين, ونحاول نتوقع مصادر الزيارات دي واسبابها, وهل في حاجة حصلت أدت لإرتفاع مفاجىء في وقت معين؟

عشان تقدر تشوف التغيرات كويس في معدل الزيادة في المتابعين حاول تقسم الخطوات إلى فترات زمنية قصيرة, أسابيع أو شهور, عشان تقدر تلاحظ القفزات في معدل الزيادة…

هنبدأ من شهر يوليو 2014 وحتى سبتمبر 2014 ونعتبره أول كوارتر هنشتغل عليه:
seos7-benchmark

الكوارتر بدأ بحوالي 5500 متابع وانتهى بحوالي 7300 متابع, معدل زيادة هادىء وثابت, ما عدا إرتفاع بسيط بعد يوم 11 يوليو, ولكنه غير ملفت للدرجة…
معدل الزيادة حوالي 20 متابع جديد يومياً.

الكوارتر التاني, من شهر أكتوبر 2014 وحتى ديسمبر 2014:
seos7-q2

كوارتر هاديء جداً, زيادة ثابتة ومستقرة ما عدا بعض الايام اللي فيها تغيير بسيط جداً, بدأ بحوالي 7300 متابع وانتهى بحوالي 8600 متابع..
معدل الزيادة حوالي 14 متابع يومياً, أقل من الكوارتر اللي قبله…

الكوارتر التالت, من شهر يناير 2015 وحتى مارس 2015:
seos7-q1-2015

هنا هنلاقي مفاجآت كتير في الكوارتر ده, الي بدأ بحوالي 8600 متابع وإنتهى بحوالي 11 ألف متابع, بمعدل زيادة غير ثابت يومياً تماماً…
وأربع قفزات تم تحقيقها خلال التواريخ:
من 9 إلى 11 يناير 2015, حوالي 230 متابع جديد.
من 3 إلى 11 فبراير 2015, حوالي 600 متابع جديد.
من 14 إلى 18 فبراير 2015, حوالي 350 متابع جديد.
من 26 إلى 28 فبراير 2015, حوالي 250 متابع جديد.

ودي دعوة للرجوع والتدقيق في البوستات والأحداث اللي حصلت في التواريخ دي لتحديد إذا كانت سبب الزيادات دي من إعلانات مدفوعة أو فيسبوك حط الصفحة ضمن الصفحات المقترحة ولا محتوى إنتشر بشكل كبير ” فايرال Viral ” أو مؤثرات خارجية زي المشاركة في الإيفنتات أو الدعوات من الأصدقاء وغيرها… إلخ

هنراجع قائمة البوستات لصفحة سيو صح

seos7-growth

نلاحظ إن في كل التواريخ اللي حصل فيها إرتفاع مفاجىء في معدلات المتابعين في الصفحة, ماكنش في محتوى أصلاً… أو إن المحتوى الموجود مش محقق معدلات تفاعل عالية, بالعكس يمكن تكون أقل من معدلات التفاعل المعتادة…

بالتالي أكيد سبب الإرتفاع مش إعلانات مدفوعة ” لأن أكيد ما حدش هيعمل إعلانات من غير محتوى – خاصة لو كان حد متخصص – ومش كونتينت إنتشر بشكل كبير, الإحتمال الأرجح وجود مؤثر خارجي سبب ده

ملحوظة جانبية: إكتشاف المؤثرات الخارجية شيء مرهق وبيتطلب وقت طويل ومجهود كبير… هنتكلم عن أدواته وتفاصيله في مقال آخر… ولكن حتى وقتها, ببساطة لازم تراجع التوقيت وكل العوامل الخارجية المحيطة بالموضوع وتبحث وتراقب الوضع كأنك كنت موجود وقتها عشان تعرف تتبع المؤثر الخارجي وتوجده بالتفصيل… وأحياناً ممكن تفشل في ده لأنه ممكن يكون دعوة من احد متابعين الصفحة مثلاً تمت في هدوء! أو يكون فيسبوك بدأ يظهر الصفحة في ال suggestions مثلاً.. أو أحداث حصلت على الأرض مالهاش أثر تتبعه أونلاين….

ندخل في الفترة الأخيرة, من شهر ابريل 2015 وحتى مايو 2015:
seos7-q4-2015

الفترة دي غريبة جداً!
في إرتفاع مفاجىء وضخم بين 16 إلى 18 ابريل, حوالي 600 متابع في يومين!
ثم إنخفاض في المتابعين ” unlikes/removed ” بين 25 الى 26 ابريل, حوالي 100 متابع بالسلب!
ثم ارتفاع من 4 إلى 6 مايو بحوالي 200 متابع…
وانخفاض آخر من 6 إلى 7 مايو بالسلب.
ثم ارتفاع من 23 إلى 24 مايو بزيادة كبيرة حوالي 170 متابع في يوم واحد…

هنراجع تاني قائمة البوستات لصفحة سيو صح

ونلاحظ نفس الملاحظة, مافيش محتوى في الأيام اللي فيها تغيرات فجأة على معدل الزيادة في المتابعين, ونرجع لنفس السبب إن يكون عوامل خارجية…

ملحوظة هامة: إفتكر في الجزء الأول لما إتكلمنا عن أهمية معرفة الشخص أو المؤسسة اللي ورا الشغل اللي بنحلل تحركاته أونلاين؟ فاكر لما قولنا إن في سنة 2015 الأشخاص أوقات بيكونوا أقوى من المؤسسات؟
راجع من هنا: تحليل ودراسة مواقع الإنترنت – تجربة عملية على موقع سيو صح

في الوقت ده, لازم تفكر تراجع بروفايل صاحب الموقع نفسه أو القائمين عليه لمعرفة معلومات عن المؤثرات الخارجية المحتملة… في الحالة دي هيكون بروفايل أحمد عزت على فيسبوك

واللي منه هنكتشف بتوقع بسيط اسباب القفزات المفاجأة في المتابعين لصفحة سيو صح:
قفزات الربع الأول من سنة 2015 كانت نتيجة للمشاركة من أحمد عزت في فعاليات خاصة بالتدريب على الأرض, واللي كان ليها إنعكاسها المباشر على صفحة سيو صح للمهتمين بمتابعة المواضيع المتخصصة اللي بيقدمها أحمد من خلاله.
أما القفزات المتتالية في الربع التاني من سنة 2015 كانت نتيجة للمشاركة من أحمد عزت في أكتر من فعالية على الأرض خاصة بالتدريب, والمشاركة في مبادرات وفعاليات مختلفة أونلاين خاصة بالتجارب المتخصصة والمشاركة مع عدد مختلف من الأشخاص المؤثرين في نفس المجال والتعاون بينهم في تقديم أعمال مشتركة, واللي كان لها إنعكاس مباشر برضه على صفحة سيو صح من الناس اللي عرفت أحمد نفسه جديد وحبت إنها تتابع الفعاليات وال initiatives اللي بيشارك فيها…

واللي هيخلي التوقع ده أقرب للواقع, إن في الشهرين التاليين, معدل الزيادة في المتابعين رجع لمعدل زيادة مستقر – حوالي 35 متابع جديد يومياً – في شهر يوليو ويونيو 2015, وبعد إنتهاء كل الفعاليات اللي كان بيشارك فيها أحمد عزت….

آخر جزئية هنتكلم فيها ضمن الجزء ده, هوا محاولة توقع مدى فعالية الصفحة اللي بندرسها في تحويل الزوار إلى موقع الإنترنت الخاص بيها. Conversion
أو معدل الضغط على الروابط مقارنة بمعدل الوصول للمتابعين. Clicks

لمحة جانبية: معظم الصفحات بتستخدم مواقع وسيطة لإختصار الروابط – خاصة المواقع العربية – وده عشان يعرض الروابط بشكل اكتر احترافية على الشبكات الإجتماعية, بدون ما يضر تركيبة الروابط في موقعه نفسه, وأوقات من أجل معرفة إحصائيات الضغط على الروابط..

إنتا كشخص بيبحث وبيحلل شغل الصفحة دي, تقدر إنتا كمان تعرف عدد الزيارات اللي بتحصل على اللينكات اللي بتنزلها الصفحة – لو بيستخدموا إختصار اللينكات – وده ببساطة عن طريق إنك تنسخ الرابط المختصر copy , وتحطه paste في مكان عنوان الموقع في متصفح الانترنت عندك, وتضيف عليه علامة ( + ) ثم تضغط إنتر!

شوف الصورة دي:
link-details

وده اللينك اللي موجود في البوست ده:

بمناسبة مرور #عامين_على_سيو_صح (Y)كورس STEP SEO بسعر 50 دولار بدلاً من 150 دولار ! أفضل عروض الخصم التى تم طرحها منذ إ…

Posted by SEOS7 on Wednesday, August 5, 2015

والنتيجة اللي هيوصلك ليها الخطوة دي, هي معرفة عدد الضغطات اللي حصلت على اللينك ده لما نزل على الصفحة, ومجموعة من المعلومات التانية المهمة كمان عن مستخدمي الصفحة اللي ضغطوا على اللينك, زي نوع متصفح الانترنت, والجهاز اللي بيستخدموه. واللي ممكن يساعدك في دراسة وفهم الشريحة الموجودة في الصفحة دي.

دوس هنا مثلاً: http://goo.gl/6gnfCi+ وشوف النتيجة

link-clicks-seos7

 

للأسف إنتا ما تعرفش نسبة وصول البوست للمتابعين قد ايه Reach لكنك دلوقتي تعرف الوقت اللي نزل فيه البوست, وعدد الضغطات على الرابط… ومنهم تقدر تفهم البيج دي تقدر تحول كام زاير يومياً إلى موقع إنترنت, ومدى فعالية المشاركين فيها واهتمامهم بالروابط الخارجية…

وبكدة, نبقى وصلنا لآخر الجزء ده من تحليل إحصائيات الفيسبوك وتحليل التحركات من خلال الشبكات الإجتماعية, مع التطبيق على صفحة سيو صح.

دلوقتي دورك تطبق على البيزنس الخاص بيك, أو على المنافسين ليك, وتبدأ تستغل المعلومات اللي هتستكشفها في تحسين وتطوير ادائك وتحركاتك التسويقية المستقبلية من خلال فيسبوك 😉

الأدوات اللي إستخدمناها في التقرير ده: Fanpagekarma.com
قايمة الأدوات المشابهة واللي ممكن تكون أفضل وأكتر تطوراً من اللي استخدمناها هنا, واللي ممكن تستخدمها في تحليل التحركات والإحصائيات من خلال الشبكات الإجتماعية:


شكراً لوقتك جداً,
أكيد تعبت بعد قراية الكلام والأرقام دي كلها, دلوقتي تقدر تدوس شيير وقول رأيك في المقال ده وإنتا بتشيره, أو قول الحاجات اللي محتاجة توضيح أكتر أو شايف إنها محتاجة تعديل عشان نطور التقرير أكتر وأكتر.
وبعدها ترتاح شوية وتشرب كوباية شاي وتيجي تطبق على الصفحة بتاعتك أو على المنافسين.

Facebooktwittergoogle_plusredditpinterestlinkedinmail

9 نصايح للحصول على زيارات أكبر لموقعك من خلال فيسبوك

إنك تنشر لينكات من موقعك على صفحتك في فيسبوك مش كفاية عشان تاخد أكتر زيارات للموقع, عشان تجيب ترافيك لموقعك من خلال فيسبوك لازم تركز على مجموعة من العوامل الأساسية اللي بتأثر بشكل أساسي في ده.
إن الناس تعمل شيير أو لايك هي من العوامل المهمة.. لكن ده برضه مش كفاية,
لازم تفكر في الطرق اللي بيها تقدر ترفع معدلات الضغط على اللينكات من خلال فيسبوك ( CTR ) وتتعامل مع كل لينك على إنه إعلان كامل, محتاجله تصميمه الخاص ورسالته الإعلانية بالتفصيل, مع تطوير طريقتك في العرض اللي تتناسب مع الروح الإجتماعية لموقع فيسبوك اللي بتنشر عليه اللينك بتاعك. هوا إعلان كامل لكنه إعلان مجاني!

فكر فيها وجربها… إنتا ممكن تنشر نفس اللينك على صفحتك بأكتر من طريقة من حيث طريقة العرض والصورة والعنوان والوصف والكلام المكتوب مع اللينك نفسه, وكل طريقة منهم تقيس عدد الزيارات اللي وصلتك منها, إيه النتيجة؟ هتحقق متوسط كليكات وزيارات مختلفة عن التانية أكيد!
وإنتا بتقيس النتايج, ما تقيسش إجمالي الزيارات اللي جاتلك, ولكن فكر في عدد اللي شافوا اللينك مقارنة بعدد اللي داسوا عليه. الكليكس على الريتش في 100 Clicks/Reachx100
على سبيل المثال: البوست الأولاني وصل لألف شخص وداس على اللينك اللي في البوست 200 شخص. في الحالة دي معدل الضغط = 20%
مثال البوست التاني: وصل لألفين شخص وداس على اللينك اللي في البوست 1000 شخص. في الحالة دي معدل الضغط = 50%

ملحوظة جانبية: المعدلات العالمية للضغط على اللينكات من خلال فيسبوك من خمسة إلى سبعة في المية. بمعنى إن لو البوست بيوصل لألف شخص, وداس منهم 50 إلى 70 شخص يبقى إنتا كدة ماشي مع المعدل الطبيعي.

بناءاً عليه, يبقى أهمية معدل الضغط على الرابط CTR يعتبر أهم بكتير من معدل الوصول نفسه Reach… لأن مافيش فايدة إنك تحقق معدل وصول عالي لكن بدون ضغطات!

يالا بينا, خلال النقط الجاية دي هنتكلم عن شوية حاجات تعلي معدل الضغط على اللينكات والبوستات بتاعتك عشان تحصل على أعلى ضغطات ممكنة من خلال فيسبوك:

1- أطلب من المتابع بتاعك يدوس على الصورة: الكول تو أكشن ( CTA )

الصفحة الرئيسية لفيسبوك عندك فيها عشرات البوستات المختلفة من أصحابك ومن باقي الصفحات اللي انتا متابعها والإعلانات وغيرها, وكتير منها بيكون عبارة عن صورة أو فيديوهات ” على الأقل بنسبة 65% في سنة 2015 من الهوم على فيسبوك عبارة عن صور وفيديو ”
معنى كدة إن اللينك بتاعك هيكون في تحدي شرس مع باقي الصور والفيديوهات اللي ظاهرة للمتابع بتاعك.. وعشان تكسب التحدي ده, لازم تضيف زرار أو حاجة تدعوه للضغط, حتى لو فكرت بالشكل التقليدي وضيفتله زرار بسيط على الصورة وعليه كلمتين تقليدين زي: ” إضغط هنا ”
قارن بين الصورتين دول:
بحوث التسويق

يا ترى أي من الصورتين قابلة للضغط أكتر؟ أكيد اللي فيها زرار ” دوس هنا وأعرفها! ”

لمحة جانبية: نسبة كبيرة من الناس لو شافت كل تفاصيل الصورة وهي صغيرة ” حتى لو حلوة ” مش هيكليك على الصورة عشان يشوفها بحجم أكبر, الإعتماد بس على إن الصورة تكون حلوة مش كفاية… لازم تفهمه إن الصورة دي بيتداس عليها عشان يدوس!
ملحوظة كمان: الصور اللي عليها زرار CTA بتاخد ضغطات أكتر بنسبة 14% عن نفس الصور اللي بتتضاف بدون CTA

على صعيد آخر: ليه تطلب طلب واحد لما ممكن تطلب طلبين؟
الصورة مكتوب فيها إنك تدوس على اللينك, ليه ما يكونش في البوست نفسه إنتا كاتب إنك لو عجبك البوست تدوس شيير مع صحابك؟
الحاجات اللي بتطلبها من المتابعين بتوعك بتعلي إمكانية حدوثها, ممكن ناس تشوف اللينكات بتاعتك وتدوس عليها وتعجبها لكن ما يجيش في بالها إنها تعملها شيير, لو طلبت منهم يعملوا شيير ده هيعلي فرصتك في الوصول لناس أكتر.

2- قول رأيك الشخصي حوالين اللينك اللي بتنشره, أو إدي المتابعين إيحاء إنك بتقولهم رأيك!

أكيد لازم تكتب بوست أو كلام معين مع اللينك وانتا بتشيره, لأنك لو شيرته بدون أي كلام بيفقد على الأقل 18% من قدرته على الوصول للمتابعين لصفحتك!
ولكن إزاي تكتب الكلام المناسب وانتا بتشير لينك عاوز ياخد أعلى كليكات من فيسبوك؟
الشبكات الإجتماعية من إسمها ” إجتماعية ” فكل شيء بيدور حوالين الحوار وتبادل الآراء ووجهات النظر غالباً خاصة في صفحات فيسبوك الخاصة بقضية معينة أو بإهتمام معين ” Community ”
بالتالي إنك تضيف مع اللينك شوية كلمات عن رأيك الشخصي في اللينك اللي بتشيره أو تلمح لده, بيدي فرصة لمتابعينك إنهم هما كمان يبقوا مهتمين بتكوين رأيهم الخاص حوالين اللينك ده, وده بيدفعهم أكتر للضغط…
قارن بين الصورتين دول:
share-thoughts

يا ترى أي من الصورتين قابلة للضغط أكتر؟ أكيد اللي فيها رأيي الشخصي عن المقال!

لمحة جانبية: في ناس كتير بتفتكر إنك لما تكون بتتكلم بإسم براند يبقى لازم تتكلم كأنك واقف على المسرح وكأن الشركة نفسها اللي بتتكلم, ولكن في فيسبوك وفي عالم الشبكات الإجتماعية الوضع مختلف كتير عن باقي قنوات التواصل, لازم على الشبكات الإجتماعية تضفي على الأمور لمسة آدمية وتخلي الأمور تبدو موجهة بشكل شخصي من شخص إلى التاني.
ملحوظة كمان: اللينكات اللي بتضيف في البوست بتاعها كلام يعبر عن رأيك الشخصي عن محتوى اللينك بياخد ضغطات أكتر بنسبة 8% عن نفس اللينكات اللي بتتضاف بدون إبداء رأيك عن المحتوى.

على جانب آخر, فكر في إستخدام ال feelings وإنتا بتنشر اللينكات للتعبير عن الموود العام للمحتوى ده ورأيك فيه, شوف المثال التالي:
العلامة التجارية المؤثرة

3- ألوان الصورة مهمة جداً! وفي فيسبوك الوضع مختلف تماماً عن مانتا متخيل…

حقيقة علمية: ألوان الصورة بتأثر كتير على جذب العين في اللقطة الأولى, وتخلي المستخدمين للموقع يقفوا قدام الصورة للحظة وسط ما هما بيعملوا سكرولينج للموقع سواء من الكمبيوتر أو الموبايل!

ولكن الألوان اللي بتجذب العين ممكن تكون بتختلف من شخص لآخر, أو بمعنى أدق, من مجموعة لمجموعة… لازم تعمل شوية تجارب في البداية لمجموعة من اللينكات بإستخدام صور من درجات معينة في يوم معين, وتدرس معدل الكليكات في اليوم ده مقارنة بمعدل الوصول, وبعدها تجرب في يوم تاني نفس اللينكات في نفس معدل الوصول ولكن بإستخدام صور درجات ألوانها مختلفة…
لحد ما تعرف أفضل درجات ألوان بيفضلها المجموعة المتابعة لصفحتك واللي بتحقق معاهم أحسن معدل تحويل conversion rate او اعلى معدل ضغطات على اللينكات CTR

كمان تصميم الشبكة الإجتماعية نفسها وألوانها الغالبة هتكون معامل أكيد ومؤثر في درجات الألوان اللي هتستخدمها في الصور…
من تجاربي مع فيسبوك, الوضع مختلف تماماً عن باقي الشبكات الإجتماعية…
من المفترض في كل الشبكات الإجتماعية إن أزرار ال CTA اللي اتكلمنا عنها في النقطة رقم 1 تكون بألوان ظاهرة شوية ومميزة وبحجم كبير, وتكون الصورة نفسها بألوان هادية شوية… أو العكس, إن الصورة نفسها تكون ألوانها فاقعة وقوية وال contrast بتاعها عالي جداً عشان تكون ظاهرة بشكل بارز وسط تصميم الشبكة الإجتماعية وتلفت النظر بالتالي تاخد أعلى كليكس..
لكن في فيسبوك, الوضع مختلف شوية – حسب التجارب – كل ما كانت الصورة ممتزجة أكتر مع تصميم الفيسبوك نفسه كل ما كان معدل الضغط على الصورة أعلى, أكتر الصور اللي بتاخد ضغطات هي الصور اللي غالب عليها اللون الأبيض والرمادي والأزرق من درجات زي #4c66a4 … وكل ما كانت الصورة بسيطة وهادية كل ما كانت الكليكات عليها اعلى اكتر…

قارن الصورتين الجايين وتخيلهم على فيسبوك:
colors

إذا كنت متخيل إن الصورة اللي على اليمين هتحقق كليكات أكتر, تبقى محتاج تجرب بنفسك!

ملحوظة هامة: إتباع الألوان البيضا والرمادي مع الأزرق في الصور اللي بتشيرها على فيسبوك مع اللينك, بيرفع معدل الضغط بشكل عالي جداً بيتراوح بين 16% إلى 28% .

4- إستخدم بروتوكولات فيسبوك open graph

لو كنت ما تعرفش فيسبوك أوبن جراف, فهي مجموعة من اكواد meta اللي بتتحط في منطقة ال head في موقعك عشان توصف المحتوى وتسهل على فيسبوك إنه ينشر اللينكات بتاعتك بالشكل المفضل ليك – إستعين بمطور مواقع أو إستشير مصمم ويب في النقطة دي لو ما عندكش الخبرة الكافية.
لو كنت لسه ما بتستخدمش فيسبوك أوبن جراف في موقعك, لازم تبدأ من دلوقتي حالاً إستخدامه!
لأن الناس اللي هتشير اللينكات بتاعتك على فيسبوك ممكن تكون بتشير اللينك بشكل مش حلو, ما يحققش زيارات بشكل كويس, وانتا بتخسر الشيرز دي على الفاضي!

قارن بين الصورتين الجايين, اللي على الشمال هوا شكل اللينك لما يتشير من غير أكواد open graph :
open-graph

لاحظ:
open graph بيستخدم عشان تقول لفيسبوك معلومات الصفحة الاساسية, ومن اهمهم النقط دي:
أ- صورة اللينك لما حد يشيره هتكون إيه؟
ب- عنوان الصفحة.
ج- وصف الصفحة ” الكلام اللى تحت العنوان ”
د- مين كاتب الصفحة أو الصفحة الرسمية على الفيسبوك.

من التجارب, إستخدام open graph كان أكتر حاجة حققت نجاح في رفع معدلات الضغط على اللينكات والحصول على ترافيك أعلى من فيسبوك, حوالي 38% إرتفاع في معدلات الضغط من اللينكات اللي الناس بتشيرها من الموقع بعد إستخدام فيسبوك open graph بطريقة صحيحة.

5- وقت نشر اللينكات ومعدلات النشر:

التوقيت اللي بتنشر فيه اللينكات تحديداً لازم يكون مدروس بنسبة كبيرة, لازم يكون وقت مناسب للمتابعين ليك إنهم يكونوا في الموود والحالة المزاجية المناسبة اللي تخليهم يقروا مقال كامل مش مجرد إنهم يشوفوا اللينك ويقرروا يقروه بعدين أو يحسوا إنه مش وقته..
فكر إمتى بيكون المتابعين بتوعك قاعدين أونلاين بأكبر عدد, ومستعدين لقراءة المقال ده تحديداً أو الضغط على اللينك ده؟

لمحة جانبية: في مصر الضغط على اللينكات أعلى في نص الأسبوع – تحديداً يوم التلات – عن ايام الأجازات زي الجمعة والسبت, غالباً الأيام التلاتة اللي في نص الأسبوع في نهاية اليوم ” من الساعة 10 إلى 1 بالليل ” هي أحسن وقت تنشر فيه لينكات وتاخد أعلى كليكات, الإتنين والتلات والأربع. في حين إن باقي أيام الأسبوع بتاخد فيه البوستات كومنتات أكتر أو تفاعل من خلال زرار لايك أكتر من الكليكات. وابعد عن نشر اللينكات في أيام الأجازة والراحة الأسبوعية, زي الجمعة تحديداً.

اللمحة دي هي الوضع الغالب, لكن يمكن الوضع عندك مختلف بإختلاف الشريحة المستهدفة من المتابعين أو نوع المحتوى الموجود عندك…
من خلال فيسبوك insights تقدر تعرف أكتر وقت الناس عندك بيكونوا فيه أونلاين, وبشوية تجارب لنشر لينكات في ساعات مختلفة من اليوم وأيام مختلفة مع قياس معدلات الضغط على اللينكات في الأوقات دي, هتقدر تحدد الناس الموجودين عندك أفضل وقت ليهم إمتى اللي فيه بيكونوا مستعدين للضغط على لينكات موقعك وقراية محتواه.
كمان التجارب دي هتعرفك:
أ- أكتر وقت المتابعين بتوعك بيتفاعلوا من خلال الردود إمتى؟
ب- أكتر وقت المتابعين بتوعك بيعملوا فيه شيير للمحتوى بتاعك؟
ج- أكتر وقت المتابعين بتوعك بيدوسوا عشان يقروا المحتوى بتاعك؟
إستخدم google analytics كمان مع تحديد العرض للزوار بالساعة خلال أيام الأسبوع هيساعدك في إستكشاف الساعات والأيام الأمثل!

بعد ما تخلص تجاربك, وتعرف الأوقات الأمثل لنشر اللينكات بتاعتك على فيسبوك للمتابعين بتوعك, حاول إنك تلتزم بيه بعد كدة قدر المستطاع, لأن نشر لينك واحد يحقق أقصى نتايج أفضل من نشر 10 لينكات بشكل عشوائي بيحققوا نتايج ضعيفة!

ملحوظة هامة: دورة حياة المستخدم داخل الفيسبوك حوالي 3 ساعات في المرة الواحدة, بالتالي إنتا تقدر تنشر اللينك نفسه هوا هوا أكتر من مرة في نفس اليوم من غير ما تقلق إنه يكون مكرر, طالما فاصل بين المرة الأولى والتانية بمعدل 3 ساعات فهو هيظهر ناس مختلفة.

ملحوظة كمان: معدلات نشر البوستات ممكن تزوده عشان تجيب ترافيك أكتر لو كان المستخدمين بتوعك معدلات ضغطهم على اللينكات عالي, مثال صفحة اليوم السابع على فيسبوك, تقدر تنشر لينك كل 10 دقايق لأن متابعينها معدل ضغطاتهم عالية على اللينكات.

6- الإهتمام بالتفاعل, بالذات أول 5 ردود في أول 5 دقايق!

والمقصود بالتفاعل هنا تحديداً هي الردود والكومنتات, هل تعلم إن كل ما زادت الكومنتات في أول ما اللينك ينزل, كل ما ده زود الكليكات على اللينك بتاعك؟
وبمجرد ما المتابعين بتوعك يسيبوا كومنتاتهم على البوست, لازم ترد على الكومنت بأسرع وقت ممكن… لأن ده بيعلي من ثقل البوست نفسه post weight كمان بيديله أولوية ظهور أكبر, وباقي المتابعين لما بيلاقوا ردود من ناس تانية على اللينك, ده بيثير فضولهم إنهم يدوسوا هما كمان على اللينك ويشوفوا في ايه بيحصل!
الرد على كل كومنت بينزل على اللينك بتاعك بيعلي الكليكات بمعدل حوالي 9% وخلي دايماً ردودك بتفتح الطريق لمزيد من التعليقات, لأن كل ما زادت التعليقات كل ما زادت الكليكات على اللينك بتاعك, بالتالي إنتا الكسبان…
تفاعل مع المتابعين بتوعك, فيسبوك شبكة إجتماعية ولازم تكون إجتماعي, أوعى تنسى ده.
وإبداء المتابعين رأيهم في اللينك اللي بتنشره يرجعنا للنقطة رقم 2, كل ما كان في آراء تثير فضول المتابعين للضغط على اللينك كل ما زاد معدل الضغط عليه.

ملحوظة جانبية: في أول 5 دقايق من نشر اللينك, فيسبوك بيحاول يحدد أهمية البوست نفسه كإجمالي وأولويته في الظهور وسط ال news feed لباقي المتابعين, الإهتمام بالدقايق الاولى شيء بالغ الأهمية… من التجارب, البوستات اللي بترد على الكومنتات بتاعتها في أول 5 دقايق بشكل سريع بتحقق معدلات وصول أعلى وكليكات أعلى بحوالي 11%

7- طول الجملة اللي بتتضاف مع اللينك وعدد كلماتها.

زي ما وضحت في النقطة رقم 2 إنتا محتاج تكتب بوست مع اللينك تقول فيه رأيك, لكن هل تعتقد إن طول البوست بيفرق؟

حسب كل التجارب, كل ما كان الكلام اللي هتكتبه وانتا بتشير البوست أقل كل ما كان أحسن, في تقسيمات للبوستات على الشبكات الإجتماعية عموماً من ناحية عدد الحروف ونسبة التفاعل مع طول البوستات:
قصير جداً : من 0 إلى 40 حرف.
مختصر: من 41 إلى 70 حرف.
متوسط: من 71 إلى 100 حرف.
مثالي: من 101 إلى 140 حرف.
طويل: أكتر من 141 حرف.

على فيسبوك, الوضع الأمثل هوا إن البوست يكون ” متوسط ” من 71 إلى 100 حرف, خاصة مع كترة إستخدام فيسبوك من الموبايل, ماحدش عنده القدرة إنه يقرا كتير في المقدمات, كمان كل ما كانت المقدمة مختصرة ومباشرة وجذابة وتثير الفضول كل ما ده أدى إلى كليكات أكتر.
حاول تلتزم بأقل من 100 حرف ” يتضمن المسافات والعلامات ” ده هيجيبلك تفاعل أعلى بنسبة تصل إلى 66% أعلى من البوستات اللي أكتر من 141 حرف. بالتالي كليكات أكتر بنسبة ما تقلش عن 15%

8- إستخدم الإيموشنز وبخاصة اللي بتظهر كويس على الموبايل emoji

إنتا في شبكة إجتماعية زحمة جداً, إنك تلفت النظر شيء مهم عشان تكسب اليوزر اللي بيقعد يعمل سكرول يدور على حاجة تعجبه وسط النيوز فيد عشان يتفاعل معاها او يقراها او يشوفها.
إستخدام الايموجي أو الرموز التعبيرية بالذات السائدة والمستخدمة بكثرة على الموبايلات هتعلي الكليكات على اللينكات بتاعتك بشكل لا تتوقعه, لأنها هتلفت النظر في البداية, وبعدين هتضفي على اللينكات بتاعتك روح اكتر إجتماعية تخلي المتابعين يدوسوا وهما عندهم إحساس مسبق ناحية المقال..
شوف المثال ده:
إزاي تخلق حالة

لمحة جانبية, لو عاوز تستخدم الايموجي الخاصة بالموبايل ومش عارف تجيبها وانتا على الكمبيوتر, إستخدم الموقع ده للبحث وإستخدام الرموز التعبيرية زي ما تحب getemoji.com وما تقلقش لو ظهرتلك في شكل مربع كود, خد المربع ده كوبي وبيست وهينزل في البوست عادي شكله مربع لكنه من الموبايل هيبان بشكل الرمز التعبيري المقصود..

9- عنوان اللينك, أخطر شيء!

شوف الفيديو ده الأول:

لو ما اشتغلش معاك الفيديو, جرب من اللينك ده:
https://www.facebook.com/a.samy/videos/10155926929605430/

بعد ما شوفت الفيديو ده خليك فاكر, نفس المعنى ولكن بكلمات مختلفة…. ده شيء لازم تفكر فيه مليون مرة قبل ما تنشر أي لينك على فيسبوك… إزاي تستخدم الكلمات المهمة اللي بتأثر في المتابعين بتوعك وبتشد إهتمامهم وبتخليهم يتفاعلوا أكتر ويدوسوا أكتر على النوعية دي من اللينكات, وتخلي عنوان المقال بتاعك بيتضمن الكلمات دي…
ممكن تستخدم كمان الايموجي في عنوان اللينك, وممكن تحط في عنوان اللينك CTA
فكر كمان إنك ممكن تنشر اللينك مرتين بعنوانين مختلفين, وتقيس معدل الضغط على اللينك في كل عنوان نزلته…

عشان تعرف الكلمات المؤثرة في المتابعين بتوعك, راجع الزيارات اللي حصلت على موقعك من بدايته ولحد دلوقتي, مع تحديد المصدر فيسبوك, وشوف عناوين المقالات, غالباً هتلاقي بينها كلمة أو اتنين متشابهين في المعنى والمضمون, إعرف إن دي الكلمات الكسبانة وابدأ إستخدمها هي ومرادفاتها دايماً في عناوين المواضيع.
كمان من عناوين المواضيع اللي دايماً كسبانة مهما إختلف المجال اللي بتتكلم عنه:
أ- الإختبارات والألعاب اللي بتتضمن الأسئلة وتحديد الشخصية Quizzes
ب- صيغة أفعل + رقم ” زي: أفضل 10 كذا كذا أو أكبر 7 كذا كذا ”
ج- الحاجات المتعلقة بالأكشن والدراما, زي العناوين المتعلقة بالمصايب والكوارث والتعذيب – للأسف – ولكن تقدر تستخدمها بطريقة إنها كانت هتحصل لكن ما حصلتش.. أو يمكن كانت تحصل لو ما قريتش المقال ده 😉
د- العناوين اللي بتحكي قصة وبعدين تقف في نص القصة ” زي: هذا الرجل كان ينوي إحتلال شبرا ولكن بعد تدخل تلك المرأة شاهد ماذا حدث.. ”
هـ – الحاجات العلمية الصادمة اللي لا يصدقها عقل طبيعي, زي مثلاً ” إكتشاف جبل من اليورانيوم المخصب في الصحراء الغربية يعود إلى عهد الفراعنة ”

الأمثلة السابقة على قد ما تبان ما تنفعش غير في حالات معينة أو نوعية معينة من المحتوى, ولكن تقدر تعيد تهيئة عناوين لينكات موقعك عند نشرها على فيسبوك عشان تكون بنفس معانيها الموجود في مضمون النص ولكن بطريقة العرض المناسبة أكتر للنشر على فيسبوك والحصول على كليكات أكتر.

ملحوظة: عنوان اللينك اللي بتنزله على فيسبوك ممكن يوصل لحد سطرين مافيش مشكلة, ولكن أفضل شيء إنه يكون برضه لا يتجاوز 100 حرف وبحد أقصى 140 حرف, وحاول تبعد عن حروف الجر أو الكلمات اللي بتاخد مساحة على الفاضي.

الخلاصة:

المرة الجاية قبل ما تنزل لينك على صفحتك على فيسبوك للمتابعين بتوعك, راجع الأول النقط التسعة اللي إتكلمنا عنهم هنا:
1- الكول تو أكشن.
2- قول رأيك الشخصي في البوست وانتا بتشير اللينك.
3- خلي ألوان الصورة اللي هتستخدمها مايل للأبيض بشكل أكبر مع الرمادي والازرق ” وأوقات الموف بيظبط ”
4- راجع الديفولبر وإتأكد إنك بتستخدم facebook open graph بشكل صحيح وكامل
5- إعمل تجارب وتحليل للوقت الأمثل اللي تنزل فيه اللينكات.
6- إهتم بالكومنتات وما ترميش اللينك وتمشي.
7- خلي البوست اللي نازل مع اللينك ما يزيدش عن 100 حرف.
8- إستخدم الرموز التعبيرية والايموجي.
9- عنوان اللينك لازم يتضمن الطريقة اللي تجيبلك أعلى كليكات ” نفس المعنى ولكن كلمات تانية ”

دلوقتي بقى معاد التطبيق العملي, شيير المقال ده عندك وطبق فيه الحاجات دي, وما تنساش تعملي منشن 😉

Facebooktwittergoogle_plusredditpinterestlinkedinmail

10 دروس مستفادة من فيديو مارك زوكربيرج الأخير عن مبادرة إنترنت دوت أورج

في الأول إيه هي مبادرة انترنت دوت اورج internet.org :
مارك زوكربيرج – الإسم الأشهر حالياً في عالم الديجتال – مؤسس موقع التواصل الأكبر عالمياً – فيسبوك – عمل فكرة مبادرة ضخمة – على غرار مشاريع جوجل – تحت إسم انترنت دوت اورج internet.org
هدف المبادرة دي واللي بدأت من سنتين تقريباً هي إتاحة الإنترنت بشكل مجاني لحوالي خمسة مليارات شخص في العالم!
المشروع ده – المبادرة – بتشكل جزء كبير من استراتيجية النمو في فيسبوك وفتح أسواق جديدة ليه.

في أكتر من 4.5 مليار شخص – حوالي أكتر من نص العالم – من أصل 7 مليارات شخص على الأرض ما عندهمش إنترنت.

في دول نسبة اللي عندهم إنترنت فيها حوالي 0.8% و 0.9%1.1% زي إريتريا وتيمور الشرقية وميانمار.
وحتى أمريكا, حوالي 19% من الناس فيها غير متصلين بالإنترنت.
راجع قائمة الدول وترتيبها حسب عدد مستخدمين بالإنترنت

على جانب آخر, في أكتر من مليار شخص حوالين العالم بيستخدموا فيسبوك بالفعل.

الدرس الأول: إشتغل مع الناس.

لما مارك زوكربيرج فكر في مبادرته, ورغم صعوبة التعاون مع الشركات والتواصل بينهم خاصة في المستوى العالي ده من البيزنس, راح مارك لشركات التكنولوجيا الكبيرة التانية ودعاهم للمشاركة في المشروع زي إريكسون و ميديا تك و مايكروسوفتنوكيا سابقاً – و أوبرا و كوالكوم و سامسونج .

في منهم اللي إستجاب للدعوة دي، زي شركة أوبرا اللي هتقدم من خلال متصفح الإنترنت بتاعها في الدول المتأثرة دي الوسايل والأساليب والأوبشنز اللي هتسمح لمستخدمين الإنترنت بالوصول إلى الويب بأقل إستهلاك للبيانات والحد الأدنى من التكلفة،
وشركتين زي ميديا تك و كوالكوم, هيعملوا الشرايح الإلكترونية اللي ممكن تستخدمها في الموبايلات والأجهزة المحمولة لتوفير الإنترنت بسعر منخفض جداً
وإستجابت شركة مايكروسوفت – نوكيا سابقاً – وقررت تعمل موبايلات واجهزة محمولة بسعر منخفض جداً موجهة للأسواق دي وتساعدهم على الدخول إلى عالم الإنترنت.

الدرس التاني: البشر أقوى من الدول في عالم الديجتال.

ثم فتحوا منصة انترنت دوت اورج Internet.org لكل الديفلوبرز المهتمين بالعمل كفريق واحد مع الشركة – فيسبوك – على المشروع, وإنهم يكونوا جزء من المبادرة – توصيل الإنترنت مجاناً لغير القادرين أو بأسعار زهيدة لزيادة عدد مستخدمين الانترنت حول العالم –
والقرار ده اتاخد بعد مجموعة من المشاكل والخلافات بسبب قرار دولة الهند الإنسحاب من المشروع بسبب إن – من وجهة نظرهم – انترنت دوت اورج Internet.org مش متوافق مع توجهاتهم وشايفينه مشروع غير محايد.

وبدأت فيسبوك الشركة ومارك زوكربيرج الشخص يحاولوا يخلوا الحملة نفسها للدعاية عن المبادرة أكتر شفافية وأكتر شمولية.

الدرس التالت: الفلوس مش كل حاجة, ما تبصش تحت رجليك.

إنتقاد المبادرة إنترنت دوت أورج Internet.org حصل بعد ما بدأت جهات مضادة تهاجم المشروع في الأخبار على مبدأ إن فيسبوك بيحاول يعمل تفضيل بعض الخدمات والشركات والمواقع اللي بتربطها علاقات بيزنس مع بعض.
لكن بعد المنصة دي الخاصة بالديفلوبرز, أصبح للجميع إمكانية اختيار المواقع والتطبيقات اللي هما حابين يشتغلوا بيها لخدمة الفكرة نفسها زي ما هما شايفين.
شركة فيسبوك ومارك زوكربيرج أكدوا كذا مرة إن الشركة أو الشخص مالوش أي منافع مادية من مواقع الخدمات الأساسية اللي بتخدم المبادرة أو بتساعد على نجاحها… لكن رغم ده لسه الكلام داير ومش بيسكت.
عشان كدة, بعد افتتاح المنصة دي للناس كلها ووضع قواعد حرية الاختيار, كان معاها مبادئ وإرشادات لازم تلتزم بيها قبل ما تبدأ التعاون مع المبادرة, كمن اهمهم إن الديفلوبرز يحطوا في اعتبارهم إن التعاون ده مجاني ومش هياخدوا من وراه اي ربح مادي.

الدروس اللي جاية, هي من ملاحظات على فيديو مارك الأخير بخصوص المبادرة, نشوف مع بعض الصورة دي:

mark-notes

Mark zuckerberg edited the post

الدرس الرابع (1) : راجع نفسك أول بأول قبل ما الناس تراجعك, ومش عيب إنك تعدل.

لازم تراجع كل كلمة بتنشرها, وتراجع غلطاتك اللغوية ومش عيب إنك تعمل إيديت او تعديل للبوست.

الدرس الخامس (2) : عاوز أخلي الفيديو ده يوصل ل 20 مليون واحد

الفيديو متشاف من مليون و 200 ألف واحد بس… وده مارك زوكربيرج – صاحب الفيسبوك – وعدد الفولورز عنده 32 مليون و 300 ألف شخص! يعني حوالي 4% بالكتير اللي شافوا الفيديو من توتال الفولورز… تقدر تحط ده رقم لتقييمك لأي فيديو بتشتغل عليه وعدد الفيوز بتاعته ما تحبطكش, خاصة لو إنتا في الفيديو ده بتقدم حاجة هادفة أو فكرة جديدة أو فريدة من نوعها.

الدرس السادس (3) : التفاعل مش بإيد حد, الموضوع نسبي تماماً وبيقف على أكتر من عامل وأهمهم الشريحة المستهدفة طبعاً ومحتوى البوست

متوسط التفاعل مع البوست حوالي 0.2% مقارنة بعدد الفولورز عند مارك… نفس الدرس اللي فات مع فرق وجهة النظر.

الدرس السابع (4) : ركز في الهدف بتاعك واللي بتعمله

ما تستناش تلاقي الناس كلها بتدعمك, بالعكس… لو بتعمل حاجة جادة تخيل إن هيجيلك تعليقات كتير تخليك تخبط دماغك في الحيط, تجاهلها وكمل اللي بتعمله وحاول أكتر وأكتر, الهري كتير والناس المحبطة كتير – خاصة في العالم العربي – وبيعتبروا ده نوع من أنواع خفة الدم أو التعبير عن الرأي في حين إن هوا ما إلا تعبير عن النقص والفشل, حاول دايماً تغمض عينك وما تشوفش التعليقات السخيفة. لأن الوقت أهم حاجة.

5-25-2015 6-35-54 PM

الدرس التامن: مافيش حاجة ما تنفعش

ممكن تنزل نفس البوست مرتين وتلاتة وأربعة في نفس اليوم عشان تضمن إنه وصل لناس أكتر, مافيش قانون بيمنعك من ده, وطبيعي إنك تعمل ده لو البوست مهم ومحتاج الناس كلها تشوفه قدر المستطاع.

5-25-2015 7-13-43 PM

الدرس التاسع: ما تسيبهمش يطبلولك عشان ما تعملش دوشة لنفسك

ما تتحولش لبطل قومي, إنت بشر عادي زي غيرك لكن جالك القدرة والفرصة إنك تعمل حاجة مختلفة عن باقي الناس, خليك محترم ومتواضع, وحاول ما تندمجش مع المطبلاتية وما تفتخرش زيادة عن اللزوم, طول مانتا شايف نفسك صح وعارف مكانك صح مش هتكون محتاج ناس تطبلك أو تعظمك وتديك أكبر من حجمك – حتى لو كان من وجهة نظرهم تستاهل ده – لازم دايماً تبقى شايف نفسك صغير عشان تفضل تسعى للأفضل… إياك وجنون العظمة. إياك والمطبلاتية.

وأخيراً الدرس العاشر: إنك بتفيد الناس ده مش معناه إنك بتعمل عمل خيري ولا تطوعي بدون أهداف

إنك تفيد الناس وتساعدهم ده شيء حلو, مش شرط تسميه عمل خيري ولا عمل تطوعي, انتا بتعمل الحاجة الصح لخدمة المجتمع ولأهداف تطوير المجتمع اللي إنتا هتستفاد منه عموماً لو إتطور وبقى أحسن.. ما تقبلش إن الناس تحطك في الخانة دي لأن ده ممكن يعرضك لمشاكل ورغي ما بيخلصش, ببساطة عادة مافيش حد بيساعد الناس وبيفيدهم عشان عاوز يساعدهم بس, غالباً الناس اللي بتساعد الناس وعاوزة تطور العالم بتكون ليها أهداف بعيدة المدى – بتكون أهداف مش شريرة برضه ومش عيب – مافيش حد بيعمل حاجة بدون هدف, لو ما عندكش هدف فمافيش حاجة بتتعمل أصلاً ولا هتقدر توصل لحاجة.

ده الفيديو الملهم والرهيب لمارك زوكربيرج عن مبادرة إنترنت دوت أورج internet.org :

Today, we’re taking the next step with Internet.org by enabling anyone to build free basic internet services to help connect the world. We’ll make faster progress towards connecting everyone if we all work together and give people even greater choice of services.Giving people these free services is the right thing to do. I support net neutrality because, at its core, it’s about preventing discrimination. Net neutrality means we can use the services we want, and innovators can build the services we need.Connecting everyone is about preventing discrimination too. More than 4 billion people don’t have access to the internet and the opportunities it brings. If we connect them, we’ll lift hundreds of millions of people out of poverty.If we want everyone to share the opportunities we have, then it’s our responsibility to bring everyone online in a way that respects an inclusive net neutrality.Here’s a clip from a video message I recorded about this update. I’ll post the whole video and share more details about this later today.

Posted by Mark Zuckerberg on Monday, May 4, 2015

Facebooktwittergoogle_plusredditpinterestlinkedinmail

تقرير كامل عن فيسبوك تايم لاين

أولاً

هيكون ليك صورة بالعرض تقدر تحطها على البروفايل من فوق زي بانرات المواقع العادية, والبروفايل بيكشر هتتحول لصورة صغيرة قدامه كانها صورة الماسينجر…

معلومة للأخوة المحترفين… مقاسات الصورة الكبيرة للبانر هتكون 851 بيكسل في 315 بيكسل 🙂

ثانياً

هيكون في قايمة على الجنب اليمين فيها سنين حياتك كلها من يوم ما دخلت الفيس بوك, بحيث إن أي حد يقدر بكليك واحد يجيب كل حاجة انت عملتها على الفيس بوك في شهر معين من سنة معينة

يعني مثلاً يدوس على سنة 2008, ويشوف الاستاتيوهات بتاعتك في شهر 12 من السنة دي او مين سابلك وال بوست او الصور اللى اتحطت وقتها 🙂

ثالثاً

الصفحة نفسها بتاعتك هتتقسم نصين بالطول, وهيبقى في طريقتين لعرض الحاجات اللى في البروفايل عندك, الطريقة الاولى عبارة عن مستطيل على الجنب اليمين او الشمال, بحيث انهم يبقوا مستطيلين متوازين جنب بعض في كل سطر…

أو انك تكون في حاجة مهمة عندك فتعلم عليها انها featured فتظهر بعرض الصفحة كلها وتاخد مكان مستطيلين كاملين

رابعاً

هيكون تحت صورة الكوفر ” البانر اللى فوق ” اربع مربعات كل واحد فيهم فيه زي screenshot او لقطة معينة, واحد فيه النوتس بتاعتك, واحد فيه الفريندز, واحد فيه الصور, وواحد فيه الاماكن اللى انت روحتها طول حياتك وواحد فيه الصفحات كلها اللى عاملها لايك وهكذا

خامساً

هيكون في إحصائية ليك كل شهر ضفت كام شخص وكام شخص عملك وال بوست بالاسامي والتفاصيل, والاحصائية دي بشكل دوري يعني شهرية وسنوية 😀

سادساً

وانت بتنشر ستات معينة أو ابديت معين ممكن تنشر ستاتيو في الماضي, ودي من أجمل التعديلات الرائعة اللى حطوها, بمعنى إنك ممكن تنشر ستات في تاريخ قديم بحيث إنها تنزل في ترتيبها في التايم لاين بترتيبه التسلسلي الزمني في المكان اللى انت عاوزه

سابعاً

هيبقى عندك زرار بيقول Activity Log ده هيبقى برايفت ليك انتا بس… بيطلعلك احصائيات كاملة عن الاستيتو اللى انت نشرتها طول حياتك او الناس اللى ضيفتها او الصور او الاماكن او اي حاجة عملتها على الفيس بوك

ثامناً…

الحاجات اللى من الشهر الحالي مش هتظهر كاملة, هيظهر المختصر المفيد بس وبعدها زرار بيقولك ” see more from november” لو دوست عليه هتكمل الحاجات اللى اتحطت في الشهر ده, لو مادوستش عليه هيفضل يرجع بيك بالزمن لحد ما توصل لليوم اللى الشخص ده دخل فيه الفيس بوك

تاسعاً,

خاصية إضافة ستاتيو او صورة او لينك او غيره في الماضي هتخلي الناس تبقى مهوسة أكتر بالفيس بوك انها تملى قصة حياتها من يوم ما اتولدت لحد دلوقتي عشان بروفايلها يبقى كامل, بحيث ان فيس بوك يكون يحتوي كل حاجة عنك من يوم ما اتولدت كقصة حياه كاملة متكاملة!!

أعتقد زي ما ناس كتير هترفض الابديت ده في ناس كتير هتقبله…

لكن على أي حال, في خاصية لسه موجودة في البرايفسي إنك تمسح تاريخك كله من على الفيس بوك لحد تاريخ معين, او انك تعملها limit visibilty لكن الاكشن ده ما ينفعش ترجع فيه, لكن فايدته انه هيلغى اي حاجة انت عاوز تلغيها من الماضي

عاشراً,

بالنسبة للحاجات القديمة كلها في بروفايلك انت ممكن تعيد ترتيبها من جديد طبقاً لتواريخ جديدة تحطها, يعني تقدر تغير تاريخ نشر اي حاجة في اي حتة, سواء الصور او اللينكات او الاستاتيو بحيث انها تبقى في الماضي او في المستقبل زي مانت عاوز 🙂

النقطة 11,

كل سنة هيطلع إحصائية كاملة عن الصفحات اللى عملتلها لايك والناس اللى ضيفتها والايفنتات اللى حضرتها والاماكن اللي روحتها وأهم الحاجات اللى انت عملتها في السنة دي

النقطة 12,

هيكون في زرار جديد اسمه Life Event تقدر من خلاله تحط أهم التواريخ والأحداث في حياتك بتفاصيلها الكاملة بحيث إنها تظهر وسط التايم لاين بتاعك… حالياً انا إن شاء الله هاكون أول مصري يحط الثورة المصرية 🙂

النقطة 13,

انا كمستخدم للفيس بوك… إتشغلت تماماً في تعديل البروفايل بتاعي وده شيء ممتع جدا جدا جدا

النقطة 14,

تم تغيير طريقة عرض الفريندز والصور, في مشكلة لسه في السيستم في عرض كل الالبومات لو البوماتك أكتر من 10 ألبومات, وفي مشكلة في فلترة الفريندز وترتيبهم في العرض الجديد يتوه حبتين بس أكيد سيتم معالجتهم

نضم للحاجات اللى اتغير طريقة عرضها النوتس…

وطبقاً للتعديل في التصميم بتاع الموقع من الواضح ان التصميم ده مش هيستمر كتير والا هيتم تعديله أكتر من مرة كمان في خلال الشهور التلاتة الاولى لأنه ظالم الاعلانات… الاعلانات بقت تكاد تكون مش ظاهرة بين البروفايل وبين التيكر

النقطة 15,

تقدر بسهولة رهيبة طول مانت ماشي في بروفايلك تدوس كليك شمال في أي مكان وتحط فيه اللى انت عاوزه سواء ستات او اغنية او لينك او حدث او مكان معين زرته قبل او بعد المكان اللى انت دوست فيه 🙂

النقطة 16,

خواص الابليكشنز الجديدة بقت رائعة, وكل أبلكيشن ممكن يبقى ثابت في صفحتك كأنه اضافة للصفحة على جنب, زي الاغاني اللى بتحبها او الكتب اللى قريتها او غيرها من الحاجات الثابتة في حياتك

أعتقد ان شعار فيس بوك في المرحلة القادمة, مش هتقدر تخرج من بروفايلك أو ” هتزهق من نفسك ” أو ممكن ” إكتشف اللذيذ اللي جواك “

شيء رهيب إنك تشوف قصة حياتك قدامك لحظة بلحظة بالشكل المبسط اللطيف ده 😀

أنا من رأيي لو في شركة حبت تعمل انترفيو مع حد, او واحدة أهلها عاوزين يسألوا عن خطيبها.. أو لو بتقدم في الكلية الحربية او الشرطة هي بصة في بروفايلك ع الفيس تعرف تاريخ حياته كله بالتفصيل الممل وبأقل مجهود… فعلاً في أقل من نص ساعة تقدر تلم أهم تفاصيل حياة أي حد دلوقتي 🙂

النسبة للأخوة الهربانين اللي هيهتموا بإزاي يواجهوا التايم لاين وخايفين من الفضايح!

الحل كالتالي:

1- من فوق على اليمين من السهم هات Privacy settings

2- منها هات Limit the Audience for Past Posts

3- دوس على Manage Past Post Visibility

4- تعامل زي ما تحب

 

الصور:

 

فيديو:

Facebooktwittergoogle_plusredditpinterestlinkedinmail