ازاي تقيس شغلك في مجال الديجتال ماركيتنج وازاي تحضر التقارير

قولي كدة بقة إنت عملت ايه أصلاً؟

طبعاً إنت كـ ” إنترنت ماركتير ” ببتصنف كـ ” جينيس ” بالنسبة للناس اللي عندك في الشغل من أول الأوفيس بوي لحد البيزنس أونر أو العملا اللي بتتعامل معاهم… وده بيكون شعور حلو جداً الحقيقة 😀

لحد ما تيجي اللحظة الحاسمة القاتلة, لما يجيلك مديرك في قعدة نهاية الكوارتر يقولك:
” إحكيلي بقة إنت عملت ايه في الكام شهر اللي فاتوا؟ أنا مش شايف أي بتنجان يعني! ”

تلك اللحظة اللي بيجيلك فيها الضغط وتحس إن شقا 3 شهور متواصلة كل يوم شغال فيهم بتاع 18 ساعة إترموا في الأرض! فتقعد ترغي ترغي ترغي عن إنجازاتك وأسبابها وطريقتها وعملت ايه وطبعاً هتسقط حاجات كتير في النص… والاهم من ده:
العميل – البيزنس أونر – الأوفيس بوي مش هيحفظوا كل كلمة هتقولها ساعتها, أو على أفضل توقع مش هيفهموا كل الامور بشكل كامل زي مانت عاوز تقوله…

عشان كدة, لو إنت عاوز تحافظ على صحتك.. لازم الموضوع يكون ماشي بطريقة صحية أكتر من كدة بشوية.

عشان تعمل ده, لازم يكون عندك مؤشرات وعدادات شغالة طول الوقت تقدر بيها تقيس أداء خطة الماركتنج بتاعتك, بحيث قبل ما يجيلك حد يقولك ” إنت بتعمل ايه يا برنس؟ ” ما تردش عليه أصلاً وتشاورله على العدادات اللي إنت حاططها وانت ساكت, وتكمل شغلك.

في نفس الوقت, تبقى عارف إنت نفسك طول الوقت من العدادات دي إنت ماشي على سرعة كام في تحقيق أهداف البلان بتاعتك!

بكدة يبقى عندك: مؤشرات النجاح, أو عدادات قياس الأداء… واللي بنقول عليها بالبلدي:
” KPIs ”
Key Performance Indicators

وبعد هذه المقدمة الطويلة كالعادة ” يارب تكونوا قريتوها ”

=================================

بعد ما بنحضر الماركتنج بلان, العميل – البيزنس اونر – مدير المشروع بيكون عينه على جزء واحد بس اللي هوا بيفهم فيه: ” الأهداف ”

عادة ماحدش فيهم هيكون فعلاً مهتم إنتا هتعمل إيه بالظبط, هتجيب مين يغني أو مين هيعمل الأكل… المهم عندي الناس تطلع مبسوطة 😀

Show me cash!

وزي ما اتفقنا, إن الماركتنج غير السيلز, فإحنا مش مطلوب مننا نوريله الفلوس دلوقتي… بس مطالبين بشكل قاتل إننا نوريله الفلوس هتيجي منين وإزاي… وإيه اللي بيثبت إنها هتيجي بعد سنتين تلاتة حسب البلان العبقرية اللي إحنا حاطينها, وإلا… الراجل هيسيبيك تشتغل 3 سنين ليه؟!

الخلاصة لحد دلوقتي:
عشان الجملتين تلاتة اللي فاتو + المقدمة الطويلة, إحنا بنبقى محتاجين نترجم الأهداف دي إلى مؤشرات أداء, بحيث طول ما المؤشرات دي بتعلى وبتتغير طول الوقت حسب البلان, نضمن إننا ماشيين على التراك صح… والاهم من ده, لما نيجي نتحاسب في آخر المدة المحددة… تعرف تاخد البونس بتاعك لأنك ضاعفت المؤشرات 😉

=================================

كل بلان مهما كانت, بيكون ليها مجموعة KPIs ينفع تتحطلها وتقيس عليها, إدراكك للـ KPIs اللي هتحطها بالظبط, وتفسيرك إنت هتعليها إزاي وبمعدل زيادة عامل إزاي طول فترة الشغل ده الدليل العملي على إنك واثق في البلان بتاعتك, وعارف ومدرك إنت جاي تعمل ايه بالظبط…

وكل شانل من الشانلز اللي هتلعب عليها طول البلان بيكون ليها KPIs صغيرة داخلية, بتصب في KPI كبير… اللي بدوره بيثبت إنك رايح على الـ ROI ” شايفين الجملة قد ايه عبقرية B| ”

الـ KPIs الصغيرة دي بتكون عاملة زي الشرط ووحدات القياس اللي على المسطرة, زي السنتيميتر أو البوصة… بشكل أكتر تبسيط وبعيداً عن التعقيد بنقول عليها ” Key Metrics ”

=================================

على سبيل المثال:

من أهم الـ KPIs اللى لازم الماركتنج يحققها – في رأيي الشخصي – هي إنه يعرف الناس بالبيزنس ويزود دراية الشرايح المستهدفة بالمنتج أو الماركة – الخدمة اللي بتسوقلها..
” Brand Awareness ”

لو خدنا البراند أويرنس كمثال, وقولنا تعالى نطبق عليه بسرعة كدة الكلام الكتير اللي فوق ده:

هاقول – فرضاً – إن ” البراند أويرنس ” هيتقاس عندي على شانل زي ” الفيسبوك ” :

– الإنتشار على الفيسبوك:
— عدد الناس اللي وصلتلهم بالإعلانات
— عدد الناس اللي داسوا على الإعلانات
— عدد زوار الصفحة
— عدد الفانز
— عدد الناس المتفاعلين
— معدل الماسيجات
— عدد الشير
— عدد البوستات الموجهة مباشرة عن البراند
— عدد مشاهدي البوستات اليومية

أنا هاكتفي بدول بس الحقيقة عشان ننجز 😀

المهم, لو أنا رصيت الكلام اللي فوق ده في هيئة KPIs و KM اللي هوا الـ Key Metrics هاقول:

The main KPI = Brand Awareness

Sub KPI as channel Social = Facebook – Twitter – Youtube – Instgram – Pinterest… etc

Facebook Key Metrics :
– Campaign Reach
– Clicks
– Page Reach
– Fans
– Talking about
– Messages per day
– Shares
– Branding posts
– Reach per post type

في المثال السابق ” زي مانت شوفت كدة ” هاملى كل واحد من دول في خلال فترة زمنية معينة ” كل يوم – كل اسبوع – كل شهر ” زي مانتا شايف…

وتبقى بكدة عندك وحدات القياس بتاعة مؤشرات النجاح.
ثم تحط نسبة نجاح لمؤشر النجاح بتاعك حسب البلان بتاعتك بناءاً على وحدات القياس دي وتطلع بنسبة مئوية أو نسبة بين 1 إلى 10 إنت حققت التارجت بمعدل كام.

مثال حسابي على KM واحد بس:

الهدف المحطوط في البلان إنك هتعمل براند أويرنس
مفتاح النجاح الفرعي إن الناس تبدأ تسأل عن المنتج
وحدة القياس إن عدد الماسيجات, الايميلات او التليفونات في اليوم يكون 10…
وحدة القياس التانية عدد الناس اللي هتسيب كومنتات على بوستات البراندنج يكون 100 في اليوم

الكي ميرتك الأول = عدد الناس اللي هتتواصل معايا يومياً
الكي ميترك التاني = عدد الكومنتات على البراندنج بوست
الكي بي آي = براند أويرنس

النهاردة جالنا 8 ماسيجات بس
و130 كومنت على البراندنج بوستس

يبقى الحسبة هتكون :

8 على 10 في الـ %

يبقى أنا حققت 80% على الكي ميترك الأول….

و 130 على 100 في الـ %

يبقى أنا حققت 130% على الكي ميترك التاني…

———————————-

هاجمع الاتنين 80% + 130% وأقسمهم على عدد الكي ميتركس

80% +130% على 2

يبقى كدة أنا حققت الكي بي آي بنسبة 105% النهاردة

=================================

بمعنى آخر.. هتحط النتايج دي قدامك وتقارنها بالبلان اللي إنت حاططها, هتلاقي إنك ببساطة قدرت تشوف:

هل إنت رايح تحقق أهداف البلان ولا في حاجة قصرت معاك؟
لما يجيلك حد يقولك إنت بتعمل ايه يا برنس؟

يكون الرد عندك:
والله انا بعمل براند أويرنس من خلال السوشيال شانلز وآدي مفاتيح النجاح بتاعتي وآدي مؤشرات القياس بتاعة كل شانل فيهم… إنت رأيك ايه؟

=================================

ملحوظة نهائية في الخلاصة:

ترتيبة الـ KPIs والـ KM بتاعتها وقيمها متغيرة وغير ثابتة, مافيش ثوابت… إنت اللي بتحط المعادلة حسب رؤيتك الخاصة وحسب درايتك بأهدافك وطريقة تحقيقها والشانلز اللي هتلعب عليها… لكن في النهاية لازم تقعد يوم كامل على الاقل بعد ما تخلص البلان, ترص الـ KPIs بتاعتك والـ KMs بتاعتها وتحط معادلاتك اللي هتقيس عليها الدنيا… وما تكسلش وما تستصعبش لأن النتيجة تستاهل 🙂

Facebooktwittergoogle_plusredditpinterestlinkedinmail

دراسة إحصائيات الديجتال وتحليل التحركات من خلال فيسبوك, دراسة حالة على صفحة سيو صح

بنكمل في الجزء ده محاولة التحليل ودراسة إحصائيات الديجتال أكتفتيز بشكل مبسط, مع التطبيق على موقع سيو صح.

في الجزء الأول إستكشفنا القنوات اللي بيتحرك من خلال موقع سيو صح على شبكة الإنترنت, وبعدها بدأنا بتحليل أول القنوات دي وهي الموقع نفسه, تقدر تراجع الجزء الأول من هنا: دراسة إحصائيات مواقع الإنترنت وتحليل التحركات من خلال الإنترنت, دراسة حالة على موقع سيو صح

في الجزء ده, هنبدأ بتحليل صفحة الفيسبوك لموقع سيو صح خلال السنتين اللي فاتوا من عمر الموقع بالتفصيل…

في البداية – زي ما عملنا في اول خطوة – هنبص بصة سريعة على الصفحة نفسها https://www.facebook.com/SeoS7.Official وندوس على عدد اللايكس اللي مكتوب فيها

seos7-page
seo-s7-first-look

ونجمع المعلومات الأولية من النظرة السريعة:

  • تصنيف الصفحة: موقع انترنت website
  • التابس الإضافية الموجودة Tabs: الفيديوهات ( فيها 6 فيديوهات ) – يوتيوب سيو صح – تابات خاصة بإعلان عن الكورسات ( 3 تابات منهم اتنين غير نشطين ) – تاب خاصة بالبيع من خلال الصفحة للكورسات المدفوعة المقدمة من سيو صح بإستخدام خدمة selz
  • الصفحة ما بيستخدموش البومات الصور, ولكن بينشروا بوستات بالصور ( أكتر من 400 بوست صور )
  • إجمالي عدد المتابعين : 16283 متابع
  • عدد المتفاعلين النشطين: 292 شخص
  • معدل زيادة المتابعين نسبة إلى الإجمالي حوالي 2% ومعدل الزيادة في المتابعين علي الأسبوع الحالي عن الأسبوع اللي قبله بنسبة حوالي 40%
    معنى كدة إن تقريباً الصفحة بتزيد من ناحية المتابعين من 162 إلى 320 متابع جديد أسبوعياً…
  • نظرة سريعة على البوستات الموجودة في الصفحة في آخر أسبوع, الصفحة نشطة وبتنزل بوستات بمعدل غير ثابت, لكنه في متوسط 6 بوستات أسبوعياً, معدلات التفاعل من ناحية اللايك للبوستات والشير عالي, الكومنتات مش كتير ويمكن تعتبر قليل بالمقارنة بباقي الصفحات من نفس التخصص ” الصفحات المتخصصة في الأونلاين ماركيتنج “

ثم نبدأ ندخل جوة التفاصيل بشكل أوسع, في البداية هنستخدم أداة Fanpagekarma.com لتحليل صفحة الفيسبوك لموقع سيو صح, وهنحدد التاريخ في آخر سنتين اللي هما فترة عمل الصفحة. ونضغط على Times & Types عشان نلقي نظرة

karma-choice

 

تحليل سريع للمحتوى على صفحة سيو صح:

  • إتنشر على صفحة سيو صح على فيسبوك 782 بوست
  • منهم 466 صورة وبتشكل نصيب الأسد حوالي 60% من بوستات الصفحة, متوسط التفاعل من المتابعين للصورة الواحدة 56 تفاعل.
  • ثم 171 لينك بنسبة حوالي 22% من إجمالي البوستات, متوسط التفاعل من المتابعين للينك الواحد 47 تفاعل.
  • ثم 62 فيديو يوتيوب بنسبة حوالي 8% من الإجمالي, متوسط التفاعل من المتابعين للفيديو الواحد 58 تفاعل.
  • و 83 بوست نصي بنسبة حوالي 10% من الإجمالي, متوسط التفاعل من المتابعين للبوست الواحد 69 تفاعل.

total-posts

 

  • أكتر الأيام نشاطاً في نشر البوستات للصفحة هو يوم الجمعة, إتنشر فيه 161 بوست واللي بيمثل 20% من الإجمالي تقريباً
  • يليه يوم الأحد برصيد 116 بوست ونسبة 15% من الإجمالي تقريباً
  • ثم أيام الإتنين والأربع والخميس بين 102 بوست إلى 108 بوست بنسبة أعلى من 13% لليوم الواحد فيهم من الإجمالي.
  • وأقل الأيام نشاطاً في النشر هو يوم السبت, البوستات اللي اتنشرت في أيام سبت كانوا 83 بوست فقط, بنسبة 12% من الإجمالي.

seos7-posting-weekly

  • أكتر ساعات تم نشر فيها بوستات على صفحة سيو صح بين الساعة 10 بالليل إلى واحدة بعد منتصف الليل بتوقيت القاهرة… في أيام الأسبوع كلها ما عدا الأربع!
  • لكن الغريب والملفت للنظر, إن أكتر ساعة على الإطلاق إتنشر فيها بوستات كانت متأخرة عن التوقيت المعتاد, الساعة 2
  • إلى 3 بعد منتصف الليل بتوقيت القاهرة يوم الأربع من الأسبوع, واللي اتنشر فيه خلال الساعة دي 18 بوست بنسبة 2% تقريباً من إجمالي بوستات الصفحة…
  • وإن يوم الجمعة اللي يعتبر أكتر يوم بتنشر فيه الصفحة بوستات, بيكون معدل النشر في توقيت بدري شوية عن المعتاد, حيث إن في 16 بوست نزلوا يوم جمعة في حدود الساعة 5 إلى 6 المغرب بتوقيت القاهرة…

نبدأ نلقي نظرة على المتابعين والتفاعل مع البوستات دي:

المتابعين للصفحة, واللي عملوا أكتر من 7960 تفاعل مع بوستات الصفحة بين لايك وشير وكومنت, كان أفضل التوقيتات اللي بيتفاعلوا فيها مع البوستات هو يوم الجمعة بعد الساعة 6 مساءاً بتوقيت القاهرة ولحد الساعة 12 مساءاً بتوقيت القاهرة. واللي بيحقق معدل تفاعل أكتر من 70 تفاعل للبوست الواحد في التوقيت ده اللي نزل فيه 58 بوست من إجمالي بوستات الصفحة.

وأسوء الأوقات اللي بتقل فيها نسبة تفاعل المتابعين هي أيام التلات من بعد الساعة 12 منتصف الليل ولحد 6 الصبح, واللي بيحقق معدل تفاعل 35 تفاعل للبوست الواحد في التوقيت ده واللي نزل فيه 32 بوست من بوستات الصفحة.
ونشوف تأثير يوم الأربع الغريب على التفاعل, فنلاقي إنه من أفضل أيام اللي بيتفاعل فيه المتابعين خلال الأسبوع ويمكن ده عشان كترة البوستات فيه ونزولها في توقيت مختلف في بداية اليوم لكنه جامع بين الناس السهرانة وبين الناس اللي هتصحى الصبح تشوف البوست, حيث إنه بيحقق بين 66 إلى 82 تفاعل للبوست الواحد خلال ساعات اليوم كلها ما عدا الفترة بين 6 صباحاً حتى 12 الضهر.

المتابعين للصفحة عملوا أكتر تفاعلاتهم على الإطلاق في أيام الخميس من الأسبوع, حيث إنهم تفاعلوا من خلال الكومنتات واللايك والشير برقم يصل إلى 2196 تفاعل مختلف, ودي نسبة تصل إلى 27% من إجمالي التفاعلات في باقي الأيام.
وأقل أيام التفاعل على الإطلاق كانت أيام السبت, بإجمالي 870 تفاعل ونسبة 11% من إجمالي التفاعلات في باقي الأيام.

هننتقل بعدها إلى الزرار الخاص بتحليل محتوى الصفحة ” Content “

karma-content

واللي فيه هنلاقي الخلاصة عن التفاعل مع البوستات المختلفة على الصفحة:
seos7-posts

  • متوسط التفاعل من خلال زرار ” لايك ” حوالي لايك للبوست الواحد.
  • متوسط التفاعل من خلال التعليقات حوالي 14 تعليق للبوست الواحد.
  • متوسط التفاعل من خلال زرار ” شيير ” حوالي 5 شيير للبوست الواحد.

أما من حيث مضمون البوستات, من الواضح إن صفحة سيو صح بتحاول دايماً تلعب مع المتابعين بتوعها الألعاب اللي بيتم فيها طلب التفاعل من المتابعين بشكل مباشر CTA عشان يكسبوا الكورسات والدورات التدريبية اللي بتنشرها الصفحة…
أعلى البوستات من حيث التفاعل كانت بتعتمد على الطريقة دي في بدايتها, حيث إن معظمهما كانت في سنة 2013 وسنة 2014 ويمكن ده اللي سبب إنتشار الصفحة في الفترة دي بشكل قوي, ولكن واضح إن الصفحة بدأت ترجع للطريقة دي مرة تانية في 2015 حيث إن أعلى البوستات من حيث الشير كان في يوليو 2015, وهوا كمان محقق المرتبة التانية من حيث معدل التفاعل من خلال اللايك…

 

  • أعلى البوستات تحقيقاً للتفاعل من خلال لايك أو الإعجاب: 29 ابريل 2014, عدد المتابعين للصفحة وقتها كان 4691 متابع

مساء الخير , ببساطة سحب على كورس ماستر سيو نسخة مجانية لعضو واحد فقط الليلة ولمرة واحدة …لايك (Y) عشان تدخل السحب…

Posted by SEOS7 on Tuesday, April 29, 2014

 

  • أعلى البوستات تحقيقاً للتفاعل من خلال الكومنتات والتعليقات: 12 أغسطس 2014, عدد المتابعين للصفحة وقتها كان 6512 متابع

السؤال الأول وصاحب الإجابة الصحيحة هيكسب 20$ بمناسبة مرور سنة على إنشاء #سيو_صح السؤال هو :-أى إيرور يخبر جوجل أن ا…

Posted by SEOS7 on Tuesday, August 12, 2014

  • أعلى البوستات تحقيقاً للتفاعل من خلال الشيير والمشاركة مع الاصدقاء: 12 يوليو 2015 عدد المتابعين للصفحة وقتها كان 15261 متابع

• مسابقة الحصول على كورس STEP SEO •بمناسبة قرب إنتهاء شهر رمضان نقدم لكم مسابقة جديدةوالجائزة كورس STEP SEO بملفاته ا…

Posted by SEOS7 on Saturday, July 11, 2015

أما أعلى البوستات اللي حققت نجاح بدون CTA أو طلب للتفاعل, والمفاجأة كانت إن منهم اتنين بوست نصي فقط بدون صورة أو لينك, وإنهم لم يكونوا لينكات تعليمية أو محتوى في صلب موضوع الصفحة:

  • التفاعل من خلال لايك: 12 يوليو 2015, عدد المتابعين للصفحة وقتها 15296 متابع

كيف تحصل على 10 مليون زيارة شهرياً دراسة حالة أجنبية قريباً على سيو صح (Y)

Posted by SEOS7 on Sunday, July 12, 2015

  • التفاعل من خلال كومنت: 12 مايو 2014, عدد المتابعين للصفحة وقتها 4778 متابع

 

لأن لكم حق على فى المعلومة , سأطرح عليكم بشكل سريع الأسباب التى إستدعتنى للإعتذار عن حضور ما يُسمى بـ ” قمة الأفيلييت ال…

Posted by SEOS7 on Monday, May 12, 2014

 

  • التفاعل من خلال شير: 27 يونيو 2015, عدد المتابعين للصفحة وقت نشر البوست 14772 متابع

 

7 نصائح للصعود بمقالتك للصفحة الأولى خلال 21 يوم !• عنوان مقالتك يجب أن يبدئ بالكلمة المفتاحية المستهدفة• إنشئ مقالة…

Posted by SEOS7 on Saturday, June 27, 2015

ملحوظة هامة: أعلى البوستات التي حققت تفاعل دون طلب التفاعل CTA على صفحة سيو صح كان بوست نشر كورس مجاني كصدقة جارية على روح والد صاحب الصفحة أحمد عزت لكني إستبعدته من الإحصائيات السابقة, لو كنت بتقرأ الجملة دي, أتمنى إنك تقرأ له الفاتحة وتدعو له.

لتحميل قائمة البوستات المنشورة في سيو صح مع تفاصيل التفاعل والتواريخ ونوع البوست وعدد متابعين الصفحة وقتها إضغط على الجملة دي

لو حابب تشوف أي بوست منهم على فيسبوك, إنسخ الرقم المكتوب في خانة Post_Id وحطه في نهاية الرابط التالي بعد posts/ :
https://www.facebook.com/SeoS7.Official/posts/

أما عن أكتر الكلمات والمفردات اللي بتتكرر في بوستات سيو صح:
seos7-keywords

أكتر الهاشتاجات المستخدمة في بوستات سيو صح:

seos7-hashtags

أكتر اللينكات اللي بتتشير على سيو صح بتكون من:
aeoa7-domains

متوسط طول البوستات اللي بتنزل على صفحة سيو صح بيختلف حسب نوع البوست, ودي ملاحظة مهمة جداً:

  • متوسط طول بوستات الفيديو حوالي 30 كلمة, بين 200 إلى 300 حرف, وحوالي 3 سطور.
  • متوسط طول بوستات الصور حوالي 70 كمة, بين 350 إلى 450 حرف, وحوالي 5 سطور.
  • متوسط طول بوستات اللينكات حوالي 65 كلمة, بين 300 إلى 350 حرف, وحوالي 4 سطور.
  • متوسط طول بوستات التكست العادية, حوالي 150 كلمة, بين بين 800 و 900 حرف, حوالي 11 سطر.

في حين إن أعلى البوستات تفاعل على صفحة سيو صح, اللي بتكون أقل من 25 كلمة, 110 حرف, وحوالي 3 سطور.

هنبص بصة على اللي موجود في الأوبشن الخاص بعرض مجموعة من المؤثرين في صفحة الفيسبوك اللي بتحللها… والأوبشن ده هتلاقيه تحت زرار ” Influencers “

karma-influncers

من خلال الأوبشن ده بتقدر تستعرض قايمة بأكتر المتابعين نشاطاً وتفاصيل نشاطهم داخل الصفحة, فايدة إنك تعرف مين الناس المؤثرين أو النشطين داخل الصفحة إنك ممكن من خلال بروفايلاتهم – اللى تقدر توصلها من خلال فيسبوك بالبحث عن اسمائهم ومطابقة الصور – إنك تعرف طبيعة المستخدمين اللي بيتعاملوا مع الصفحة, وتجمع معلومات عنهم أكتر تساعدك في إستهداف الشريحة المتابعة للصفحة دي بعد كدة, كمان بتقدر تعرف من خلال البوستات اللي بيتفاعلوا معاه أكتر نوع بوستات بيعجب المتابعين الأكتر ولاءاً للمجال اللي بتتكلم فيه الصفحة 😉

تطبيق الاوبشن ده على صفحة سيو صح, ودانا للنتيجة التالية:
influ-seos7

نسب التواجد الجغرافي لجمهور صفحة سيو صح:

  • 52% من مصر ” 8388 متابع “
  • 20% من المغرب ” 3197 متابع “
  • 7% من الجزائر ” 1070 متابع “

8-7-2015 7-40-49 AM

ومن أهم المعلومات اللي هتعرفها من خلال المنطقة دي, هي كام مرة بيرجع المتابعين للتفاعل مع محتوى الصفحة من جديد؟

بمعنى آخر, إذا المتابع ساب النهاردة كومنت أو داس لايك أو عمل شيير, هل بيرجع مرة تانية ولا لأ؟ ولو بيرجع تاني… فكام مرة بياخد تفاعل بعد كدة؟
وده مؤشر مهم جداً في صفحات المجتمعات او ال community لتوضيح مدى فعالية الكوميونتي ده ومدى اهتمام متابعينه بيه, وفي نفس الوقت ممكن يديك مؤشر عن مدى نشاط المتابعين الفعليين والدائمين مقارنة بالعدد الإجمالي…

بتطبيق ده على صفحة سيو صح, كانت النتيجة:

  • 60% من المتابعين يتفاعلوا لمرة واحدة فقط ولا يعودوا للتفاعل.
  • 20% من المتابعين يعودوا للتفاعل مرة تانية.
  • 6% من المتابعين يتفاعلوا أكتر من مرتين.
  • 5% من المتابعين يعودوا للتفاعل أكتر من 3 مرات.
  • 9% من المتابعين يتفاعلوا أكتر من 4 مرات وحتى 8 مرات!

seos7 Fan-Retention

بعد كدة, هنروح على القائمة ” History & Benchmarking ” وهنبدأ نقسم الفترة اللي هندرسها إلى Quarters ” ربع سنة أو 3 شهور “

seos7 history

نبص بصة على معدل الزيادة في المتابعين, ونحاول نتوقع مصادر الزيارات دي واسبابها, وهل في حاجة حصلت أدت لإرتفاع مفاجىء في وقت معين؟

عشان تقدر تشوف التغيرات كويس في معدل الزيادة في المتابعين حاول تقسم الخطوات إلى فترات زمنية قصيرة, أسابيع أو شهور, عشان تقدر تلاحظ القفزات في معدل الزيادة…

هنبدأ من شهر يوليو 2014 وحتى سبتمبر 2014 ونعتبره أول كوارتر هنشتغل عليه:
seos7-benchmark

الكوارتر بدأ بحوالي 5500 متابع وانتهى بحوالي 7300 متابع, معدل زيادة هادىء وثابت, ما عدا إرتفاع بسيط بعد يوم 11 يوليو, ولكنه غير ملفت للدرجة…
معدل الزيادة حوالي 20 متابع جديد يومياً.

الكوارتر التاني, من شهر أكتوبر 2014 وحتى ديسمبر 2014:
seos7-q2

كوارتر هاديء جداً, زيادة ثابتة ومستقرة ما عدا بعض الايام اللي فيها تغيير بسيط جداً, بدأ بحوالي 7300 متابع وانتهى بحوالي 8600 متابع..
معدل الزيادة حوالي 14 متابع يومياً, أقل من الكوارتر اللي قبله…

الكوارتر التالت, من شهر يناير 2015 وحتى مارس 2015:
seos7-q1-2015

هنا هنلاقي مفاجآت كتير في الكوارتر ده, الي بدأ بحوالي 8600 متابع وإنتهى بحوالي 11 ألف متابع, بمعدل زيادة غير ثابت يومياً تماماً…
وأربع قفزات تم تحقيقها خلال التواريخ:
من 9 إلى 11 يناير 2015, حوالي 230 متابع جديد.
من 3 إلى 11 فبراير 2015, حوالي 600 متابع جديد.
من 14 إلى 18 فبراير 2015, حوالي 350 متابع جديد.
من 26 إلى 28 فبراير 2015, حوالي 250 متابع جديد.

ودي دعوة للرجوع والتدقيق في البوستات والأحداث اللي حصلت في التواريخ دي لتحديد إذا كانت سبب الزيادات دي من إعلانات مدفوعة أو فيسبوك حط الصفحة ضمن الصفحات المقترحة ولا محتوى إنتشر بشكل كبير ” فايرال Viral ” أو مؤثرات خارجية زي المشاركة في الإيفنتات أو الدعوات من الأصدقاء وغيرها… إلخ

هنراجع قائمة البوستات لصفحة سيو صح

seos7-growth

نلاحظ إن في كل التواريخ اللي حصل فيها إرتفاع مفاجىء في معدلات المتابعين في الصفحة, ماكنش في محتوى أصلاً… أو إن المحتوى الموجود مش محقق معدلات تفاعل عالية, بالعكس يمكن تكون أقل من معدلات التفاعل المعتادة…

بالتالي أكيد سبب الإرتفاع مش إعلانات مدفوعة ” لأن أكيد ما حدش هيعمل إعلانات من غير محتوى – خاصة لو كان حد متخصص – ومش كونتينت إنتشر بشكل كبير, الإحتمال الأرجح وجود مؤثر خارجي سبب ده

ملحوظة جانبية: إكتشاف المؤثرات الخارجية شيء مرهق وبيتطلب وقت طويل ومجهود كبير… هنتكلم عن أدواته وتفاصيله في مقال آخر… ولكن حتى وقتها, ببساطة لازم تراجع التوقيت وكل العوامل الخارجية المحيطة بالموضوع وتبحث وتراقب الوضع كأنك كنت موجود وقتها عشان تعرف تتبع المؤثر الخارجي وتوجده بالتفصيل… وأحياناً ممكن تفشل في ده لأنه ممكن يكون دعوة من احد متابعين الصفحة مثلاً تمت في هدوء! أو يكون فيسبوك بدأ يظهر الصفحة في ال suggestions مثلاً.. أو أحداث حصلت على الأرض مالهاش أثر تتبعه أونلاين….

ندخل في الفترة الأخيرة, من شهر ابريل 2015 وحتى مايو 2015:
seos7-q4-2015

الفترة دي غريبة جداً!
في إرتفاع مفاجىء وضخم بين 16 إلى 18 ابريل, حوالي 600 متابع في يومين!
ثم إنخفاض في المتابعين ” unlikes/removed ” بين 25 الى 26 ابريل, حوالي 100 متابع بالسلب!
ثم ارتفاع من 4 إلى 6 مايو بحوالي 200 متابع…
وانخفاض آخر من 6 إلى 7 مايو بالسلب.
ثم ارتفاع من 23 إلى 24 مايو بزيادة كبيرة حوالي 170 متابع في يوم واحد…

هنراجع تاني قائمة البوستات لصفحة سيو صح

ونلاحظ نفس الملاحظة, مافيش محتوى في الأيام اللي فيها تغيرات فجأة على معدل الزيادة في المتابعين, ونرجع لنفس السبب إن يكون عوامل خارجية…

ملحوظة هامة: إفتكر في الجزء الأول لما إتكلمنا عن أهمية معرفة الشخص أو المؤسسة اللي ورا الشغل اللي بنحلل تحركاته أونلاين؟ فاكر لما قولنا إن في سنة 2015 الأشخاص أوقات بيكونوا أقوى من المؤسسات؟
راجع من هنا: تحليل ودراسة مواقع الإنترنت – تجربة عملية على موقع سيو صح

في الوقت ده, لازم تفكر تراجع بروفايل صاحب الموقع نفسه أو القائمين عليه لمعرفة معلومات عن المؤثرات الخارجية المحتملة… في الحالة دي هيكون بروفايل أحمد عزت على فيسبوك

واللي منه هنكتشف بتوقع بسيط اسباب القفزات المفاجأة في المتابعين لصفحة سيو صح:
قفزات الربع الأول من سنة 2015 كانت نتيجة للمشاركة من أحمد عزت في فعاليات خاصة بالتدريب على الأرض, واللي كان ليها إنعكاسها المباشر على صفحة سيو صح للمهتمين بمتابعة المواضيع المتخصصة اللي بيقدمها أحمد من خلاله.
أما القفزات المتتالية في الربع التاني من سنة 2015 كانت نتيجة للمشاركة من أحمد عزت في أكتر من فعالية على الأرض خاصة بالتدريب, والمشاركة في مبادرات وفعاليات مختلفة أونلاين خاصة بالتجارب المتخصصة والمشاركة مع عدد مختلف من الأشخاص المؤثرين في نفس المجال والتعاون بينهم في تقديم أعمال مشتركة, واللي كان لها إنعكاس مباشر برضه على صفحة سيو صح من الناس اللي عرفت أحمد نفسه جديد وحبت إنها تتابع الفعاليات وال initiatives اللي بيشارك فيها…

واللي هيخلي التوقع ده أقرب للواقع, إن في الشهرين التاليين, معدل الزيادة في المتابعين رجع لمعدل زيادة مستقر – حوالي 35 متابع جديد يومياً – في شهر يوليو ويونيو 2015, وبعد إنتهاء كل الفعاليات اللي كان بيشارك فيها أحمد عزت….

آخر جزئية هنتكلم فيها ضمن الجزء ده, هوا محاولة توقع مدى فعالية الصفحة اللي بندرسها في تحويل الزوار إلى موقع الإنترنت الخاص بيها. Conversion
أو معدل الضغط على الروابط مقارنة بمعدل الوصول للمتابعين. Clicks

لمحة جانبية: معظم الصفحات بتستخدم مواقع وسيطة لإختصار الروابط – خاصة المواقع العربية – وده عشان يعرض الروابط بشكل اكتر احترافية على الشبكات الإجتماعية, بدون ما يضر تركيبة الروابط في موقعه نفسه, وأوقات من أجل معرفة إحصائيات الضغط على الروابط..

إنتا كشخص بيبحث وبيحلل شغل الصفحة دي, تقدر إنتا كمان تعرف عدد الزيارات اللي بتحصل على اللينكات اللي بتنزلها الصفحة – لو بيستخدموا إختصار اللينكات – وده ببساطة عن طريق إنك تنسخ الرابط المختصر copy , وتحطه paste في مكان عنوان الموقع في متصفح الانترنت عندك, وتضيف عليه علامة ( + ) ثم تضغط إنتر!

شوف الصورة دي:
link-details

وده اللينك اللي موجود في البوست ده:

بمناسبة مرور #عامين_على_سيو_صح (Y)كورس STEP SEO بسعر 50 دولار بدلاً من 150 دولار ! أفضل عروض الخصم التى تم طرحها منذ إ…

Posted by SEOS7 on Wednesday, August 5, 2015

والنتيجة اللي هيوصلك ليها الخطوة دي, هي معرفة عدد الضغطات اللي حصلت على اللينك ده لما نزل على الصفحة, ومجموعة من المعلومات التانية المهمة كمان عن مستخدمي الصفحة اللي ضغطوا على اللينك, زي نوع متصفح الانترنت, والجهاز اللي بيستخدموه. واللي ممكن يساعدك في دراسة وفهم الشريحة الموجودة في الصفحة دي.

دوس هنا مثلاً: http://goo.gl/6gnfCi+ وشوف النتيجة

link-clicks-seos7

 

للأسف إنتا ما تعرفش نسبة وصول البوست للمتابعين قد ايه Reach لكنك دلوقتي تعرف الوقت اللي نزل فيه البوست, وعدد الضغطات على الرابط… ومنهم تقدر تفهم البيج دي تقدر تحول كام زاير يومياً إلى موقع إنترنت, ومدى فعالية المشاركين فيها واهتمامهم بالروابط الخارجية…

وبكدة, نبقى وصلنا لآخر الجزء ده من تحليل إحصائيات الفيسبوك وتحليل التحركات من خلال الشبكات الإجتماعية, مع التطبيق على صفحة سيو صح.

دلوقتي دورك تطبق على البيزنس الخاص بيك, أو على المنافسين ليك, وتبدأ تستغل المعلومات اللي هتستكشفها في تحسين وتطوير ادائك وتحركاتك التسويقية المستقبلية من خلال فيسبوك 😉

الأدوات اللي إستخدمناها في التقرير ده: Fanpagekarma.com
قايمة الأدوات المشابهة واللي ممكن تكون أفضل وأكتر تطوراً من اللي استخدمناها هنا, واللي ممكن تستخدمها في تحليل التحركات والإحصائيات من خلال الشبكات الإجتماعية:


شكراً لوقتك جداً,
أكيد تعبت بعد قراية الكلام والأرقام دي كلها, دلوقتي تقدر تدوس شيير وقول رأيك في المقال ده وإنتا بتشيره, أو قول الحاجات اللي محتاجة توضيح أكتر أو شايف إنها محتاجة تعديل عشان نطور التقرير أكتر وأكتر.
وبعدها ترتاح شوية وتشرب كوباية شاي وتيجي تطبق على الصفحة بتاعتك أو على المنافسين.

Facebooktwittergoogle_plusredditpinterestlinkedinmail

9 نصايح للحصول على زيارات أكبر لموقعك من خلال فيسبوك

إنك تنشر لينكات من موقعك على صفحتك في فيسبوك مش كفاية عشان تاخد أكتر زيارات للموقع, عشان تجيب ترافيك لموقعك من خلال فيسبوك لازم تركز على مجموعة من العوامل الأساسية اللي بتأثر بشكل أساسي في ده.
إن الناس تعمل شيير أو لايك هي من العوامل المهمة.. لكن ده برضه مش كفاية,
لازم تفكر في الطرق اللي بيها تقدر ترفع معدلات الضغط على اللينكات من خلال فيسبوك ( CTR ) وتتعامل مع كل لينك على إنه إعلان كامل, محتاجله تصميمه الخاص ورسالته الإعلانية بالتفصيل, مع تطوير طريقتك في العرض اللي تتناسب مع الروح الإجتماعية لموقع فيسبوك اللي بتنشر عليه اللينك بتاعك. هوا إعلان كامل لكنه إعلان مجاني!

فكر فيها وجربها… إنتا ممكن تنشر نفس اللينك على صفحتك بأكتر من طريقة من حيث طريقة العرض والصورة والعنوان والوصف والكلام المكتوب مع اللينك نفسه, وكل طريقة منهم تقيس عدد الزيارات اللي وصلتك منها, إيه النتيجة؟ هتحقق متوسط كليكات وزيارات مختلفة عن التانية أكيد!
وإنتا بتقيس النتايج, ما تقيسش إجمالي الزيارات اللي جاتلك, ولكن فكر في عدد اللي شافوا اللينك مقارنة بعدد اللي داسوا عليه. الكليكس على الريتش في 100 Clicks/Reachx100
على سبيل المثال: البوست الأولاني وصل لألف شخص وداس على اللينك اللي في البوست 200 شخص. في الحالة دي معدل الضغط = 20%
مثال البوست التاني: وصل لألفين شخص وداس على اللينك اللي في البوست 1000 شخص. في الحالة دي معدل الضغط = 50%

ملحوظة جانبية: المعدلات العالمية للضغط على اللينكات من خلال فيسبوك من خمسة إلى سبعة في المية. بمعنى إن لو البوست بيوصل لألف شخص, وداس منهم 50 إلى 70 شخص يبقى إنتا كدة ماشي مع المعدل الطبيعي.

بناءاً عليه, يبقى أهمية معدل الضغط على الرابط CTR يعتبر أهم بكتير من معدل الوصول نفسه Reach… لأن مافيش فايدة إنك تحقق معدل وصول عالي لكن بدون ضغطات!

يالا بينا, خلال النقط الجاية دي هنتكلم عن شوية حاجات تعلي معدل الضغط على اللينكات والبوستات بتاعتك عشان تحصل على أعلى ضغطات ممكنة من خلال فيسبوك:

1- أطلب من المتابع بتاعك يدوس على الصورة: الكول تو أكشن ( CTA )

الصفحة الرئيسية لفيسبوك عندك فيها عشرات البوستات المختلفة من أصحابك ومن باقي الصفحات اللي انتا متابعها والإعلانات وغيرها, وكتير منها بيكون عبارة عن صورة أو فيديوهات ” على الأقل بنسبة 65% في سنة 2015 من الهوم على فيسبوك عبارة عن صور وفيديو ”
معنى كدة إن اللينك بتاعك هيكون في تحدي شرس مع باقي الصور والفيديوهات اللي ظاهرة للمتابع بتاعك.. وعشان تكسب التحدي ده, لازم تضيف زرار أو حاجة تدعوه للضغط, حتى لو فكرت بالشكل التقليدي وضيفتله زرار بسيط على الصورة وعليه كلمتين تقليدين زي: ” إضغط هنا ”
قارن بين الصورتين دول:
بحوث التسويق

يا ترى أي من الصورتين قابلة للضغط أكتر؟ أكيد اللي فيها زرار ” دوس هنا وأعرفها! ”

لمحة جانبية: نسبة كبيرة من الناس لو شافت كل تفاصيل الصورة وهي صغيرة ” حتى لو حلوة ” مش هيكليك على الصورة عشان يشوفها بحجم أكبر, الإعتماد بس على إن الصورة تكون حلوة مش كفاية… لازم تفهمه إن الصورة دي بيتداس عليها عشان يدوس!
ملحوظة كمان: الصور اللي عليها زرار CTA بتاخد ضغطات أكتر بنسبة 14% عن نفس الصور اللي بتتضاف بدون CTA

على صعيد آخر: ليه تطلب طلب واحد لما ممكن تطلب طلبين؟
الصورة مكتوب فيها إنك تدوس على اللينك, ليه ما يكونش في البوست نفسه إنتا كاتب إنك لو عجبك البوست تدوس شيير مع صحابك؟
الحاجات اللي بتطلبها من المتابعين بتوعك بتعلي إمكانية حدوثها, ممكن ناس تشوف اللينكات بتاعتك وتدوس عليها وتعجبها لكن ما يجيش في بالها إنها تعملها شيير, لو طلبت منهم يعملوا شيير ده هيعلي فرصتك في الوصول لناس أكتر.

2- قول رأيك الشخصي حوالين اللينك اللي بتنشره, أو إدي المتابعين إيحاء إنك بتقولهم رأيك!

أكيد لازم تكتب بوست أو كلام معين مع اللينك وانتا بتشيره, لأنك لو شيرته بدون أي كلام بيفقد على الأقل 18% من قدرته على الوصول للمتابعين لصفحتك!
ولكن إزاي تكتب الكلام المناسب وانتا بتشير لينك عاوز ياخد أعلى كليكات من فيسبوك؟
الشبكات الإجتماعية من إسمها ” إجتماعية ” فكل شيء بيدور حوالين الحوار وتبادل الآراء ووجهات النظر غالباً خاصة في صفحات فيسبوك الخاصة بقضية معينة أو بإهتمام معين ” Community ”
بالتالي إنك تضيف مع اللينك شوية كلمات عن رأيك الشخصي في اللينك اللي بتشيره أو تلمح لده, بيدي فرصة لمتابعينك إنهم هما كمان يبقوا مهتمين بتكوين رأيهم الخاص حوالين اللينك ده, وده بيدفعهم أكتر للضغط…
قارن بين الصورتين دول:
share-thoughts

يا ترى أي من الصورتين قابلة للضغط أكتر؟ أكيد اللي فيها رأيي الشخصي عن المقال!

لمحة جانبية: في ناس كتير بتفتكر إنك لما تكون بتتكلم بإسم براند يبقى لازم تتكلم كأنك واقف على المسرح وكأن الشركة نفسها اللي بتتكلم, ولكن في فيسبوك وفي عالم الشبكات الإجتماعية الوضع مختلف كتير عن باقي قنوات التواصل, لازم على الشبكات الإجتماعية تضفي على الأمور لمسة آدمية وتخلي الأمور تبدو موجهة بشكل شخصي من شخص إلى التاني.
ملحوظة كمان: اللينكات اللي بتضيف في البوست بتاعها كلام يعبر عن رأيك الشخصي عن محتوى اللينك بياخد ضغطات أكتر بنسبة 8% عن نفس اللينكات اللي بتتضاف بدون إبداء رأيك عن المحتوى.

على جانب آخر, فكر في إستخدام ال feelings وإنتا بتنشر اللينكات للتعبير عن الموود العام للمحتوى ده ورأيك فيه, شوف المثال التالي:
العلامة التجارية المؤثرة

3- ألوان الصورة مهمة جداً! وفي فيسبوك الوضع مختلف تماماً عن مانتا متخيل…

حقيقة علمية: ألوان الصورة بتأثر كتير على جذب العين في اللقطة الأولى, وتخلي المستخدمين للموقع يقفوا قدام الصورة للحظة وسط ما هما بيعملوا سكرولينج للموقع سواء من الكمبيوتر أو الموبايل!

ولكن الألوان اللي بتجذب العين ممكن تكون بتختلف من شخص لآخر, أو بمعنى أدق, من مجموعة لمجموعة… لازم تعمل شوية تجارب في البداية لمجموعة من اللينكات بإستخدام صور من درجات معينة في يوم معين, وتدرس معدل الكليكات في اليوم ده مقارنة بمعدل الوصول, وبعدها تجرب في يوم تاني نفس اللينكات في نفس معدل الوصول ولكن بإستخدام صور درجات ألوانها مختلفة…
لحد ما تعرف أفضل درجات ألوان بيفضلها المجموعة المتابعة لصفحتك واللي بتحقق معاهم أحسن معدل تحويل conversion rate او اعلى معدل ضغطات على اللينكات CTR

كمان تصميم الشبكة الإجتماعية نفسها وألوانها الغالبة هتكون معامل أكيد ومؤثر في درجات الألوان اللي هتستخدمها في الصور…
من تجاربي مع فيسبوك, الوضع مختلف تماماً عن باقي الشبكات الإجتماعية…
من المفترض في كل الشبكات الإجتماعية إن أزرار ال CTA اللي اتكلمنا عنها في النقطة رقم 1 تكون بألوان ظاهرة شوية ومميزة وبحجم كبير, وتكون الصورة نفسها بألوان هادية شوية… أو العكس, إن الصورة نفسها تكون ألوانها فاقعة وقوية وال contrast بتاعها عالي جداً عشان تكون ظاهرة بشكل بارز وسط تصميم الشبكة الإجتماعية وتلفت النظر بالتالي تاخد أعلى كليكس..
لكن في فيسبوك, الوضع مختلف شوية – حسب التجارب – كل ما كانت الصورة ممتزجة أكتر مع تصميم الفيسبوك نفسه كل ما كان معدل الضغط على الصورة أعلى, أكتر الصور اللي بتاخد ضغطات هي الصور اللي غالب عليها اللون الأبيض والرمادي والأزرق من درجات زي #4c66a4 … وكل ما كانت الصورة بسيطة وهادية كل ما كانت الكليكات عليها اعلى اكتر…

قارن الصورتين الجايين وتخيلهم على فيسبوك:
colors

إذا كنت متخيل إن الصورة اللي على اليمين هتحقق كليكات أكتر, تبقى محتاج تجرب بنفسك!

ملحوظة هامة: إتباع الألوان البيضا والرمادي مع الأزرق في الصور اللي بتشيرها على فيسبوك مع اللينك, بيرفع معدل الضغط بشكل عالي جداً بيتراوح بين 16% إلى 28% .

4- إستخدم بروتوكولات فيسبوك open graph

لو كنت ما تعرفش فيسبوك أوبن جراف, فهي مجموعة من اكواد meta اللي بتتحط في منطقة ال head في موقعك عشان توصف المحتوى وتسهل على فيسبوك إنه ينشر اللينكات بتاعتك بالشكل المفضل ليك – إستعين بمطور مواقع أو إستشير مصمم ويب في النقطة دي لو ما عندكش الخبرة الكافية.
لو كنت لسه ما بتستخدمش فيسبوك أوبن جراف في موقعك, لازم تبدأ من دلوقتي حالاً إستخدامه!
لأن الناس اللي هتشير اللينكات بتاعتك على فيسبوك ممكن تكون بتشير اللينك بشكل مش حلو, ما يحققش زيارات بشكل كويس, وانتا بتخسر الشيرز دي على الفاضي!

قارن بين الصورتين الجايين, اللي على الشمال هوا شكل اللينك لما يتشير من غير أكواد open graph :
open-graph

لاحظ:
open graph بيستخدم عشان تقول لفيسبوك معلومات الصفحة الاساسية, ومن اهمهم النقط دي:
أ- صورة اللينك لما حد يشيره هتكون إيه؟
ب- عنوان الصفحة.
ج- وصف الصفحة ” الكلام اللى تحت العنوان ”
د- مين كاتب الصفحة أو الصفحة الرسمية على الفيسبوك.

من التجارب, إستخدام open graph كان أكتر حاجة حققت نجاح في رفع معدلات الضغط على اللينكات والحصول على ترافيك أعلى من فيسبوك, حوالي 38% إرتفاع في معدلات الضغط من اللينكات اللي الناس بتشيرها من الموقع بعد إستخدام فيسبوك open graph بطريقة صحيحة.

5- وقت نشر اللينكات ومعدلات النشر:

التوقيت اللي بتنشر فيه اللينكات تحديداً لازم يكون مدروس بنسبة كبيرة, لازم يكون وقت مناسب للمتابعين ليك إنهم يكونوا في الموود والحالة المزاجية المناسبة اللي تخليهم يقروا مقال كامل مش مجرد إنهم يشوفوا اللينك ويقرروا يقروه بعدين أو يحسوا إنه مش وقته..
فكر إمتى بيكون المتابعين بتوعك قاعدين أونلاين بأكبر عدد, ومستعدين لقراءة المقال ده تحديداً أو الضغط على اللينك ده؟

لمحة جانبية: في مصر الضغط على اللينكات أعلى في نص الأسبوع – تحديداً يوم التلات – عن ايام الأجازات زي الجمعة والسبت, غالباً الأيام التلاتة اللي في نص الأسبوع في نهاية اليوم ” من الساعة 10 إلى 1 بالليل ” هي أحسن وقت تنشر فيه لينكات وتاخد أعلى كليكات, الإتنين والتلات والأربع. في حين إن باقي أيام الأسبوع بتاخد فيه البوستات كومنتات أكتر أو تفاعل من خلال زرار لايك أكتر من الكليكات. وابعد عن نشر اللينكات في أيام الأجازة والراحة الأسبوعية, زي الجمعة تحديداً.

اللمحة دي هي الوضع الغالب, لكن يمكن الوضع عندك مختلف بإختلاف الشريحة المستهدفة من المتابعين أو نوع المحتوى الموجود عندك…
من خلال فيسبوك insights تقدر تعرف أكتر وقت الناس عندك بيكونوا فيه أونلاين, وبشوية تجارب لنشر لينكات في ساعات مختلفة من اليوم وأيام مختلفة مع قياس معدلات الضغط على اللينكات في الأوقات دي, هتقدر تحدد الناس الموجودين عندك أفضل وقت ليهم إمتى اللي فيه بيكونوا مستعدين للضغط على لينكات موقعك وقراية محتواه.
كمان التجارب دي هتعرفك:
أ- أكتر وقت المتابعين بتوعك بيتفاعلوا من خلال الردود إمتى؟
ب- أكتر وقت المتابعين بتوعك بيعملوا فيه شيير للمحتوى بتاعك؟
ج- أكتر وقت المتابعين بتوعك بيدوسوا عشان يقروا المحتوى بتاعك؟
إستخدم google analytics كمان مع تحديد العرض للزوار بالساعة خلال أيام الأسبوع هيساعدك في إستكشاف الساعات والأيام الأمثل!

بعد ما تخلص تجاربك, وتعرف الأوقات الأمثل لنشر اللينكات بتاعتك على فيسبوك للمتابعين بتوعك, حاول إنك تلتزم بيه بعد كدة قدر المستطاع, لأن نشر لينك واحد يحقق أقصى نتايج أفضل من نشر 10 لينكات بشكل عشوائي بيحققوا نتايج ضعيفة!

ملحوظة هامة: دورة حياة المستخدم داخل الفيسبوك حوالي 3 ساعات في المرة الواحدة, بالتالي إنتا تقدر تنشر اللينك نفسه هوا هوا أكتر من مرة في نفس اليوم من غير ما تقلق إنه يكون مكرر, طالما فاصل بين المرة الأولى والتانية بمعدل 3 ساعات فهو هيظهر ناس مختلفة.

ملحوظة كمان: معدلات نشر البوستات ممكن تزوده عشان تجيب ترافيك أكتر لو كان المستخدمين بتوعك معدلات ضغطهم على اللينكات عالي, مثال صفحة اليوم السابع على فيسبوك, تقدر تنشر لينك كل 10 دقايق لأن متابعينها معدل ضغطاتهم عالية على اللينكات.

6- الإهتمام بالتفاعل, بالذات أول 5 ردود في أول 5 دقايق!

والمقصود بالتفاعل هنا تحديداً هي الردود والكومنتات, هل تعلم إن كل ما زادت الكومنتات في أول ما اللينك ينزل, كل ما ده زود الكليكات على اللينك بتاعك؟
وبمجرد ما المتابعين بتوعك يسيبوا كومنتاتهم على البوست, لازم ترد على الكومنت بأسرع وقت ممكن… لأن ده بيعلي من ثقل البوست نفسه post weight كمان بيديله أولوية ظهور أكبر, وباقي المتابعين لما بيلاقوا ردود من ناس تانية على اللينك, ده بيثير فضولهم إنهم يدوسوا هما كمان على اللينك ويشوفوا في ايه بيحصل!
الرد على كل كومنت بينزل على اللينك بتاعك بيعلي الكليكات بمعدل حوالي 9% وخلي دايماً ردودك بتفتح الطريق لمزيد من التعليقات, لأن كل ما زادت التعليقات كل ما زادت الكليكات على اللينك بتاعك, بالتالي إنتا الكسبان…
تفاعل مع المتابعين بتوعك, فيسبوك شبكة إجتماعية ولازم تكون إجتماعي, أوعى تنسى ده.
وإبداء المتابعين رأيهم في اللينك اللي بتنشره يرجعنا للنقطة رقم 2, كل ما كان في آراء تثير فضول المتابعين للضغط على اللينك كل ما زاد معدل الضغط عليه.

ملحوظة جانبية: في أول 5 دقايق من نشر اللينك, فيسبوك بيحاول يحدد أهمية البوست نفسه كإجمالي وأولويته في الظهور وسط ال news feed لباقي المتابعين, الإهتمام بالدقايق الاولى شيء بالغ الأهمية… من التجارب, البوستات اللي بترد على الكومنتات بتاعتها في أول 5 دقايق بشكل سريع بتحقق معدلات وصول أعلى وكليكات أعلى بحوالي 11%

7- طول الجملة اللي بتتضاف مع اللينك وعدد كلماتها.

زي ما وضحت في النقطة رقم 2 إنتا محتاج تكتب بوست مع اللينك تقول فيه رأيك, لكن هل تعتقد إن طول البوست بيفرق؟

حسب كل التجارب, كل ما كان الكلام اللي هتكتبه وانتا بتشير البوست أقل كل ما كان أحسن, في تقسيمات للبوستات على الشبكات الإجتماعية عموماً من ناحية عدد الحروف ونسبة التفاعل مع طول البوستات:
قصير جداً : من 0 إلى 40 حرف.
مختصر: من 41 إلى 70 حرف.
متوسط: من 71 إلى 100 حرف.
مثالي: من 101 إلى 140 حرف.
طويل: أكتر من 141 حرف.

على فيسبوك, الوضع الأمثل هوا إن البوست يكون ” متوسط ” من 71 إلى 100 حرف, خاصة مع كترة إستخدام فيسبوك من الموبايل, ماحدش عنده القدرة إنه يقرا كتير في المقدمات, كمان كل ما كانت المقدمة مختصرة ومباشرة وجذابة وتثير الفضول كل ما ده أدى إلى كليكات أكتر.
حاول تلتزم بأقل من 100 حرف ” يتضمن المسافات والعلامات ” ده هيجيبلك تفاعل أعلى بنسبة تصل إلى 66% أعلى من البوستات اللي أكتر من 141 حرف. بالتالي كليكات أكتر بنسبة ما تقلش عن 15%

8- إستخدم الإيموشنز وبخاصة اللي بتظهر كويس على الموبايل emoji

إنتا في شبكة إجتماعية زحمة جداً, إنك تلفت النظر شيء مهم عشان تكسب اليوزر اللي بيقعد يعمل سكرول يدور على حاجة تعجبه وسط النيوز فيد عشان يتفاعل معاها او يقراها او يشوفها.
إستخدام الايموجي أو الرموز التعبيرية بالذات السائدة والمستخدمة بكثرة على الموبايلات هتعلي الكليكات على اللينكات بتاعتك بشكل لا تتوقعه, لأنها هتلفت النظر في البداية, وبعدين هتضفي على اللينكات بتاعتك روح اكتر إجتماعية تخلي المتابعين يدوسوا وهما عندهم إحساس مسبق ناحية المقال..
شوف المثال ده:
إزاي تخلق حالة

لمحة جانبية, لو عاوز تستخدم الايموجي الخاصة بالموبايل ومش عارف تجيبها وانتا على الكمبيوتر, إستخدم الموقع ده للبحث وإستخدام الرموز التعبيرية زي ما تحب getemoji.com وما تقلقش لو ظهرتلك في شكل مربع كود, خد المربع ده كوبي وبيست وهينزل في البوست عادي شكله مربع لكنه من الموبايل هيبان بشكل الرمز التعبيري المقصود..

9- عنوان اللينك, أخطر شيء!

شوف الفيديو ده الأول:

لو ما اشتغلش معاك الفيديو, جرب من اللينك ده:
https://www.facebook.com/a.samy/videos/10155926929605430/

بعد ما شوفت الفيديو ده خليك فاكر, نفس المعنى ولكن بكلمات مختلفة…. ده شيء لازم تفكر فيه مليون مرة قبل ما تنشر أي لينك على فيسبوك… إزاي تستخدم الكلمات المهمة اللي بتأثر في المتابعين بتوعك وبتشد إهتمامهم وبتخليهم يتفاعلوا أكتر ويدوسوا أكتر على النوعية دي من اللينكات, وتخلي عنوان المقال بتاعك بيتضمن الكلمات دي…
ممكن تستخدم كمان الايموجي في عنوان اللينك, وممكن تحط في عنوان اللينك CTA
فكر كمان إنك ممكن تنشر اللينك مرتين بعنوانين مختلفين, وتقيس معدل الضغط على اللينك في كل عنوان نزلته…

عشان تعرف الكلمات المؤثرة في المتابعين بتوعك, راجع الزيارات اللي حصلت على موقعك من بدايته ولحد دلوقتي, مع تحديد المصدر فيسبوك, وشوف عناوين المقالات, غالباً هتلاقي بينها كلمة أو اتنين متشابهين في المعنى والمضمون, إعرف إن دي الكلمات الكسبانة وابدأ إستخدمها هي ومرادفاتها دايماً في عناوين المواضيع.
كمان من عناوين المواضيع اللي دايماً كسبانة مهما إختلف المجال اللي بتتكلم عنه:
أ- الإختبارات والألعاب اللي بتتضمن الأسئلة وتحديد الشخصية Quizzes
ب- صيغة أفعل + رقم ” زي: أفضل 10 كذا كذا أو أكبر 7 كذا كذا ”
ج- الحاجات المتعلقة بالأكشن والدراما, زي العناوين المتعلقة بالمصايب والكوارث والتعذيب – للأسف – ولكن تقدر تستخدمها بطريقة إنها كانت هتحصل لكن ما حصلتش.. أو يمكن كانت تحصل لو ما قريتش المقال ده 😉
د- العناوين اللي بتحكي قصة وبعدين تقف في نص القصة ” زي: هذا الرجل كان ينوي إحتلال شبرا ولكن بعد تدخل تلك المرأة شاهد ماذا حدث.. ”
هـ – الحاجات العلمية الصادمة اللي لا يصدقها عقل طبيعي, زي مثلاً ” إكتشاف جبل من اليورانيوم المخصب في الصحراء الغربية يعود إلى عهد الفراعنة ”

الأمثلة السابقة على قد ما تبان ما تنفعش غير في حالات معينة أو نوعية معينة من المحتوى, ولكن تقدر تعيد تهيئة عناوين لينكات موقعك عند نشرها على فيسبوك عشان تكون بنفس معانيها الموجود في مضمون النص ولكن بطريقة العرض المناسبة أكتر للنشر على فيسبوك والحصول على كليكات أكتر.

ملحوظة: عنوان اللينك اللي بتنزله على فيسبوك ممكن يوصل لحد سطرين مافيش مشكلة, ولكن أفضل شيء إنه يكون برضه لا يتجاوز 100 حرف وبحد أقصى 140 حرف, وحاول تبعد عن حروف الجر أو الكلمات اللي بتاخد مساحة على الفاضي.

الخلاصة:

المرة الجاية قبل ما تنزل لينك على صفحتك على فيسبوك للمتابعين بتوعك, راجع الأول النقط التسعة اللي إتكلمنا عنهم هنا:
1- الكول تو أكشن.
2- قول رأيك الشخصي في البوست وانتا بتشير اللينك.
3- خلي ألوان الصورة اللي هتستخدمها مايل للأبيض بشكل أكبر مع الرمادي والازرق ” وأوقات الموف بيظبط ”
4- راجع الديفولبر وإتأكد إنك بتستخدم facebook open graph بشكل صحيح وكامل
5- إعمل تجارب وتحليل للوقت الأمثل اللي تنزل فيه اللينكات.
6- إهتم بالكومنتات وما ترميش اللينك وتمشي.
7- خلي البوست اللي نازل مع اللينك ما يزيدش عن 100 حرف.
8- إستخدم الرموز التعبيرية والايموجي.
9- عنوان اللينك لازم يتضمن الطريقة اللي تجيبلك أعلى كليكات ” نفس المعنى ولكن كلمات تانية ”

دلوقتي بقى معاد التطبيق العملي, شيير المقال ده عندك وطبق فيه الحاجات دي, وما تنساش تعملي منشن 😉

Facebooktwittergoogle_plusredditpinterestlinkedinmail

بحوث التسويق | قائمة المعلومات والملفات المهم تجميعها قبل وضع الخطة التسويقية

بحوث التسويق هي مجموعة من المعلومات بتجمعها كواحدة من الخطوات الأولى قبل وضع خطة تسويق ناجحة للعمل سواء كان التسويق لشركة أو منتج أو مؤسسة أو غيره,

البحث التسويقي او بحوث التسويق هي عملية من إفتراض الأسئلة ومحاولة الحصول على إجابات ليها, وهنا بتظهر مشكلة تانية عند بعض متخصصين التسويق, هي عدم القدرة على إفتراض الأسئلة أو عدم وجود قائمة مرتبة ومنظمة بكل المعلومات اللي ممكن يسأل عنها او يحاول يدور على إجابتها.

دي قائمة بالمعلومات والملفات المهم معرفتها و تجميعها عشان تساعدك في الخطة التسويقية وهتساعد كمان في دعم إتخاذ القرارات في البيزنس عموماً بعد كدة لو واجه مشكلة معينة من خلال تحليل المعلومات دي.

الملف الأول: معلومات عن الصناعة نفسها أو مجال العمل

  • حجم المجال وارقام واحصائيات عن الصناعة نفسها.
  • معدلات النمو للمجال والتوقعات المستقبلية ليه.
  • نسبة هامش الربح في المجال.
  • توقعات أو إحصائيات المكسب الإجمالي للي بيشتغلوا في المجال.
  • الأحداث الموسمية اللي بتأثر على المجال.
  • الأحداث الإقتصادية اللي بتأثر في المجال.
  • المجالات الأخرى اللي بتأثر بشكل مباشر أو غير مباشر على المجال.
  • قنوات التوزيع المعتادة.

الملف التاني: معلومات عن العملاء

  • حجم وعدد العملاء المهتمين بالمجال.
  • النسبة المئوية لأنواع العملاء ( رجال – نساء ).
  • النسب المئوية لأعمار العملاء.
  • نسب الجنسيات او بلد الأصل.
  • النسب المئوية للمستوى التعليمي.
  • متوسط الدخل الشهري والسنوي.
  • الحالة الإجتماعية ( أعزب – متزوج.. إلخ ).
  • حالة السكن ( مع الأهل – منفرد – مع أصدقاء ).
  • عدد المتواجدين في المنزل.
  • عدد الأطفال للمتزوجين.
  • عدد وأنواع الحيوانات الأليفة.
  • المهن والوظائف.
  • الجرايد وقنوات التليفزيون ومواقع الانترنت ” الميديا ” اللي بيتابعها.
  • النسب المئوية لتقسيمات قطاعات السوق الاساسية لمجموعات متوافقة الخصائص الديموجرافية والإجتماعية والسلوكية زي تقسيمهم بناءا على السن والمربع الجغرافي والمستوى الدراسي أو طبقاً لأسلوب الحياه lifestyle.
  • متوسط عدد الأصدقاء أو زمايل العمل.
  • عدد ساعات العمل ومواعيدها والاجازات الاسبوعية والسنوية.
  • الأماكن اللي بيروحها بصورة دورية وعدد الساعات اللي بيقضيها فيها.
  • النسب المئوية للتوزيعات الجغرافية.

الملف التالت: العادات الشرائية وأساليب الإنفاق

  • أكتر 10 منتجات – على الأقل – شراءاً ومعدل تكرار الشراء خلال الشهر الواحد.
  • معدل الإنفاق الشهري.
  • مكان السكن إيجار جديد/قديم/تمليك.
  • عدد السيارات أو العقارات المملوكة.
  • طريقة الدفع المفضلة ( كاش/فيزا/حوالات بنكية/شيكات.. إلخ ).
  • اسلوب الدفع المفضل (يد بيد/من خلال الانترنت/ بإستخدام وسيط زي فوري أو فودافون كاش).
  • متوسط المدخرات السنوية والشهرية.
  • توقيت وحجم المدفوعات الضخمة الموسمية (زي سفرية المصيف أو دخلة رمضان أو دخلة العيد).
  • اماكن اسواق الشراء المفضلة (محلية/عالمية/من خلال الانترنت).

الملف الرابع: العوامل المحفزة

  • منظور العميل للمنتجات او الخدمات المشابهة المقدمة من المنافسين.
  • وجهة نظر العميل في القيمة او الجودة للخدمات والمنتجات المشابهة المقدمة من المنافسين.
  • تفضيلات العملاء بين الجودة, الارتياح للمنتج او الخدمة, السعر.
  • متخذ القرار الأساسي أو المتحكم في اتخاذ القرار ( درجة القرابة او المركز في الشغل, النوع راجل ولا ست ).
  • المشاركين في صناعة القرار او الناس اللي بيتم استشارتهم ( اصحاب العمل, الأصدقاء العاديين, احد افراد العائلة ).
  • ردود أفعال العملاء على الاعلانات وطريقة تعاملهم مع الرسائل الإعلانية ومدى تقبلهم ليها.

الملف الخامس: حجم المنافسة

  • المنافسين المباشرين والغير مباشرين في السوق.
  • المنافسين المحتملين مستقبلياً في السوق.
  • نقاط القوة والضعف بالأخص الى الجودة, الارتياح من جانب العملاء, السعر.
  • الترتيب في السوق لكل منافس والحصة السوقية.
  • اسباب التميز والفروق بين المنافسين والصورة الذهنية اللي بيوصلوها دايماً لعملائهم وانطباع العملاء عنها.
  • قنوات الإعلانات واساليبها ومدى نتايجها وإحصائيات قدرتها على تحقيق الأهداف.
  • مقدار المبيعات السنوية/الشهرية.
  • مقدار المكاسب السنوية/الشهرية.
  • أماكن التواجد الجغرافي.
  • قنوات التوزيع.
  • المصادر والموردين للمنتجات الاساسية او المواد الخام, واماكن التخزين.
  • سياسات التسعير المتبعة عند المنافسين.
  • ردود الأفعال تجاه الأفكار الموجودة حالياً في المنتجات المنافسة ومدى تقبلهم لفكرة المنتج أو الخدمة اللي بتقدمها.

الملف السادس: الظروف المتحكمة في إتجاهات السوق

  • الوضع السياسي, الوضع الإقتصادي, الحالة المجتمعية.
  • السياسات الحكومية الحالية والمستقبلية اللي ممكن تأثر على البيزنس, السوق, أو المجال.
  • العوامل الإقتصادية اللي ممكن تأثر على اتجاه السوق حالياً أو مستقبلياً.
  • الجو والحالة المناخية وتغيراتها.
  • الظروف والظواهر الطبيعية والبيئة.
  • الاتجاه العام لتحركات الاسعار (بتعلى ولا بتقل ولا ثابتة)

 

ولأن معرفة المطلوب أو الهدف بيختصر نص الطريق و بيساعدك إنك تحدد أفضل الأساليب اللي ممكن توصلك ليه وازاي تقدر تستخدمها, فإنتا كمسئول عن التسويق لازم تسأل نفسك سؤالين بعد ما تقرا النقط اللي فاتت وقبل ما تبدأ عملية البحث التسويقي:

ايه هي المعلومات اللي أنا محتاجها بالظبط؟
ليه أنا ممكن أحتاج المعلومات دي وهتفيدني إزاي في بناء الخطة التسويقية؟

إجابة السؤالين دول بعد معرفة كل النقط اللي قريتها دي, هتختصر عليك 70% من طريقك وانتا بتعمل البحث التسويقي وكمان وانتا بتحط الخطة التسويقية.

لو عاوز تتفرج على دردشة الويك إند مع #ديجتاليزر عن بحوث التسويق, شوف الفيديوهين دول:

الجزء الأول من دردشة الدراسات التسويقية وبحوث التسويق:

الجزء التاني من دردشة البحوث التسويقية ودراسة السوق:

Facebooktwittergoogle_plusredditpinterestlinkedinmail

العلامة التجارية المؤثرة | إزاي تخلق حالة

إنك تخلق ” حالة ” عند العملاء المستهدفين للبيزنس بتاعك هي الطريقة اللي المفروض تفكر فيها وانتا بتفكر في إشهار وتمييز العلامة التجارية أو البراند الخاص بالبيزنس بحيث تستبدل الشكل التقليدي للبراند يإنك تخلق حالة كاملة مليانة بالحب والتقدير من طرف العميل للبيزنس لأن ده هوا اللي هيوصلهم لمرحلة الولاء الحقيقية اللي بتتمناها.

وده لأن ولاء العميل للبيزنس بتاعك عمره ما هيكون لسبب معين, دايماً الولاء أبعد من أي سبب.. الإرتباط العاطفي بالبراند بيحصل كنتيجة لحالة كاملة بيعيشها العميل وما بتعتمدش على أسباب حقيقية ملموسة أو مميزات وعيوب زي العلاقات العاطفية بالظبط 🙂

في بعض المفاتيح المهمة اللي تقدر من خلالها تخلق حالة للعلامة التجارية للبيزنس تخليها علامة مؤثرة حقيقية وغير تقليدية, وتقدر من خلالها تكسب الحب والتقدير المطلوب من الشريحة المستهدفة عشان توصل لمرحلة الولاء اللي بتتمناها:

المفتاح الأول: ” في التسويق إحنا مش بنبيع منتجات إحنا بنبيع قصص “

خلي للعلامة التجارية بتاعتك حكاية, قصة كاملة مليانة بالغموض والأسرار, ليها ماضي وحاضر ومستقبل, أربطها مع الأساطير والقصص الشعبية والمواريث الشعبية, ضيف ليها أيقونات ورموز مشهورة, وخلي الحكاية مليانة بالإيجابية والإلهام والخيال.

عشان كدة, من أظرف البراندات اللي ممكن تشتغل عليها هي البراندات اللي قايمة على القصص زي قنوات التليفزيون او الأفلام أو اللي قايمة على الكتاب الروائيين والمغنيين والأشخاص المشهورة.

المفتاح التاني: ” حرك الحواس الخمسة عند المتلقي, ولو قدرت تحرك الحاسة السادسة كمان “

الصوت: أربط العلامة التجارية بتاعتك بصوت معين – لحن – أو نغمة معينة,
البصر: إهتم بالصور والتفاصيل وخليها مربوطة بالقصة وخلي الصور فيها إلهام وإيجابية وروح وتشد العين,
الشم: خلي البراند بتاعك ليه ريحة معينة مرتبطة بيه – على سبيل المثال معطر جو ثابت في مقر الشركة أو منافذ البيع – أو كلمهم عن ريحة معينة هتفضل فاكرها لما تسمع اسم البراند,
اللمس: إهتم بملمس منتجات البراند, اتكلم عن إحساس العميل وهوا بيلمس المنتجات بتاعة البراند ووصله الشعور ده, اهتم في الصور اللي بتستخدمها إنك تعبر عن الملمس وتوحد إحساس الملمس من خلال الصور كمان.
التذوق: البراند بتاعك لازم يكون ليه طعم حتى لو ما كانش بيتاكل, هتحسه من ألوانه ومن ريحته وملمسه.

عشان كدة, أسهل البراندات اللي ممكن تشتغل عليها هي البراندات اللي فيها أكل أو بإسم فاكهة زي الشركة العظيمة Apple أو BlackBerry لأنك هيكون بسهولة تقدر تحرك كل الحواس عند العميل وبتديك قدرة أكبر على استخدام المفتاح التاني بسلاسة.

المفتاح التالت: ” خليك لطيف وصاحب حقيقي “

والمقصود هنا مش إنك تكون دمك خفيف وبتهرج, ولا إنك تكون طول الوقت موجود… في فرق كبير بين اللطافة وحس الدعابة, في بعض المواقف وبعض البراندات بيكون من اللطف إنك ما تستخفش دمك أو ما تستظرفش لأن الشريحة المستهدفة جادة تماماً – على سبيل المثال براند خاص بمعامل تحاليل – خاصة لو كان البراند اللي بتديره او بتشتغل على البراندينج ليه بيتكلم عن حاجة علمية أو معلوماتية جادة.

لازم يكون عندك إلتزام دائم بتعبر عنه, وتوضح قد إيه إنتا ملتزم في تنفيذ وعودك وفي تواجدك بالشكل المناسب المنتظر من العميل دايماً, وده أحسن من إنك تكون متواجد طول الوقت لكن بمظهر ما يتوافقش مع توقعاته.

وإنك تكون صاحب حقيقي, دي بيكون أساسها التعاطف مع إهتمامات الشريحة المستهدفة والتقدير لعقليتهم – مش العطف – بحيث تقدر طول الوقت تبان في دور الصديق اللي ما بيخزلوش في الموقف اللي بيحتاجه فيه, ودايماً بيكون ظهوره في اللحظة دي هوا اللي خلاها لحظة سعيدة ومريحة وإنك حاسس بيه وبمشاكله وبتحلهاله – مثال إعلان مولتو 6 قطع بدل 5 قطع عشان تكمل البق الأخير في الإزازة اللي موجود في المترو -لازم دايماً الناس اللي بتوجهلهم رسالة البراندينج يحسوا إنك شغوف بيهم وبتحبهم وبتقدملهم صورة البراند في إطار من الحب والأحاسيس المنعشة – مثال إعلان كادبوري 25 سنة سعادة – تحاول دايماً تخلق لحظات سعيدة مليانة بالمشاعر وتشاركهم فيها.

الخلاصة:

انك تهتم بخلق حالة تعبر عن البيزنس أفضل بكتير من إنك تهتم بالبراند نفسه في حد ذاته كبراند, وإنتا بتشتغل على تسويق بيزنس معين أو بتعمل براندينج, لازم تفكر في التالي:

1- الإعتماد على تقوية المميزات وإظهارها وتلافي العيوب وإخفائها مجهود كبير جداً مش هتوصل منه لنتيجة مرضية في آخر المطاف, المنتج في حد ذاته ومواصفاته ومكوناته حاجة مادية مالهاش روح مش هتقدر منها تكسب تقدير الشريحة المستهدفة ولا حبهم.

2- الموضوع مش مجرد صوت عالي, مش معنى إنك قدرت تعمل فكرة جديدة وفرقعت إنك نجحت في البراندينج او تمييز وبنا علامة تجارية صح, لو فكرت تعمل بدعة أو تقليعة جديدة وتبقى موضة, ممكن الناس تحبها في الأول وهيعملوها ويجربوها ويتبسطوا منها بس صعب منها تكسب تقديرهم وإهتمامهم الدائم وولائهم, ومع الوقت كل موضة بتروح وبتنتهي طالما ما قدرتش تكسب ولاء العميل.

3- البراندات بشكلها التقليدي وطريقتها المعتاد عليها بتقدر تكسب التقدير من العملاء المستهدفين, وبتقدر توصلهم بشكل صح يخليهم يحترموها, لكن من غير ما يحبوها عمرهم ما هيكون عندهم ولاء ليها وبمجرد ظهور براند منافس يتفوق على البراند بتاعك من الناحية المادية هتفقدهم.

4- لازم تفكر إنك تخلق حالة كاملة من الحب والتقدير, مبنية على 3 مفاتيح اساسية:
— قصة فيها تشويق وغموض وأحداث وتفاصيل ومربوطة مع ثوابت راسخة عند العميل.
— مراعاة ومحاولة تحريك الحواس والمشاعر كلها وتعييش العميل معاك في المود بالكامل.
— علاقة صداقة لطيفة بين البيزنس وبين الشريحة المستهدفة.

إزاي تخلق حالة وتؤسس علامة تجارية مؤثرة

وخليك فاكر:

” عشان توصل الشريحة المستهدفة إلى مرحلة الولاء للبيزنس لازم تخلق حالة كاملة من التواصل العاطفي اللي بدوره هيوجد حالة من الحب والاحترام والتقدير ناحية العلامة التجارية بتاعتك, وساعتها هتكون علامة مؤثرة حقيقية “

Facebooktwittergoogle_plusredditpinterestlinkedinmail

التسويق من خلال الشبكات الاجتماعية social media #ديجتاليزر كريم سمارة

ورشة عمل فنون التسويق من خلال الشبكات الاجتماعية social media مع كريم سمارة ضمن ورش العمل الخاصة بإعداد متخصصي التسويق الرقمي في #ديجتاليزر – فيديو كامل للورشة

Facebooktwittergoogle_plusredditpinterestlinkedinmail

إستراتيجية التسويق من خلال الشبكات الإجتماعية – 46 نقطة لازم تعرفهم الأول

خطواتك يا ‫#‏ديجتاليزر‬ عشان تستعد لإعداد خطة إستراتيجية للتسويق من خلال الشبكات الإجتماعية:

قبل ما تبدأ لازم تعرف دول:

1- فكر في إجابة السؤال ” ليه أنا عاوز أعمل ده؟ ” قبل ما تسأل السؤال ” ازاي أعمل ده؟ ”

2- الأدوات بتتغير, الإمكانيات المتاحة في كل أداه بتتغير, التكتيكات بتتغير, مافيش أداه في مجال الديجتال ماركتنج بتفضل موجودة مدى الحياه ومافيش إمكانية مضمون إنها تفضل موجودة, بناءاً عليه مافيش تكتيك يستحق لقب أفضل تكتيك, كل مرة بظروفها.

3- ركز على إزاي تكون فعلاً ” إجتماعي ” مش إزاي تعمل ” تسويق من خلال الشبكات الإجتماعية ”

4- أهمية الشبكات الإجتماعية الاساسية بتتلخص في إنها:
— بتديك قدرة على عمل والتحكم بشكل كويس ومرتب في العلاقات الشخصية.
— بتديك القدرة على إدارة العلاقة بين الشريحة المستهدفة والبيزنس مباشرة.
— كل شيء قابل للقياس, وده بيفيدك في عمل الدراسات والتحضير والترتيب وإتخاذ القرارات في البيزنس بشكل ذكي وفعال.
— بتوفرلك معلومات مفصلة عن طبيعة وحقيقة الشريحة المستهدفة وسلوكها.

5- الحمام الزاجل, إشارات مورس, التليفون, الفاكس, الإنترنت, الإيميل, الشبكات الإجتماعية, في كل تطور من اساليب التواصل الناس بتطور البيزنس بتاعها ويستغل التطور ده بالشكل الأمثل في إنجاح البيزنس, مش العكس..
الناس المفروض ما يعملوش البيزنس نفسه قائم على اسلوب التواصل بس.

6- تجنب الحملات الإعلانية على الشبكات الإجتماعية لو ما عندكش إستراتيجية كاملة لإدارة الحملة الإعلانية واستغلالها إلى أقصى نتايج منها خلال فترة قصيرة, وفي الحالة دي يفضل إن الاعلانات على الشبكة x ما تكونش بتودي على قناتك التسويقية على نفس الشبكة, يفضل تكون الاعلانات على الشبكة x بتودي على قناتك التسويقية على الشبكة y.

7- خليك مركز إن دي ” شبكة ” يعني كل شيء مترابط ومتداخل ومتصل جداً مهما كان صغير زي الشبكة و ” إجتماعية ” يعني كل شيء بتعمله لازم يبقى ليه طابع وروح إجتماعي حقيقي مش طابع جاف أو مالوش روح محددة المعالم.

8- القواعد واحدة على كل الشبكات الإجتماعية مع إختلاف أفكارها وطرقها, لو وصلت لفهم القواعد هتطبقها على باقي الشبكات بسلاسة, الفرق بيكون بس طريقة تقديم المحتوى وطريقة التواصل الإجتماعي على كل شبكة.

9- لو ما عندكش محتوى متناسب مع الشبكة x ما تتعاملش عليها, ودور على شبكة تانية, لو طريقة التواصل الإجتماعي على الشبكة x غير متوافقة مع قدراتك الإجتماعية ما تتعاملش عليها ودور على شبكة تانية.

10- لو هتشتغل بشكل غير مركزي, لازم يكون عندك فريق متوافق في نفس الخواص الإجتماعية ومختلف في القدرات الإبداعية, لو الفريق اللي هيشتغل معاك غير متوافق في الخواص الإجتماعية, يفضل تخلي الشغل بطريقة مركزية تماماً ” تبعتله التاسك وهوا يبعتهولك وانتا اللي تعرضه في الآخر ” وتمنعهم من التواصل المباشر خالص مع الشريحة المستهدفة.

11- مافيش طريقة تتعلم بيها تكون شخصية إجتماعية متوافقة مع الشريحة المستهدفة من البيزنس, لو جالك بيزنس في مجال شخصيتك الإجتماعية مش هتتوافق فيه مع الشريحة المستهدفة, فإنتا مش هتنجح في إستغلال الشبكات الإجتماعية في تسويقه بالعكس إنتا هتضر اهداف البيزنس كله.

12- خليك إيجابي طول الوقت وبتشع طاقة إيجابية, لو ما عندكش المهارة دي في حياتك الطبيعية يبقى المنطقة دي من التسويق مش هتنفعك.

13- التسويق من خلال الشبكات الإجتماعية محتاج يكون عندك الحاسة السادسة, الكونسبت نفسه عبارة فن التعامل مع المواقف اللحظية والإحساس بروح أهداف البيزنس وطرق تحقيقها, مش علم أو طريقة معينة تعمل بيها الحاجات دي.

14- إرسم شكل تخيلي لمثال من كل شريحة بتتعامل معاها على الشبكات الاجتماعية واكتب عليه نسبته من الاستهداف, وارسم قدامه شكلك اللي انتا متخيل إنه شايفك بيه واكتب عليه نسبة نجاحك من المحافظة على المظهر ده.

15- إجمع وراجع المعلومات طول الوقت عن:
— شخصية عشوائية بتعبر عن الشريحة المستهدفة.
— إحصائيات الشبكات الإجتماعية ونسب الشريحة المستهدفة بتاعتك منهم.
— إحصائيات الويب عموماً ونسب تحرك الشريحة المستهدفة على مختلف الشبكات الإجتماعية فيه.
— إحصائيات الإندستري بتاعة البيزنس نفسه ومدى تفاعل الشريحة المستهدفة مع الإندستري دي.

16- إسمع وراقب وقارن:
— إستخدم أدوات متخصصة للمراقبة والمتابعة.
— إيه اللي بيتقال عن البيزنس بتاعك؟
— إيه اللي بيتقال عن الموضوعات اللي تهم الشريحة المستهدفة بتاعتك؟
— إيه اللي بيحرك الشغف جوة الشريحة المستهدفة بتاعتك؟
— مين اللي بيقولوا الكلام اللي بيعجب الشريحة المستهدفة بتاعتك؟
— بيقولوا الكلام ده فين بالظبط وامتى وازاي؟

17- حلل الأرقام الاساسية ” key metrics ” للمنافسين على الشبكة الإجتماعية اللي إنتا شغال عليها:
— معدل زيادة المتابعين.
— الناس اللي مهتمة تتكلم عن المنافس.
— معدل النشر للمحتوى.
— معدلات التفاعل.
— حجم وعدد وقدرة الوصول للشريحة المستهدفة.
— عدد المتفاعلين قياساً بالعدد الإجمالي للمتابعين. ” عدد المتابعين / عدد الناس اللي بتتفاعل ”
— معدل زيادة المتفاعلين قياساً بمعدل زيادة المتابعين. ” اقسم ده على ده برضه ”

18- إجمع نتايج أرقام المنافسين كلهم وقارن وطلع منهم نسبتك المئوية عموماً واعتبرها مؤشر قياس لمدى نجاحك وراجعه كل فترة.

19- إختار حاجة واحدة بس تركز عليها كل فترة من الحاجات دي وحط طرق سلسة للتنقل بينهم في كل مرحلة:
— توعية وتعريف باهداف اللبيزنس.
— زيادة المبيعات وتحويل المتابعين إلى عملاء.
— العلاقة بين الشريحة المستهدفة والبيزنس.

20- كل مرحلة زمنية إعتبر نفسك طالع رحلة يوم واحد للعين السخنة مع الناس المتابعين, وهتمشي معاهم الرحلة دي على الخطوات التالية:
— ما حدش يعرفك فيهم لسه أصلاً.
” نبدأ الرحلة والباص يتحرك. ”
— يالا بينا نتعرف.
“وإحنا في الطريق قبل ما الباص يوصل ”
— طب جرب كدة.
” وصلنا والناس بتغير وبتستعد تنزل البحر ”
— تكرار الرسالة الاساسية / التحميس ورفع الإيجابية.
” نزلنا البحر كلنا وبنلعب بقة وبنقضي اليوم وبنستمتع ”
— المدافعة عن البيزنس واساسياته وصد الهجوم وتصحيح المفاهيم.
” وإحنا طالعين ناخد شاور ونروح نتغدى في حد كان جاي متأخر ومش فاهم وبيضايق باقي الناس ”
— تهدئة الوضع, جمع المعلومات عن الفترة اللي فاتت والتحضير للي بعدها وإعادة الخطوات.
” راجعين في الطريق ومطفين النور والناس نايمة ”

21- ركز على إن انتقالك بين الاهداف والرسائل التسويقية يكون سلس ومقنع وما يفصلش اللي بيتابعك باستمرار, وما يكونش غريب على اللي لسه عارفك في نص المشوار.

22- راجع رسايلك القديمة الأعلى تفاعل, وإضمن إنك ما خرجتش برة إطار الأهداف الرئيسية وما بتناقدش نفسك وصورتك الإفتراضية عند الشريحة المتابعة.

23- لو حاولت تعمل كل حاجة من خلال الشبكات الإجتماعية, مش هتعمل حاجة خالص على المدى البعيد.

24- الهدف مش إنك تبقى كويس في التسويق من خلال الشبكات الإجتماعية, الهدف إنك تفيد أهداف البيزنس وتحققها.

25- طول الوقت إتأكد إنك بتقيس المؤشرات الاساسية السائدة لضمان نجاح البيزنس وبتحقق إرتفاع وتقدم إيجابي فيها:
— التوعية والتعريف بالبيزنس نفسه وأهدافه بشكل واضح.
— مدى التأثير في تحويل المتابعين إلى عملاء محتملين أو عملاء فعليين أو زيادة المبيعات.
— مدى قدرتك على إدارة العلاقة بين الشريحة المستهدفة والبيزنس بشكل صحيح على مستوى إنشاء العلاقات الجديدة وتطوير العلاقات الحالية وصد الهجوم وتحسين العلاقات السيئة.

26- القياس في الشبكات الإجتماعية بيكون قياس التأثير في ” سلوك المستهدفين ” مش قياس ” زيادة أعداد المستهدفين ” .

27- القايمة الجاية دي هي المقارنة بين المؤشرات الضعيفة اللى الناس بتقيسها عادة وبتنسى المؤشرات القوية اللى كان المفروض تقيسها:

مؤشرات ضعيفة القيمة
— عدد المتابعين.
— المنشنز والشيرز والريتويت.
— عدد الضغطات على اللينكات والدخول للويب سايت.

مؤشرات أكتر قيمة:
— معدل التفاعل الإجمالي من المتابعين ونسبتهم.
— المحتوى اللي بيتم قرائته بالكامل ويوصل بشكل صحيح للمتفاعلين.
— عدد الليدز أو الكونفيرجن
” عدد اللي سجلوا في الويب سايت او سابوا ايميلهم او اشتروا المنتج من خلال الويب سايت بعد ما ضغط على اللينك ”

28- مش معنى إن كل شيء قابل للقياس إنك تقيس كل حاجة وخلاص. ركز بس مع اللي يهمك وليه معنى حقيقي وسيب الباقي عشان ما تتلغبطش.

29- راجع كل فترة توافق نوعية الناس المتابعين مع الشريحة الاصلية المستهدفة بتاعتك, وبناءاً عليه حدد لو إنتا محتاج تعمل تحديث في طريقتك واسلوبك وخطتك ولا محتاج تبعد عنك الناس اللي برة الشريحة المستهدفة وتكمل على طريقتك.

30- خلي عندك دايماً مكان او طريقة أو مرجع فيه خطوة خطوة إزاي تسحب المتابعين الجدد إلى داخل المجتمع بتاعك, بحيث يكون دليل مفصل بالخطوات البسيطة جداً للمتابعين الجدد إنهم يكونوا معاك ع الخط الحالي ويعرفوا يواكبوا الاحداث بسلاسة.

31- خلي عينك دايماً على الجانب الجغرافي والخصايص الديموجرافية من الشريحة المستهدفة, البلد والمدينة والحي والسكن, العمر والنوع. وإسأل نفسك دايماً:
— مين دول أصلاً؟
— هما بيستخدموا الشبكة الاجتماعية دي تحديداً ليه؟
— هما بيتعاملوا مع الشبكة الاجتماعية دي ازاي؟

32- إعرف الإحصائية دي, عادة دي النسب اللي بتمشي في معظم الأونلاين كوميونتي:
— بنسبة الربع 25% تقريباً بيكونوا مؤثرين وبيضيفوا محتوى.
— بنسبة التلت 30% تقريباً بيكونوا بتوع مناقشات وكومنتات وتنظير للمحتوى المضاف.
— بنسبة التلت وشوية حوالي 40% تقريباً بيكونوا مجرد مشجعين أو ناقدين أو متفاعلين على خفيف ” بيدوسوا لايك أو ديسلايك ”
— بنسبة الخمس 20% تقريباً بيجمعوا المحتوى اللي بينزل وبيعيدوا نشره مرة تانية.
— بنسبة اكتر من النص 60% تقريباً راشقين في اي حوار من غير ما يكونوا فاهمين, هيتحمسوا ويوافقوا ويدوك ايحاء انهم هينفذوا ويوعدوك ويخلوا بيك.
— بنسبة التلات اربع 70% تقريباً مراقبين اللي بيحصل ومترقبين سواء سعدا او متضايقين.
— بنسبة اقل من الخمس 17% بيبقوا مالهمش دعوة بأي حاجة ولاهيشاركوا مخعاك في اي حاجة.

33- لازم تحدد مدى التفاعل من جوة كل شريحة لوحدها, وتقسيم وضعهم بالنسبة لك عشان تعرف تتعامل معاهم, وتعرف تحط تاسكات للمتابعين بتوعك من كل شريحة بعد كدة وتعرف تقيس مدى تفاعلهم معاك, مثلاً:
— عملنا مسابقة إن المتابعين يضيفوا محتوى عن أحلى هدف في الدوري.
— الشريحة من 18-24, من القاهرة, الولاد, اللي عندهم خلفية عن الكورة: دول شاركوا بنسبة 30% في المسابقة كصانعين محتوى. = نسبة رائعة.
— الشريحة من 35-45, من المحافظات, الولاد, اللي عندهم خلفية عن الكورة: شاركوا بنسبة 5% في المسابقة كمناقشات او تنظير للمحتوى المضاف. = نسبة ضعيفة جداً.

34- لازم يكون ” إنطباع ” معين بتسيبه عند المتابعين بتوعك, إحساس بيوصلهم لما بيشوفوك, والإنطباع ده يكون حاكم كل حاجة بتعملها, طريقة الكلام, الصور والفيجوال, الرسايل, الألوان.. إلخ إلخ إلخ, زي مثلاً:
— آبل = الإبتكار
— كوكاكولا = الفرحة
— بي إم دابليو = المتعة

35- ما تعتمدش على العروض الخاصة كتير, لو إنتا صحابك عارفين إنك محمد بتاع العزومات, مش هيعرفوك غير عشان العزومات وعلاقتك بيهم هتبقى علاقة إنهم بيستغلوك بس لكن مش مهتمين بأي تفاصيل تانية, وانتا بتبني قواعد تسويق من خلال الشبكات الاجتماعية بتبقى عاوز المتابعين يعرفوا كل التفاصيل عن البيزنس وتبقى علاقة طويلة المدى مش عن العروض الخاصة اللى بيقدمها وبس وتبقى علاقة قصيرة المدى.

36- التفاعل بيتم بين الاشخاص, والعلاقات بتتم بين الاشخاص, لازم البيزنس بتاعك يكون أقرب إلى هيئة الشخص عنه من هيئة اللوجو, يفضل تفكر تعمل ” كاراكتر ” أو شخصية بتتكلم بإسم البيزنس, مع انه تكتيك قديم لكنه لسه شغال, أو يكون البيزنس بتاعك بيتكلم على الشبكات الاجتماعية كأنه شخص عادي مش كأنه لوجو بيتكلم… زي ماكدونالدز مثلاً أو تودو أو فيسبوك نفسه… لما بيتكلم بيتكلم كأنه شخص مش كأنه مجرد لوجو.
ودايماً عنده أكتر من شخص حقيقي بيتكلموا بإسم البيزنس كبشر طبيعين.

الشبكات الإجتماعية علاقات بين بشر مش بين بشر وبيزنس, لو أصبحت العلاقة بين بشر وبيزنس ده هيضر البيزنس نفسه, ولو البيزنس مش حابب يتعامل بصيغة بشرية من خلال الشبكات الاجتماعية عشان يحافظ على مظهر البيزنس لأي سبب كان, المفروض ما يستغلش الشبكات الاجتماعية للتسويق أو التفاعل, ويبقى استغلاله للشبكات الاجتماعية مجرد تواجد بس مش أكتر وقناة نشر أخبار للي بيبحث عن أخبار مش أكتر.

37- العلاقات بين البشر لازم يكون فيها مشاركة من الطرفين, في التسويق على الشبكات الاجتماعية لازم يكون عندك وسيلة هتخلي بيها المتابعين يشاركوا في تخليق المحتوى واضافة المحتوى معاك والمشاركة, أوعى تخلي الكلام من جهة واحدة ” اللي هوا البيزنس ” وان المتابعين ” مجرد متلقيين ” خليهم يشاركوا معاك في إنهم يكونوا مش مجرد متلقيين ويكون التواصل من الطرفين رايح جاي وتخليق المحتوى مشارك فيه الطرفين.

38- حافظ على هوية البراند, عن طريق إنك لازم تحقق تناغم بين كل القنوات وكل مواقع الشبكات الاجتماعية المختلفة اللى هتشتغل عليها, بحيث تحافظ على نفس الطريقة في الكلام ونفس هوية البراند بين كل الشبكات, لو حسيت إن في شبكة هتفقدك التناغم ده, ما تشتغلش عليها, أو فكر في طريقة تستغلها بيها من غير ما تفقدك هوية البراند.

39- لازم يكون عندك مبدأ القاعدة الاساسية, وقنوات تسويقية, مثال:

شبكية ويب بيزنس:
— الويب سايت قاعدة أساسية للتواصل.
— الفيسبوك وتويتر قنوات تسويقية بتحول ع الويب سايت.
أو شبكية إجتماعية:
— إنستجرام قاعدة اساسية للتواصل.
— مدونة بلوجر وبنترست وفيسبوك قنوات تسويقية بتحول على إنستجرام.
أو حتى مجتمع إجتماعي على شبكة واحدة:
— صفحة فيسبوك هي القاعدة الاساسية للتواصل.
— الهاشتاج هوا قناة تسويقية بتحول على الصفحة على فيسبوك.

40- إختار الشبكة الإجتماعية الاساسية تكون المتوافقة مع طبيعة الشريحة المستهدفة الأكبر وتضمن إنك هتركز معاها كقاعدة اساسية وباقي الشبكات هتبقى قنوات تسويقية, مثلاً:

الشريحة المستهدفة الأكبر: بنات – من السعودية – من 16 إلى 25 سنة, مهتمين بالموضة واللايف ستايل.
الشبكة الاجتماعية الامثل: إنستجرام.

الشريحة المستهدفة الأكبر: رجالة – من مصر – من 22 إلى 27 سنة, مهتمين بالسياسة والاخبار.
الشبكة الاجتماعية الامثل: تويتر

41- لازم تحط اساسيات وقواعد للمحتوى المرئي والصور, الالوان والستايل ونوع الصور واتجاهاتها واسلوبها وفكرتها وتحافظ إن ما ينزلش أي محتوى مرئي أبداً بإسمك يكون خارج إطار القواعد اللي انتا حاططها, بحيث بعد كدة طريقة تقديم المحتوى المرئي دي على الشبكات الاجتماعية تكون علامة بتفكر الناس بيك ولو حد عملها يبقى كأنه بيقلدك, مثلاً:

الورقة – إسلام جاويش
خلفية الصورة صفرا على شكل سكيتش, ألوان الرسومات بالاسود, الرسومات كلها خطوط مرسومة بالايد, شكل الرسمة مستطيل طولي, أوقات متقسم إلى أكتر من مستوى, عليه توقيع الراسم.

Cairo Zoom
الصور لازم تبقى واخدة هاي لايت موف أو أزرق غالباً ” إضاءة الكلوب أو الديسكو ” وريزلوشن الصور لازم يكون عالى جداً, الصور بتكون مربعة ومتساوية الابعاد, فيها ناس كتير في الصورة وبتعبر عن الحركة, أو فيها أشخاص اصحاب وبياخدوا صورة للذكرى, كل الصور لازم يكون الشخص مبتسم أو بيضحك, ما بيستخدموش صور من غير ما يكونوا هما اللى مصورينها.

42- تجنب إستخدام القوالب, أو اطار الصورة, أو وضع اللوجو على الصور ” قدر المستطاع ” أو إستخدام لوجوهات الشبكات الاجتماعية زي فيسبوك وتويتر على الصور, وما تكتبش كلام كتير على الصور, وإختار فونت واضح, وخلي الكتابة بلون واضح, ويفضل يكون وراها خلفية عكس اللون عشان تعمل وضوح كويس ويتشاف الكلام ويتقري بسهولة.

43- إعمل حسابك إن كل الصور اللى انتا بتنشرها يوم بعد يوم, هتكون بعد سنة محطوطة جنب بعض كلها في الالبوم كصور مصغرة, فلازم يكون شكلهم متناغم وقتها ما يكونش شكلهم مزعج جنب بعض.

44- كل قناة من قنوات الشبكات الاجتماعية أو منصة أو موقع جديد من مواقع الشبكات الاجتماعية بتستخدمهم, هي في الاساس تكلفة جديدة ومجهود أكبر بتفتحه على نفسك, ومش شرط يكونوا كلهم مفيدين, ركز على الشبكات المفيدة بس واللي عليها نسبة أكبر من الشريحة المستهدفة وما تشتتش نفسك, لما تبقى غطيتها بشكل كامل ” وده مستحيل ” إبقى اتوجه لغيرها.

45- إمسك ورقة وقلم يا #ديجتاليزر بعد ما قريت الكلام ده كله وفهمته, وجرب تحط خطة إستراتيجية كاملة للتحرك من خلال الشبكات الاجتماعية بقى بنفسك, دي المفاتيح وباقي الحاجات كلها بتختلف على حسب إختلاف البيزنس والشريحة المستهدفة

46- خليك فاكر, المعجزات بتتحقق لما بنصدق

Facebooktwittergoogle_plusredditpinterestlinkedinmail

مودي بولس مؤسس موقع ازاى دوت كوم – ديجتاليزر

تحذير هام! هذا البوست يحتوي على رغي كتير جداً… لو إنتا محبط أو ما عندكش وقت ما تقراهوش!

في اللينك ده يا ‫#‏ديجتاليزر‬ في تدريب وشرح للمبتدئين جداً خطوة بخطوة عن أساسيات إزاي تعمل موقع إنترنت بإستخدام لغة HTML اللغة الأساسية للترميز في أي موقع إنترنت في الدنيا.
http://goo.gl/NWY1PX

بس في حبة حاجات مهمة, عن أنا ليه بنصح بمتابعة الدورة دي خاصة لو إنتا مبتدأ خالص وما تعرفش اي حاجة…

1- أولاً, اللي عامل الدورة دي شاب عنده 15 سنة بس! اللي هوا Moody Boles
وبغض النظر عن فكرة إنه صغير وتدعم الافكار الناشئة والشغل ده… لكن كونه صغير في السن ده مخلي فعلاً الطريقة اللي بيشرح بيها وبيتكلم بيها مناسبة جداً للمبتدئين في كل الأعمار… حيث إنك مش هتلاقي أي كلام مكلكع ولا مصطلحات معقدة, وبيتكلم بالراحة وبيوضح كل نقطة بتفاصيل التفاصيل.. وده غالباً بيهمله كل المحترفين لما بيجوا يشرحوا حاجة..

2- ثانياً, لك أن تتخيل إن الشاب ” مودي ” عنده 15 سنة, وعنده مشروع ويب متمثل في ويب سايت http://ezzaii.com , وبيأسس براند اللي هوا Imaginators , وعنده قناة على يوتيوب, وبيسجل فيديوهات شرح للناس كمان عشان يعلمهم اللي هوا بيعرفه…
ده في حد ذاته شيء ملهم جداً ومحفز ليك سواء كنت مبتدأ إنك تتعلم وتبدأ فوراً, أو لو كنت محترف ولسه ما عملتش اللي عمله ” مودي ” لحد دلوقتي 😉

3- ثالثاً, الشاب ده بيشتغل من بيته وكومبيوتره وانترنته, كمصمم ومطور ويب.. ولا قال إنه مش لاقي شغل ولا إستنى إن شركة تعينه عندها ولا بيدور على فرصة… هوا خلق الفرصة لنفسه وبيبذل مجهود متواصل عشان يحترف ده, وحول شغفه ده لمكسب… الله أعلم هوا بيكسب كام الله أكبر عليه يعني 😀
لكنه مش عاطل, ومش هيكون عاطل أبداً…

4- رابعاً, مودي من الصعيد, تحديداً من المنيا…
ما وقفش مستني ولا قال الصعيد مافيهوش فرص, وإن الاهتمام كله بالعاصمة, ولا إن الصعيد مهمل.. إلخ إلخ..
هوا فهم الأساس إن الإنترنت مالوش حدود جغرافية, والعلم كله موجود أونلاين, واللي عاوز يتعلم من أي مكان في أي وقت هيقدر يعمل ده, ومش هيستنى حد يجي يعلمه 🙂

ده مش مثال ” شاب صغير من الصعيد يخترع إلخ إلخ ” ولا بوست ” تنمية بشرية ”

دي صورة من الواقع لواحد ما وقفش مكانه بس ولا حط إيده على خده وإتحجج بظروف ولا أسباب 🙂

إتحمست تبدأ دلوقتي ولا لسه مستني وعندك أسباب تمنعك؟

قناة مودي على اليوتيوب:
http://goo.gl/NWY1PX

القائمة الذهبية لمصادر تعلم الديجتال ماركتنج بالعربية:
http://goo.gl/VlmwcS

البوست الأصلي من هنا:

http://goo.gl/VhePKB

Facebooktwittergoogle_plusredditpinterestlinkedinmail