إستراتيجية التسويق من خلال الشبكات الإجتماعية – 46 نقطة لازم تعرفهم الأول

خطواتك يا ‫#‏ديجتاليزر‬ عشان تستعد لإعداد خطة إستراتيجية للتسويق من خلال الشبكات الإجتماعية:

قبل ما تبدأ لازم تعرف دول:

1- فكر في إجابة السؤال ” ليه أنا عاوز أعمل ده؟ ” قبل ما تسأل السؤال ” ازاي أعمل ده؟ ”

2- الأدوات بتتغير, الإمكانيات المتاحة في كل أداه بتتغير, التكتيكات بتتغير, مافيش أداه في مجال الديجتال ماركتنج بتفضل موجودة مدى الحياه ومافيش إمكانية مضمون إنها تفضل موجودة, بناءاً عليه مافيش تكتيك يستحق لقب أفضل تكتيك, كل مرة بظروفها.

3- ركز على إزاي تكون فعلاً ” إجتماعي ” مش إزاي تعمل ” تسويق من خلال الشبكات الإجتماعية ”

4- أهمية الشبكات الإجتماعية الاساسية بتتلخص في إنها:
— بتديك قدرة على عمل والتحكم بشكل كويس ومرتب في العلاقات الشخصية.
— بتديك القدرة على إدارة العلاقة بين الشريحة المستهدفة والبيزنس مباشرة.
— كل شيء قابل للقياس, وده بيفيدك في عمل الدراسات والتحضير والترتيب وإتخاذ القرارات في البيزنس بشكل ذكي وفعال.
— بتوفرلك معلومات مفصلة عن طبيعة وحقيقة الشريحة المستهدفة وسلوكها.

5- الحمام الزاجل, إشارات مورس, التليفون, الفاكس, الإنترنت, الإيميل, الشبكات الإجتماعية, في كل تطور من اساليب التواصل الناس بتطور البيزنس بتاعها ويستغل التطور ده بالشكل الأمثل في إنجاح البيزنس, مش العكس..
الناس المفروض ما يعملوش البيزنس نفسه قائم على اسلوب التواصل بس.

6- تجنب الحملات الإعلانية على الشبكات الإجتماعية لو ما عندكش إستراتيجية كاملة لإدارة الحملة الإعلانية واستغلالها إلى أقصى نتايج منها خلال فترة قصيرة, وفي الحالة دي يفضل إن الاعلانات على الشبكة x ما تكونش بتودي على قناتك التسويقية على نفس الشبكة, يفضل تكون الاعلانات على الشبكة x بتودي على قناتك التسويقية على الشبكة y.

7- خليك مركز إن دي ” شبكة ” يعني كل شيء مترابط ومتداخل ومتصل جداً مهما كان صغير زي الشبكة و ” إجتماعية ” يعني كل شيء بتعمله لازم يبقى ليه طابع وروح إجتماعي حقيقي مش طابع جاف أو مالوش روح محددة المعالم.

8- القواعد واحدة على كل الشبكات الإجتماعية مع إختلاف أفكارها وطرقها, لو وصلت لفهم القواعد هتطبقها على باقي الشبكات بسلاسة, الفرق بيكون بس طريقة تقديم المحتوى وطريقة التواصل الإجتماعي على كل شبكة.

9- لو ما عندكش محتوى متناسب مع الشبكة x ما تتعاملش عليها, ودور على شبكة تانية, لو طريقة التواصل الإجتماعي على الشبكة x غير متوافقة مع قدراتك الإجتماعية ما تتعاملش عليها ودور على شبكة تانية.

10- لو هتشتغل بشكل غير مركزي, لازم يكون عندك فريق متوافق في نفس الخواص الإجتماعية ومختلف في القدرات الإبداعية, لو الفريق اللي هيشتغل معاك غير متوافق في الخواص الإجتماعية, يفضل تخلي الشغل بطريقة مركزية تماماً ” تبعتله التاسك وهوا يبعتهولك وانتا اللي تعرضه في الآخر ” وتمنعهم من التواصل المباشر خالص مع الشريحة المستهدفة.

11- مافيش طريقة تتعلم بيها تكون شخصية إجتماعية متوافقة مع الشريحة المستهدفة من البيزنس, لو جالك بيزنس في مجال شخصيتك الإجتماعية مش هتتوافق فيه مع الشريحة المستهدفة, فإنتا مش هتنجح في إستغلال الشبكات الإجتماعية في تسويقه بالعكس إنتا هتضر اهداف البيزنس كله.

12- خليك إيجابي طول الوقت وبتشع طاقة إيجابية, لو ما عندكش المهارة دي في حياتك الطبيعية يبقى المنطقة دي من التسويق مش هتنفعك.

13- التسويق من خلال الشبكات الإجتماعية محتاج يكون عندك الحاسة السادسة, الكونسبت نفسه عبارة فن التعامل مع المواقف اللحظية والإحساس بروح أهداف البيزنس وطرق تحقيقها, مش علم أو طريقة معينة تعمل بيها الحاجات دي.

14- إرسم شكل تخيلي لمثال من كل شريحة بتتعامل معاها على الشبكات الاجتماعية واكتب عليه نسبته من الاستهداف, وارسم قدامه شكلك اللي انتا متخيل إنه شايفك بيه واكتب عليه نسبة نجاحك من المحافظة على المظهر ده.

15- إجمع وراجع المعلومات طول الوقت عن:
— شخصية عشوائية بتعبر عن الشريحة المستهدفة.
— إحصائيات الشبكات الإجتماعية ونسب الشريحة المستهدفة بتاعتك منهم.
— إحصائيات الويب عموماً ونسب تحرك الشريحة المستهدفة على مختلف الشبكات الإجتماعية فيه.
— إحصائيات الإندستري بتاعة البيزنس نفسه ومدى تفاعل الشريحة المستهدفة مع الإندستري دي.

16- إسمع وراقب وقارن:
— إستخدم أدوات متخصصة للمراقبة والمتابعة.
— إيه اللي بيتقال عن البيزنس بتاعك؟
— إيه اللي بيتقال عن الموضوعات اللي تهم الشريحة المستهدفة بتاعتك؟
— إيه اللي بيحرك الشغف جوة الشريحة المستهدفة بتاعتك؟
— مين اللي بيقولوا الكلام اللي بيعجب الشريحة المستهدفة بتاعتك؟
— بيقولوا الكلام ده فين بالظبط وامتى وازاي؟

17- حلل الأرقام الاساسية ” key metrics ” للمنافسين على الشبكة الإجتماعية اللي إنتا شغال عليها:
— معدل زيادة المتابعين.
— الناس اللي مهتمة تتكلم عن المنافس.
— معدل النشر للمحتوى.
— معدلات التفاعل.
— حجم وعدد وقدرة الوصول للشريحة المستهدفة.
— عدد المتفاعلين قياساً بالعدد الإجمالي للمتابعين. ” عدد المتابعين / عدد الناس اللي بتتفاعل ”
— معدل زيادة المتفاعلين قياساً بمعدل زيادة المتابعين. ” اقسم ده على ده برضه ”

18- إجمع نتايج أرقام المنافسين كلهم وقارن وطلع منهم نسبتك المئوية عموماً واعتبرها مؤشر قياس لمدى نجاحك وراجعه كل فترة.

19- إختار حاجة واحدة بس تركز عليها كل فترة من الحاجات دي وحط طرق سلسة للتنقل بينهم في كل مرحلة:
— توعية وتعريف باهداف اللبيزنس.
— زيادة المبيعات وتحويل المتابعين إلى عملاء.
— العلاقة بين الشريحة المستهدفة والبيزنس.

20- كل مرحلة زمنية إعتبر نفسك طالع رحلة يوم واحد للعين السخنة مع الناس المتابعين, وهتمشي معاهم الرحلة دي على الخطوات التالية:
— ما حدش يعرفك فيهم لسه أصلاً.
” نبدأ الرحلة والباص يتحرك. ”
— يالا بينا نتعرف.
“وإحنا في الطريق قبل ما الباص يوصل ”
— طب جرب كدة.
” وصلنا والناس بتغير وبتستعد تنزل البحر ”
— تكرار الرسالة الاساسية / التحميس ورفع الإيجابية.
” نزلنا البحر كلنا وبنلعب بقة وبنقضي اليوم وبنستمتع ”
— المدافعة عن البيزنس واساسياته وصد الهجوم وتصحيح المفاهيم.
” وإحنا طالعين ناخد شاور ونروح نتغدى في حد كان جاي متأخر ومش فاهم وبيضايق باقي الناس ”
— تهدئة الوضع, جمع المعلومات عن الفترة اللي فاتت والتحضير للي بعدها وإعادة الخطوات.
” راجعين في الطريق ومطفين النور والناس نايمة ”

21- ركز على إن انتقالك بين الاهداف والرسائل التسويقية يكون سلس ومقنع وما يفصلش اللي بيتابعك باستمرار, وما يكونش غريب على اللي لسه عارفك في نص المشوار.

22- راجع رسايلك القديمة الأعلى تفاعل, وإضمن إنك ما خرجتش برة إطار الأهداف الرئيسية وما بتناقدش نفسك وصورتك الإفتراضية عند الشريحة المتابعة.

23- لو حاولت تعمل كل حاجة من خلال الشبكات الإجتماعية, مش هتعمل حاجة خالص على المدى البعيد.

24- الهدف مش إنك تبقى كويس في التسويق من خلال الشبكات الإجتماعية, الهدف إنك تفيد أهداف البيزنس وتحققها.

25- طول الوقت إتأكد إنك بتقيس المؤشرات الاساسية السائدة لضمان نجاح البيزنس وبتحقق إرتفاع وتقدم إيجابي فيها:
— التوعية والتعريف بالبيزنس نفسه وأهدافه بشكل واضح.
— مدى التأثير في تحويل المتابعين إلى عملاء محتملين أو عملاء فعليين أو زيادة المبيعات.
— مدى قدرتك على إدارة العلاقة بين الشريحة المستهدفة والبيزنس بشكل صحيح على مستوى إنشاء العلاقات الجديدة وتطوير العلاقات الحالية وصد الهجوم وتحسين العلاقات السيئة.

26- القياس في الشبكات الإجتماعية بيكون قياس التأثير في ” سلوك المستهدفين ” مش قياس ” زيادة أعداد المستهدفين ” .

27- القايمة الجاية دي هي المقارنة بين المؤشرات الضعيفة اللى الناس بتقيسها عادة وبتنسى المؤشرات القوية اللى كان المفروض تقيسها:

مؤشرات ضعيفة القيمة
— عدد المتابعين.
— المنشنز والشيرز والريتويت.
— عدد الضغطات على اللينكات والدخول للويب سايت.

مؤشرات أكتر قيمة:
— معدل التفاعل الإجمالي من المتابعين ونسبتهم.
— المحتوى اللي بيتم قرائته بالكامل ويوصل بشكل صحيح للمتفاعلين.
— عدد الليدز أو الكونفيرجن
” عدد اللي سجلوا في الويب سايت او سابوا ايميلهم او اشتروا المنتج من خلال الويب سايت بعد ما ضغط على اللينك ”

28- مش معنى إن كل شيء قابل للقياس إنك تقيس كل حاجة وخلاص. ركز بس مع اللي يهمك وليه معنى حقيقي وسيب الباقي عشان ما تتلغبطش.

29- راجع كل فترة توافق نوعية الناس المتابعين مع الشريحة الاصلية المستهدفة بتاعتك, وبناءاً عليه حدد لو إنتا محتاج تعمل تحديث في طريقتك واسلوبك وخطتك ولا محتاج تبعد عنك الناس اللي برة الشريحة المستهدفة وتكمل على طريقتك.

30- خلي عندك دايماً مكان او طريقة أو مرجع فيه خطوة خطوة إزاي تسحب المتابعين الجدد إلى داخل المجتمع بتاعك, بحيث يكون دليل مفصل بالخطوات البسيطة جداً للمتابعين الجدد إنهم يكونوا معاك ع الخط الحالي ويعرفوا يواكبوا الاحداث بسلاسة.

31- خلي عينك دايماً على الجانب الجغرافي والخصايص الديموجرافية من الشريحة المستهدفة, البلد والمدينة والحي والسكن, العمر والنوع. وإسأل نفسك دايماً:
— مين دول أصلاً؟
— هما بيستخدموا الشبكة الاجتماعية دي تحديداً ليه؟
— هما بيتعاملوا مع الشبكة الاجتماعية دي ازاي؟

32- إعرف الإحصائية دي, عادة دي النسب اللي بتمشي في معظم الأونلاين كوميونتي:
— بنسبة الربع 25% تقريباً بيكونوا مؤثرين وبيضيفوا محتوى.
— بنسبة التلت 30% تقريباً بيكونوا بتوع مناقشات وكومنتات وتنظير للمحتوى المضاف.
— بنسبة التلت وشوية حوالي 40% تقريباً بيكونوا مجرد مشجعين أو ناقدين أو متفاعلين على خفيف ” بيدوسوا لايك أو ديسلايك ”
— بنسبة الخمس 20% تقريباً بيجمعوا المحتوى اللي بينزل وبيعيدوا نشره مرة تانية.
— بنسبة اكتر من النص 60% تقريباً راشقين في اي حوار من غير ما يكونوا فاهمين, هيتحمسوا ويوافقوا ويدوك ايحاء انهم هينفذوا ويوعدوك ويخلوا بيك.
— بنسبة التلات اربع 70% تقريباً مراقبين اللي بيحصل ومترقبين سواء سعدا او متضايقين.
— بنسبة اقل من الخمس 17% بيبقوا مالهمش دعوة بأي حاجة ولاهيشاركوا مخعاك في اي حاجة.

33- لازم تحدد مدى التفاعل من جوة كل شريحة لوحدها, وتقسيم وضعهم بالنسبة لك عشان تعرف تتعامل معاهم, وتعرف تحط تاسكات للمتابعين بتوعك من كل شريحة بعد كدة وتعرف تقيس مدى تفاعلهم معاك, مثلاً:
— عملنا مسابقة إن المتابعين يضيفوا محتوى عن أحلى هدف في الدوري.
— الشريحة من 18-24, من القاهرة, الولاد, اللي عندهم خلفية عن الكورة: دول شاركوا بنسبة 30% في المسابقة كصانعين محتوى. = نسبة رائعة.
— الشريحة من 35-45, من المحافظات, الولاد, اللي عندهم خلفية عن الكورة: شاركوا بنسبة 5% في المسابقة كمناقشات او تنظير للمحتوى المضاف. = نسبة ضعيفة جداً.

34- لازم يكون ” إنطباع ” معين بتسيبه عند المتابعين بتوعك, إحساس بيوصلهم لما بيشوفوك, والإنطباع ده يكون حاكم كل حاجة بتعملها, طريقة الكلام, الصور والفيجوال, الرسايل, الألوان.. إلخ إلخ إلخ, زي مثلاً:
— آبل = الإبتكار
— كوكاكولا = الفرحة
— بي إم دابليو = المتعة

35- ما تعتمدش على العروض الخاصة كتير, لو إنتا صحابك عارفين إنك محمد بتاع العزومات, مش هيعرفوك غير عشان العزومات وعلاقتك بيهم هتبقى علاقة إنهم بيستغلوك بس لكن مش مهتمين بأي تفاصيل تانية, وانتا بتبني قواعد تسويق من خلال الشبكات الاجتماعية بتبقى عاوز المتابعين يعرفوا كل التفاصيل عن البيزنس وتبقى علاقة طويلة المدى مش عن العروض الخاصة اللى بيقدمها وبس وتبقى علاقة قصيرة المدى.

36- التفاعل بيتم بين الاشخاص, والعلاقات بتتم بين الاشخاص, لازم البيزنس بتاعك يكون أقرب إلى هيئة الشخص عنه من هيئة اللوجو, يفضل تفكر تعمل ” كاراكتر ” أو شخصية بتتكلم بإسم البيزنس, مع انه تكتيك قديم لكنه لسه شغال, أو يكون البيزنس بتاعك بيتكلم على الشبكات الاجتماعية كأنه شخص عادي مش كأنه لوجو بيتكلم… زي ماكدونالدز مثلاً أو تودو أو فيسبوك نفسه… لما بيتكلم بيتكلم كأنه شخص مش كأنه مجرد لوجو.
ودايماً عنده أكتر من شخص حقيقي بيتكلموا بإسم البيزنس كبشر طبيعين.

الشبكات الإجتماعية علاقات بين بشر مش بين بشر وبيزنس, لو أصبحت العلاقة بين بشر وبيزنس ده هيضر البيزنس نفسه, ولو البيزنس مش حابب يتعامل بصيغة بشرية من خلال الشبكات الاجتماعية عشان يحافظ على مظهر البيزنس لأي سبب كان, المفروض ما يستغلش الشبكات الاجتماعية للتسويق أو التفاعل, ويبقى استغلاله للشبكات الاجتماعية مجرد تواجد بس مش أكتر وقناة نشر أخبار للي بيبحث عن أخبار مش أكتر.

37- العلاقات بين البشر لازم يكون فيها مشاركة من الطرفين, في التسويق على الشبكات الاجتماعية لازم يكون عندك وسيلة هتخلي بيها المتابعين يشاركوا في تخليق المحتوى واضافة المحتوى معاك والمشاركة, أوعى تخلي الكلام من جهة واحدة ” اللي هوا البيزنس ” وان المتابعين ” مجرد متلقيين ” خليهم يشاركوا معاك في إنهم يكونوا مش مجرد متلقيين ويكون التواصل من الطرفين رايح جاي وتخليق المحتوى مشارك فيه الطرفين.

38- حافظ على هوية البراند, عن طريق إنك لازم تحقق تناغم بين كل القنوات وكل مواقع الشبكات الاجتماعية المختلفة اللى هتشتغل عليها, بحيث تحافظ على نفس الطريقة في الكلام ونفس هوية البراند بين كل الشبكات, لو حسيت إن في شبكة هتفقدك التناغم ده, ما تشتغلش عليها, أو فكر في طريقة تستغلها بيها من غير ما تفقدك هوية البراند.

39- لازم يكون عندك مبدأ القاعدة الاساسية, وقنوات تسويقية, مثال:

شبكية ويب بيزنس:
— الويب سايت قاعدة أساسية للتواصل.
— الفيسبوك وتويتر قنوات تسويقية بتحول ع الويب سايت.
أو شبكية إجتماعية:
— إنستجرام قاعدة اساسية للتواصل.
— مدونة بلوجر وبنترست وفيسبوك قنوات تسويقية بتحول على إنستجرام.
أو حتى مجتمع إجتماعي على شبكة واحدة:
— صفحة فيسبوك هي القاعدة الاساسية للتواصل.
— الهاشتاج هوا قناة تسويقية بتحول على الصفحة على فيسبوك.

40- إختار الشبكة الإجتماعية الاساسية تكون المتوافقة مع طبيعة الشريحة المستهدفة الأكبر وتضمن إنك هتركز معاها كقاعدة اساسية وباقي الشبكات هتبقى قنوات تسويقية, مثلاً:

الشريحة المستهدفة الأكبر: بنات – من السعودية – من 16 إلى 25 سنة, مهتمين بالموضة واللايف ستايل.
الشبكة الاجتماعية الامثل: إنستجرام.

الشريحة المستهدفة الأكبر: رجالة – من مصر – من 22 إلى 27 سنة, مهتمين بالسياسة والاخبار.
الشبكة الاجتماعية الامثل: تويتر

41- لازم تحط اساسيات وقواعد للمحتوى المرئي والصور, الالوان والستايل ونوع الصور واتجاهاتها واسلوبها وفكرتها وتحافظ إن ما ينزلش أي محتوى مرئي أبداً بإسمك يكون خارج إطار القواعد اللي انتا حاططها, بحيث بعد كدة طريقة تقديم المحتوى المرئي دي على الشبكات الاجتماعية تكون علامة بتفكر الناس بيك ولو حد عملها يبقى كأنه بيقلدك, مثلاً:

الورقة – إسلام جاويش
خلفية الصورة صفرا على شكل سكيتش, ألوان الرسومات بالاسود, الرسومات كلها خطوط مرسومة بالايد, شكل الرسمة مستطيل طولي, أوقات متقسم إلى أكتر من مستوى, عليه توقيع الراسم.

Cairo Zoom
الصور لازم تبقى واخدة هاي لايت موف أو أزرق غالباً ” إضاءة الكلوب أو الديسكو ” وريزلوشن الصور لازم يكون عالى جداً, الصور بتكون مربعة ومتساوية الابعاد, فيها ناس كتير في الصورة وبتعبر عن الحركة, أو فيها أشخاص اصحاب وبياخدوا صورة للذكرى, كل الصور لازم يكون الشخص مبتسم أو بيضحك, ما بيستخدموش صور من غير ما يكونوا هما اللى مصورينها.

42- تجنب إستخدام القوالب, أو اطار الصورة, أو وضع اللوجو على الصور ” قدر المستطاع ” أو إستخدام لوجوهات الشبكات الاجتماعية زي فيسبوك وتويتر على الصور, وما تكتبش كلام كتير على الصور, وإختار فونت واضح, وخلي الكتابة بلون واضح, ويفضل يكون وراها خلفية عكس اللون عشان تعمل وضوح كويس ويتشاف الكلام ويتقري بسهولة.

43- إعمل حسابك إن كل الصور اللى انتا بتنشرها يوم بعد يوم, هتكون بعد سنة محطوطة جنب بعض كلها في الالبوم كصور مصغرة, فلازم يكون شكلهم متناغم وقتها ما يكونش شكلهم مزعج جنب بعض.

44- كل قناة من قنوات الشبكات الاجتماعية أو منصة أو موقع جديد من مواقع الشبكات الاجتماعية بتستخدمهم, هي في الاساس تكلفة جديدة ومجهود أكبر بتفتحه على نفسك, ومش شرط يكونوا كلهم مفيدين, ركز على الشبكات المفيدة بس واللي عليها نسبة أكبر من الشريحة المستهدفة وما تشتتش نفسك, لما تبقى غطيتها بشكل كامل ” وده مستحيل ” إبقى اتوجه لغيرها.

45- إمسك ورقة وقلم يا #ديجتاليزر بعد ما قريت الكلام ده كله وفهمته, وجرب تحط خطة إستراتيجية كاملة للتحرك من خلال الشبكات الاجتماعية بقى بنفسك, دي المفاتيح وباقي الحاجات كلها بتختلف على حسب إختلاف البيزنس والشريحة المستهدفة

46- خليك فاكر, المعجزات بتتحقق لما بنصدق

Facebooktwittergoogle_plusredditpinterestlinkedinmail