دراسة إحصائيات الديجتال وتحليل التحركات من خلال فيسبوك, دراسة حالة على صفحة سيو صح

بنكمل في الجزء ده محاولة التحليل ودراسة إحصائيات الديجتال أكتفتيز بشكل مبسط, مع التطبيق على موقع سيو صح.

في الجزء الأول إستكشفنا القنوات اللي بيتحرك من خلال موقع سيو صح على شبكة الإنترنت, وبعدها بدأنا بتحليل أول القنوات دي وهي الموقع نفسه, تقدر تراجع الجزء الأول من هنا: دراسة إحصائيات مواقع الإنترنت وتحليل التحركات من خلال الإنترنت, دراسة حالة على موقع سيو صح

في الجزء ده, هنبدأ بتحليل صفحة الفيسبوك لموقع سيو صح خلال السنتين اللي فاتوا من عمر الموقع بالتفصيل…

في البداية – زي ما عملنا في اول خطوة – هنبص بصة سريعة على الصفحة نفسها https://www.facebook.com/SeoS7.Official وندوس على عدد اللايكس اللي مكتوب فيها

seos7-page
seo-s7-first-look

ونجمع المعلومات الأولية من النظرة السريعة:

  • تصنيف الصفحة: موقع انترنت website
  • التابس الإضافية الموجودة Tabs: الفيديوهات ( فيها 6 فيديوهات ) – يوتيوب سيو صح – تابات خاصة بإعلان عن الكورسات ( 3 تابات منهم اتنين غير نشطين ) – تاب خاصة بالبيع من خلال الصفحة للكورسات المدفوعة المقدمة من سيو صح بإستخدام خدمة selz
  • الصفحة ما بيستخدموش البومات الصور, ولكن بينشروا بوستات بالصور ( أكتر من 400 بوست صور )
  • إجمالي عدد المتابعين : 16283 متابع
  • عدد المتفاعلين النشطين: 292 شخص
  • معدل زيادة المتابعين نسبة إلى الإجمالي حوالي 2% ومعدل الزيادة في المتابعين علي الأسبوع الحالي عن الأسبوع اللي قبله بنسبة حوالي 40%
    معنى كدة إن تقريباً الصفحة بتزيد من ناحية المتابعين من 162 إلى 320 متابع جديد أسبوعياً…
  • نظرة سريعة على البوستات الموجودة في الصفحة في آخر أسبوع, الصفحة نشطة وبتنزل بوستات بمعدل غير ثابت, لكنه في متوسط 6 بوستات أسبوعياً, معدلات التفاعل من ناحية اللايك للبوستات والشير عالي, الكومنتات مش كتير ويمكن تعتبر قليل بالمقارنة بباقي الصفحات من نفس التخصص ” الصفحات المتخصصة في الأونلاين ماركيتنج “

ثم نبدأ ندخل جوة التفاصيل بشكل أوسع, في البداية هنستخدم أداة Fanpagekarma.com لتحليل صفحة الفيسبوك لموقع سيو صح, وهنحدد التاريخ في آخر سنتين اللي هما فترة عمل الصفحة. ونضغط على Times & Types عشان نلقي نظرة

karma-choice

 

تحليل سريع للمحتوى على صفحة سيو صح:

  • إتنشر على صفحة سيو صح على فيسبوك 782 بوست
  • منهم 466 صورة وبتشكل نصيب الأسد حوالي 60% من بوستات الصفحة, متوسط التفاعل من المتابعين للصورة الواحدة 56 تفاعل.
  • ثم 171 لينك بنسبة حوالي 22% من إجمالي البوستات, متوسط التفاعل من المتابعين للينك الواحد 47 تفاعل.
  • ثم 62 فيديو يوتيوب بنسبة حوالي 8% من الإجمالي, متوسط التفاعل من المتابعين للفيديو الواحد 58 تفاعل.
  • و 83 بوست نصي بنسبة حوالي 10% من الإجمالي, متوسط التفاعل من المتابعين للبوست الواحد 69 تفاعل.

total-posts

 

  • أكتر الأيام نشاطاً في نشر البوستات للصفحة هو يوم الجمعة, إتنشر فيه 161 بوست واللي بيمثل 20% من الإجمالي تقريباً
  • يليه يوم الأحد برصيد 116 بوست ونسبة 15% من الإجمالي تقريباً
  • ثم أيام الإتنين والأربع والخميس بين 102 بوست إلى 108 بوست بنسبة أعلى من 13% لليوم الواحد فيهم من الإجمالي.
  • وأقل الأيام نشاطاً في النشر هو يوم السبت, البوستات اللي اتنشرت في أيام سبت كانوا 83 بوست فقط, بنسبة 12% من الإجمالي.

seos7-posting-weekly

  • أكتر ساعات تم نشر فيها بوستات على صفحة سيو صح بين الساعة 10 بالليل إلى واحدة بعد منتصف الليل بتوقيت القاهرة… في أيام الأسبوع كلها ما عدا الأربع!
  • لكن الغريب والملفت للنظر, إن أكتر ساعة على الإطلاق إتنشر فيها بوستات كانت متأخرة عن التوقيت المعتاد, الساعة 2
  • إلى 3 بعد منتصف الليل بتوقيت القاهرة يوم الأربع من الأسبوع, واللي اتنشر فيه خلال الساعة دي 18 بوست بنسبة 2% تقريباً من إجمالي بوستات الصفحة…
  • وإن يوم الجمعة اللي يعتبر أكتر يوم بتنشر فيه الصفحة بوستات, بيكون معدل النشر في توقيت بدري شوية عن المعتاد, حيث إن في 16 بوست نزلوا يوم جمعة في حدود الساعة 5 إلى 6 المغرب بتوقيت القاهرة…

نبدأ نلقي نظرة على المتابعين والتفاعل مع البوستات دي:

المتابعين للصفحة, واللي عملوا أكتر من 7960 تفاعل مع بوستات الصفحة بين لايك وشير وكومنت, كان أفضل التوقيتات اللي بيتفاعلوا فيها مع البوستات هو يوم الجمعة بعد الساعة 6 مساءاً بتوقيت القاهرة ولحد الساعة 12 مساءاً بتوقيت القاهرة. واللي بيحقق معدل تفاعل أكتر من 70 تفاعل للبوست الواحد في التوقيت ده اللي نزل فيه 58 بوست من إجمالي بوستات الصفحة.

وأسوء الأوقات اللي بتقل فيها نسبة تفاعل المتابعين هي أيام التلات من بعد الساعة 12 منتصف الليل ولحد 6 الصبح, واللي بيحقق معدل تفاعل 35 تفاعل للبوست الواحد في التوقيت ده واللي نزل فيه 32 بوست من بوستات الصفحة.
ونشوف تأثير يوم الأربع الغريب على التفاعل, فنلاقي إنه من أفضل أيام اللي بيتفاعل فيه المتابعين خلال الأسبوع ويمكن ده عشان كترة البوستات فيه ونزولها في توقيت مختلف في بداية اليوم لكنه جامع بين الناس السهرانة وبين الناس اللي هتصحى الصبح تشوف البوست, حيث إنه بيحقق بين 66 إلى 82 تفاعل للبوست الواحد خلال ساعات اليوم كلها ما عدا الفترة بين 6 صباحاً حتى 12 الضهر.

المتابعين للصفحة عملوا أكتر تفاعلاتهم على الإطلاق في أيام الخميس من الأسبوع, حيث إنهم تفاعلوا من خلال الكومنتات واللايك والشير برقم يصل إلى 2196 تفاعل مختلف, ودي نسبة تصل إلى 27% من إجمالي التفاعلات في باقي الأيام.
وأقل أيام التفاعل على الإطلاق كانت أيام السبت, بإجمالي 870 تفاعل ونسبة 11% من إجمالي التفاعلات في باقي الأيام.

هننتقل بعدها إلى الزرار الخاص بتحليل محتوى الصفحة ” Content “

karma-content

واللي فيه هنلاقي الخلاصة عن التفاعل مع البوستات المختلفة على الصفحة:
seos7-posts

  • متوسط التفاعل من خلال زرار ” لايك ” حوالي لايك للبوست الواحد.
  • متوسط التفاعل من خلال التعليقات حوالي 14 تعليق للبوست الواحد.
  • متوسط التفاعل من خلال زرار ” شيير ” حوالي 5 شيير للبوست الواحد.

أما من حيث مضمون البوستات, من الواضح إن صفحة سيو صح بتحاول دايماً تلعب مع المتابعين بتوعها الألعاب اللي بيتم فيها طلب التفاعل من المتابعين بشكل مباشر CTA عشان يكسبوا الكورسات والدورات التدريبية اللي بتنشرها الصفحة…
أعلى البوستات من حيث التفاعل كانت بتعتمد على الطريقة دي في بدايتها, حيث إن معظمهما كانت في سنة 2013 وسنة 2014 ويمكن ده اللي سبب إنتشار الصفحة في الفترة دي بشكل قوي, ولكن واضح إن الصفحة بدأت ترجع للطريقة دي مرة تانية في 2015 حيث إن أعلى البوستات من حيث الشير كان في يوليو 2015, وهوا كمان محقق المرتبة التانية من حيث معدل التفاعل من خلال اللايك…

 

  • أعلى البوستات تحقيقاً للتفاعل من خلال لايك أو الإعجاب: 29 ابريل 2014, عدد المتابعين للصفحة وقتها كان 4691 متابع

مساء الخير , ببساطة سحب على كورس ماستر سيو نسخة مجانية لعضو واحد فقط الليلة ولمرة واحدة …لايك (Y) عشان تدخل السحب…

Posted by SEOS7 on Tuesday, April 29, 2014

 

  • أعلى البوستات تحقيقاً للتفاعل من خلال الكومنتات والتعليقات: 12 أغسطس 2014, عدد المتابعين للصفحة وقتها كان 6512 متابع

السؤال الأول وصاحب الإجابة الصحيحة هيكسب 20$ بمناسبة مرور سنة على إنشاء #سيو_صح السؤال هو :-أى إيرور يخبر جوجل أن ا…

Posted by SEOS7 on Tuesday, August 12, 2014

  • أعلى البوستات تحقيقاً للتفاعل من خلال الشيير والمشاركة مع الاصدقاء: 12 يوليو 2015 عدد المتابعين للصفحة وقتها كان 15261 متابع

• مسابقة الحصول على كورس STEP SEO •بمناسبة قرب إنتهاء شهر رمضان نقدم لكم مسابقة جديدةوالجائزة كورس STEP SEO بملفاته ا…

Posted by SEOS7 on Saturday, July 11, 2015

أما أعلى البوستات اللي حققت نجاح بدون CTA أو طلب للتفاعل, والمفاجأة كانت إن منهم اتنين بوست نصي فقط بدون صورة أو لينك, وإنهم لم يكونوا لينكات تعليمية أو محتوى في صلب موضوع الصفحة:

  • التفاعل من خلال لايك: 12 يوليو 2015, عدد المتابعين للصفحة وقتها 15296 متابع

كيف تحصل على 10 مليون زيارة شهرياً دراسة حالة أجنبية قريباً على سيو صح (Y)

Posted by SEOS7 on Sunday, July 12, 2015

  • التفاعل من خلال كومنت: 12 مايو 2014, عدد المتابعين للصفحة وقتها 4778 متابع

 

لأن لكم حق على فى المعلومة , سأطرح عليكم بشكل سريع الأسباب التى إستدعتنى للإعتذار عن حضور ما يُسمى بـ ” قمة الأفيلييت ال…

Posted by SEOS7 on Monday, May 12, 2014

 

  • التفاعل من خلال شير: 27 يونيو 2015, عدد المتابعين للصفحة وقت نشر البوست 14772 متابع

 

7 نصائح للصعود بمقالتك للصفحة الأولى خلال 21 يوم !• عنوان مقالتك يجب أن يبدئ بالكلمة المفتاحية المستهدفة• إنشئ مقالة…

Posted by SEOS7 on Saturday, June 27, 2015

ملحوظة هامة: أعلى البوستات التي حققت تفاعل دون طلب التفاعل CTA على صفحة سيو صح كان بوست نشر كورس مجاني كصدقة جارية على روح والد صاحب الصفحة أحمد عزت لكني إستبعدته من الإحصائيات السابقة, لو كنت بتقرأ الجملة دي, أتمنى إنك تقرأ له الفاتحة وتدعو له.

لتحميل قائمة البوستات المنشورة في سيو صح مع تفاصيل التفاعل والتواريخ ونوع البوست وعدد متابعين الصفحة وقتها إضغط على الجملة دي

لو حابب تشوف أي بوست منهم على فيسبوك, إنسخ الرقم المكتوب في خانة Post_Id وحطه في نهاية الرابط التالي بعد posts/ :
https://www.facebook.com/SeoS7.Official/posts/

أما عن أكتر الكلمات والمفردات اللي بتتكرر في بوستات سيو صح:
seos7-keywords

أكتر الهاشتاجات المستخدمة في بوستات سيو صح:

seos7-hashtags

أكتر اللينكات اللي بتتشير على سيو صح بتكون من:
aeoa7-domains

متوسط طول البوستات اللي بتنزل على صفحة سيو صح بيختلف حسب نوع البوست, ودي ملاحظة مهمة جداً:

  • متوسط طول بوستات الفيديو حوالي 30 كلمة, بين 200 إلى 300 حرف, وحوالي 3 سطور.
  • متوسط طول بوستات الصور حوالي 70 كمة, بين 350 إلى 450 حرف, وحوالي 5 سطور.
  • متوسط طول بوستات اللينكات حوالي 65 كلمة, بين 300 إلى 350 حرف, وحوالي 4 سطور.
  • متوسط طول بوستات التكست العادية, حوالي 150 كلمة, بين بين 800 و 900 حرف, حوالي 11 سطر.

في حين إن أعلى البوستات تفاعل على صفحة سيو صح, اللي بتكون أقل من 25 كلمة, 110 حرف, وحوالي 3 سطور.

هنبص بصة على اللي موجود في الأوبشن الخاص بعرض مجموعة من المؤثرين في صفحة الفيسبوك اللي بتحللها… والأوبشن ده هتلاقيه تحت زرار ” Influencers “

karma-influncers

من خلال الأوبشن ده بتقدر تستعرض قايمة بأكتر المتابعين نشاطاً وتفاصيل نشاطهم داخل الصفحة, فايدة إنك تعرف مين الناس المؤثرين أو النشطين داخل الصفحة إنك ممكن من خلال بروفايلاتهم – اللى تقدر توصلها من خلال فيسبوك بالبحث عن اسمائهم ومطابقة الصور – إنك تعرف طبيعة المستخدمين اللي بيتعاملوا مع الصفحة, وتجمع معلومات عنهم أكتر تساعدك في إستهداف الشريحة المتابعة للصفحة دي بعد كدة, كمان بتقدر تعرف من خلال البوستات اللي بيتفاعلوا معاه أكتر نوع بوستات بيعجب المتابعين الأكتر ولاءاً للمجال اللي بتتكلم فيه الصفحة 😉

تطبيق الاوبشن ده على صفحة سيو صح, ودانا للنتيجة التالية:
influ-seos7

نسب التواجد الجغرافي لجمهور صفحة سيو صح:

  • 52% من مصر ” 8388 متابع “
  • 20% من المغرب ” 3197 متابع “
  • 7% من الجزائر ” 1070 متابع “

8-7-2015 7-40-49 AM

ومن أهم المعلومات اللي هتعرفها من خلال المنطقة دي, هي كام مرة بيرجع المتابعين للتفاعل مع محتوى الصفحة من جديد؟

بمعنى آخر, إذا المتابع ساب النهاردة كومنت أو داس لايك أو عمل شيير, هل بيرجع مرة تانية ولا لأ؟ ولو بيرجع تاني… فكام مرة بياخد تفاعل بعد كدة؟
وده مؤشر مهم جداً في صفحات المجتمعات او ال community لتوضيح مدى فعالية الكوميونتي ده ومدى اهتمام متابعينه بيه, وفي نفس الوقت ممكن يديك مؤشر عن مدى نشاط المتابعين الفعليين والدائمين مقارنة بالعدد الإجمالي…

بتطبيق ده على صفحة سيو صح, كانت النتيجة:

  • 60% من المتابعين يتفاعلوا لمرة واحدة فقط ولا يعودوا للتفاعل.
  • 20% من المتابعين يعودوا للتفاعل مرة تانية.
  • 6% من المتابعين يتفاعلوا أكتر من مرتين.
  • 5% من المتابعين يعودوا للتفاعل أكتر من 3 مرات.
  • 9% من المتابعين يتفاعلوا أكتر من 4 مرات وحتى 8 مرات!

seos7 Fan-Retention

بعد كدة, هنروح على القائمة ” History & Benchmarking ” وهنبدأ نقسم الفترة اللي هندرسها إلى Quarters ” ربع سنة أو 3 شهور “

seos7 history

نبص بصة على معدل الزيادة في المتابعين, ونحاول نتوقع مصادر الزيارات دي واسبابها, وهل في حاجة حصلت أدت لإرتفاع مفاجىء في وقت معين؟

عشان تقدر تشوف التغيرات كويس في معدل الزيادة في المتابعين حاول تقسم الخطوات إلى فترات زمنية قصيرة, أسابيع أو شهور, عشان تقدر تلاحظ القفزات في معدل الزيادة…

هنبدأ من شهر يوليو 2014 وحتى سبتمبر 2014 ونعتبره أول كوارتر هنشتغل عليه:
seos7-benchmark

الكوارتر بدأ بحوالي 5500 متابع وانتهى بحوالي 7300 متابع, معدل زيادة هادىء وثابت, ما عدا إرتفاع بسيط بعد يوم 11 يوليو, ولكنه غير ملفت للدرجة…
معدل الزيادة حوالي 20 متابع جديد يومياً.

الكوارتر التاني, من شهر أكتوبر 2014 وحتى ديسمبر 2014:
seos7-q2

كوارتر هاديء جداً, زيادة ثابتة ومستقرة ما عدا بعض الايام اللي فيها تغيير بسيط جداً, بدأ بحوالي 7300 متابع وانتهى بحوالي 8600 متابع..
معدل الزيادة حوالي 14 متابع يومياً, أقل من الكوارتر اللي قبله…

الكوارتر التالت, من شهر يناير 2015 وحتى مارس 2015:
seos7-q1-2015

هنا هنلاقي مفاجآت كتير في الكوارتر ده, الي بدأ بحوالي 8600 متابع وإنتهى بحوالي 11 ألف متابع, بمعدل زيادة غير ثابت يومياً تماماً…
وأربع قفزات تم تحقيقها خلال التواريخ:
من 9 إلى 11 يناير 2015, حوالي 230 متابع جديد.
من 3 إلى 11 فبراير 2015, حوالي 600 متابع جديد.
من 14 إلى 18 فبراير 2015, حوالي 350 متابع جديد.
من 26 إلى 28 فبراير 2015, حوالي 250 متابع جديد.

ودي دعوة للرجوع والتدقيق في البوستات والأحداث اللي حصلت في التواريخ دي لتحديد إذا كانت سبب الزيادات دي من إعلانات مدفوعة أو فيسبوك حط الصفحة ضمن الصفحات المقترحة ولا محتوى إنتشر بشكل كبير ” فايرال Viral ” أو مؤثرات خارجية زي المشاركة في الإيفنتات أو الدعوات من الأصدقاء وغيرها… إلخ

هنراجع قائمة البوستات لصفحة سيو صح

seos7-growth

نلاحظ إن في كل التواريخ اللي حصل فيها إرتفاع مفاجىء في معدلات المتابعين في الصفحة, ماكنش في محتوى أصلاً… أو إن المحتوى الموجود مش محقق معدلات تفاعل عالية, بالعكس يمكن تكون أقل من معدلات التفاعل المعتادة…

بالتالي أكيد سبب الإرتفاع مش إعلانات مدفوعة ” لأن أكيد ما حدش هيعمل إعلانات من غير محتوى – خاصة لو كان حد متخصص – ومش كونتينت إنتشر بشكل كبير, الإحتمال الأرجح وجود مؤثر خارجي سبب ده

ملحوظة جانبية: إكتشاف المؤثرات الخارجية شيء مرهق وبيتطلب وقت طويل ومجهود كبير… هنتكلم عن أدواته وتفاصيله في مقال آخر… ولكن حتى وقتها, ببساطة لازم تراجع التوقيت وكل العوامل الخارجية المحيطة بالموضوع وتبحث وتراقب الوضع كأنك كنت موجود وقتها عشان تعرف تتبع المؤثر الخارجي وتوجده بالتفصيل… وأحياناً ممكن تفشل في ده لأنه ممكن يكون دعوة من احد متابعين الصفحة مثلاً تمت في هدوء! أو يكون فيسبوك بدأ يظهر الصفحة في ال suggestions مثلاً.. أو أحداث حصلت على الأرض مالهاش أثر تتبعه أونلاين….

ندخل في الفترة الأخيرة, من شهر ابريل 2015 وحتى مايو 2015:
seos7-q4-2015

الفترة دي غريبة جداً!
في إرتفاع مفاجىء وضخم بين 16 إلى 18 ابريل, حوالي 600 متابع في يومين!
ثم إنخفاض في المتابعين ” unlikes/removed ” بين 25 الى 26 ابريل, حوالي 100 متابع بالسلب!
ثم ارتفاع من 4 إلى 6 مايو بحوالي 200 متابع…
وانخفاض آخر من 6 إلى 7 مايو بالسلب.
ثم ارتفاع من 23 إلى 24 مايو بزيادة كبيرة حوالي 170 متابع في يوم واحد…

هنراجع تاني قائمة البوستات لصفحة سيو صح

ونلاحظ نفس الملاحظة, مافيش محتوى في الأيام اللي فيها تغيرات فجأة على معدل الزيادة في المتابعين, ونرجع لنفس السبب إن يكون عوامل خارجية…

ملحوظة هامة: إفتكر في الجزء الأول لما إتكلمنا عن أهمية معرفة الشخص أو المؤسسة اللي ورا الشغل اللي بنحلل تحركاته أونلاين؟ فاكر لما قولنا إن في سنة 2015 الأشخاص أوقات بيكونوا أقوى من المؤسسات؟
راجع من هنا: تحليل ودراسة مواقع الإنترنت – تجربة عملية على موقع سيو صح

في الوقت ده, لازم تفكر تراجع بروفايل صاحب الموقع نفسه أو القائمين عليه لمعرفة معلومات عن المؤثرات الخارجية المحتملة… في الحالة دي هيكون بروفايل أحمد عزت على فيسبوك

واللي منه هنكتشف بتوقع بسيط اسباب القفزات المفاجأة في المتابعين لصفحة سيو صح:
قفزات الربع الأول من سنة 2015 كانت نتيجة للمشاركة من أحمد عزت في فعاليات خاصة بالتدريب على الأرض, واللي كان ليها إنعكاسها المباشر على صفحة سيو صح للمهتمين بمتابعة المواضيع المتخصصة اللي بيقدمها أحمد من خلاله.
أما القفزات المتتالية في الربع التاني من سنة 2015 كانت نتيجة للمشاركة من أحمد عزت في أكتر من فعالية على الأرض خاصة بالتدريب, والمشاركة في مبادرات وفعاليات مختلفة أونلاين خاصة بالتجارب المتخصصة والمشاركة مع عدد مختلف من الأشخاص المؤثرين في نفس المجال والتعاون بينهم في تقديم أعمال مشتركة, واللي كان لها إنعكاس مباشر برضه على صفحة سيو صح من الناس اللي عرفت أحمد نفسه جديد وحبت إنها تتابع الفعاليات وال initiatives اللي بيشارك فيها…

واللي هيخلي التوقع ده أقرب للواقع, إن في الشهرين التاليين, معدل الزيادة في المتابعين رجع لمعدل زيادة مستقر – حوالي 35 متابع جديد يومياً – في شهر يوليو ويونيو 2015, وبعد إنتهاء كل الفعاليات اللي كان بيشارك فيها أحمد عزت….

آخر جزئية هنتكلم فيها ضمن الجزء ده, هوا محاولة توقع مدى فعالية الصفحة اللي بندرسها في تحويل الزوار إلى موقع الإنترنت الخاص بيها. Conversion
أو معدل الضغط على الروابط مقارنة بمعدل الوصول للمتابعين. Clicks

لمحة جانبية: معظم الصفحات بتستخدم مواقع وسيطة لإختصار الروابط – خاصة المواقع العربية – وده عشان يعرض الروابط بشكل اكتر احترافية على الشبكات الإجتماعية, بدون ما يضر تركيبة الروابط في موقعه نفسه, وأوقات من أجل معرفة إحصائيات الضغط على الروابط..

إنتا كشخص بيبحث وبيحلل شغل الصفحة دي, تقدر إنتا كمان تعرف عدد الزيارات اللي بتحصل على اللينكات اللي بتنزلها الصفحة – لو بيستخدموا إختصار اللينكات – وده ببساطة عن طريق إنك تنسخ الرابط المختصر copy , وتحطه paste في مكان عنوان الموقع في متصفح الانترنت عندك, وتضيف عليه علامة ( + ) ثم تضغط إنتر!

شوف الصورة دي:
link-details

وده اللينك اللي موجود في البوست ده:

بمناسبة مرور #عامين_على_سيو_صح (Y)كورس STEP SEO بسعر 50 دولار بدلاً من 150 دولار ! أفضل عروض الخصم التى تم طرحها منذ إ…

Posted by SEOS7 on Wednesday, August 5, 2015

والنتيجة اللي هيوصلك ليها الخطوة دي, هي معرفة عدد الضغطات اللي حصلت على اللينك ده لما نزل على الصفحة, ومجموعة من المعلومات التانية المهمة كمان عن مستخدمي الصفحة اللي ضغطوا على اللينك, زي نوع متصفح الانترنت, والجهاز اللي بيستخدموه. واللي ممكن يساعدك في دراسة وفهم الشريحة الموجودة في الصفحة دي.

دوس هنا مثلاً: http://goo.gl/6gnfCi+ وشوف النتيجة

link-clicks-seos7

 

للأسف إنتا ما تعرفش نسبة وصول البوست للمتابعين قد ايه Reach لكنك دلوقتي تعرف الوقت اللي نزل فيه البوست, وعدد الضغطات على الرابط… ومنهم تقدر تفهم البيج دي تقدر تحول كام زاير يومياً إلى موقع إنترنت, ومدى فعالية المشاركين فيها واهتمامهم بالروابط الخارجية…

وبكدة, نبقى وصلنا لآخر الجزء ده من تحليل إحصائيات الفيسبوك وتحليل التحركات من خلال الشبكات الإجتماعية, مع التطبيق على صفحة سيو صح.

دلوقتي دورك تطبق على البيزنس الخاص بيك, أو على المنافسين ليك, وتبدأ تستغل المعلومات اللي هتستكشفها في تحسين وتطوير ادائك وتحركاتك التسويقية المستقبلية من خلال فيسبوك 😉

الأدوات اللي إستخدمناها في التقرير ده: Fanpagekarma.com
قايمة الأدوات المشابهة واللي ممكن تكون أفضل وأكتر تطوراً من اللي استخدمناها هنا, واللي ممكن تستخدمها في تحليل التحركات والإحصائيات من خلال الشبكات الإجتماعية:


شكراً لوقتك جداً,
أكيد تعبت بعد قراية الكلام والأرقام دي كلها, دلوقتي تقدر تدوس شيير وقول رأيك في المقال ده وإنتا بتشيره, أو قول الحاجات اللي محتاجة توضيح أكتر أو شايف إنها محتاجة تعديل عشان نطور التقرير أكتر وأكتر.
وبعدها ترتاح شوية وتشرب كوباية شاي وتيجي تطبق على الصفحة بتاعتك أو على المنافسين.

Facebooktwittergoogle_plusredditpinterestlinkedinmail

دراسة إحصائيات مواقع الإنترنت وتحليل التحركات من خلال الإنترنت, دراسة حالة على موقع سيو صح

خلال سلسلة المقالات الجاية يا #ديجتاليزر هنقوم بمحاولة لتحليل ودراسة إحصائيات الديجتال أكتفتيز بشكل مبسط لموقع سيو صح SeoS7 – الموقع الرسمي لمحترفي السيو

فخلونا في البداية نعرف أهمية التحليلات ودراسة الإحصائيات من خلال الديجتال اناليتكس:

كلام نظري: الديجتال اناليتكس هي دراسة وتحليل البيانات الكمية والنوعية من نشاطاتك اللي بتعملها من خلال الإنترنت أو نشاطات المنافسين ليك بهدف تحسين وتطوير خدماتك وتحركاتك من خلال الإنترنت, وتوفير أفضل الحلول المناسبة لخبرة وتجارب المتابعين أو العملاء الحاليين والشريحة المستهدفة للبيزنس الخاص بيك, وده اللي بدوره هيترجم لنتايج فعلية أقوى بمجهود وتكلفة أقل مستقبلياً.

الكلام بطريقة أسهل: ” اللي تغلب به إلعب به ” ده مثل مصري قديم من الموروث الشعبي بيوضح الفكرة كلها, من خلال تحليلك للحاجات اللي عملتها في عالم الديجتال ونتايجها, بداية من البوست اللي بتنزله على صفحة فيسبوك, ولحد تصميم موقعك وأماكن الزراير الموجودة فيه, كل ده بيساعدك إنك المرة الجاية ما تبقاش بتعمل الحاجات وخلاص, تبقى بتعملها لأنك واثق إنها هتحقق أحسن نتيجة لأنها حققتها قبل كدة, أو هيديك مؤشرات تشوف من خلالها تقدر تتحرك إزاي في التعديلات الجاية وأيه المهم بالنسبة لك وايه اللي مش مهم.

خطوات قياس الديجتال اكتفتيز والاناليتكس وإنعكاسها على البيزنس كتير, وأولهم وأهمهم هوا تحديد الأهداف الرئيسية للبيزنس عموماً, ثم الأهداف الفرعية والثانوية اللي بتأثر في الوصول للنجاح في تحقيق الأهداف الرئيسية.
بعدها بتحدد إزاي هتقيس النجاح لكل هدف فرعي, وتحطله مجموعة من المقاييس الرئيسية Key Metrics وتربطها مع مؤشرات قياس الأداء KPIs وتبدأ تقيس بناءاً عليها مدى تحقيقك لأهدافك على المدى القصير والبعيد, وياترى إيه الحاجات اللي كان إنعكاسها المباشر قوي في رفع معدلات الأداء وإيه اللي كان فيه خسارة للوقت والمجهود والتكلفة على الفاضي, ثم تبدأ من هنا مرحلة التطوير المستمرة…

في عالم الديجتال, في خمس أهداف سائدة لكل بيزنس بيفكر يبدأ يشتغل من خلال الإنترنت أو يطور شغله من خلال التواجد أونلاين:

1- التجارة الإلكترونية, ودي طبعاً هدفها الرئيسي هو بيع منتج أو سلعة, وده هيبقى ليه أهداف فرعية زي الوصول لأكبر عدد من الشريحة المستهدفة, كسب ثقة العملاء, تحقيق تجربة شراء سهلة وسريعة ومريحة, تحقيق أعلى مكسب ممكن.. إلخ إلخ..
واللي بالتالي ممكن تحطله مجموعة من المقاييس زي عدد الزوار, عدد الصفحات اللي بيشوفها الزاير في الموقع, الوقت اللي بيقضيه في الموقع, عدد عمليات البيع في اليوم, متوسط سعر المنتج… إلخ إلخ
واللي ممكن تخيل إننا نحطله مجموعة من مؤشرات قياس الأداء زي معدلات التحويل conversion rate ونسبة المشتريين الدائمين للموقع Returning Buyers ومعدلات التفاعل مع المنتجات المعروضة.. إلخ إلخ

2- مواقع استهداف واستقطاب العملاء الجدد ” Lead generation ” , ودي بيكون أهدافها الرئيسية هو الحصول على بيانات العملاء المهتمين لتحويلها إلى مبيعات وعملاء فعليين.

3- مواقع النشر وتقديم المحتوى, ودي هدفها الرئيسي هوا الحصول على قراء أكتر والتفاعل مع القراء وكسبهم كمتابعين دائمين.

4- مواقع المعلومات أو المصادر العلمية, ودي هدفها الرئيسي تقديم المعلومات لمستخدميها بشكل سريع ومباشر ومحدث بإستمرار في الوقت المناسب وتغطية إحتياجاتهم للمعلومات بأقل مجهود

5- مواقع البراندات والعلامات التجارية, ودي هدفها الرئيسي بيدور حوالين البراندينج أو الإنتشار, ورفع مستوى الوعي بالبراند والتواصل مع المتابعين وزيادة معدلات الولاء وتطوير العلاقة بين العلامة التجارية ومتابعيها.

تخيل إنتا الأهداف الفرعية ومعايير القياس ومؤشرات الأداء بنفسك للأمثلة السابقة, هتلاقي دايماً في مجموعة من النشاطات أو التحركات المهمة اللي لو درستها هتقدر تفهم أكتر تعامل المستخدمين مع اللي بتقدمه, وإزاي تطوره وتعلي معدلات الأداء عندك عشان توصل للأهداف الفرعية ثم الرئيسية.

على سبيل المثال: لو تتبعت عمليات الشراء في موقع ما, وبدأت تدرس أكتر المنتجات اللي بيتم شراءها, وطبيعة المستخدمين اللي بيشتروها ومواصفاتهم من حيث المكان الجغرافي والعمر والنوع وإهتمامتهم… إلخ إلخ..
ثم بدأت في المرة الجاية, تخصص جزء أكبر من اهتمام العمليات التسويقية ليك من خلال الإنترنت بالشريحة دي تحديداً وبإستخدام المنتجات دي تحديداً… ده هيوفر معاك تكلفة ومجهود إستهداف شرايح مختلفة على منتجات ممكن تكون مش مهمة بالنسبة ليهم!

أو في مثال آخر في نفس نقطة التجارة الإلكترونية, إن العملاء عندك كانوا قربوا يتموا الأكشنز اللي إنتا مستنيها عشان تنعكس على البيزنس بتاعك ” إتمام عملية الشراء ” ولكنهم ما بيتموش العملية وبيخرجوا من الموقع… في الحالة دي إنتا محتاج تحلل سلوك المستخدمين بشكل دقيق داخل موقعك وخارج موقعك عشان تعرف سبب خروجهم قبل إتمام عملية الشراء بالكامل! بالتالي ده هيساعدهم في المرة الجاية إنهم يتموا العملية بنجاح…

في مجموعة من العوامل أو مؤشرات القياس الأولية في معظم الموديولز اللي إتكلمنا عنها دلوقتي في المقدمة دي عن تحليل ودراسة إحصائيات الديجتال أكتفتيز, واللي محتاج تتناولهم برؤية كمية ونوعية وإنتا بتحلل المنافسين أو شغلك زي:

1- الزوار, المتابعين, المستخدمين, العملاء والعملاء المتوقعين.
2- طبيعة ونوع المحتوى وطريقة عرضه, سلوك المستخدمين, التفاعل على القنوات المختلفة, الوقت.
3- معدلات التحويل, طبيعة العلاقة بين العملاء الحاليين والمتوقعين وبين البراند.

نرجع تاني لمحاولة التحليل ودراسة إحصائيات الديجتال أكتفتيز بشكل مبسط لموقع سيو صح SeoS7 – الموقع الرسمي لمحترفي السيو, وهو المثال اللي هنطبق عليه النهاردة بمناسبة إتمام أحمد عزت للسنة التانية في سيو صح, واللي يعتبر أحد المواقع الرائدة حالياً في نشر المقالات والفيديوهات لتعليم التهيئة لمحركات البحث ( SEO )

هنتعامل مع موقع سيوصح على إنه موقع منافس, وإحنا عاوزين ندرسه ونحلله ولكن ما عندناش القدرة على التحصل على أي أداة للتحليل العميق والبيانات الكاملة.

وفي الحالة دي إنتا بتبدأ الأول بالبحث على جوجل بشكل عادي جداً لإستكشاف القنوات الرئيسية اللي بيستخدمها المنافس من خلال الديجتال, في حالة سيو صح, كانت نتيجة البحث فيها القنوات التالية:

1- موقع سيو صح : http://www.seos7.com “قناة نشطة “
2- صفحة سيو صح على فيسبوك: https://www.facebook.com/SeoS7.Official “قناة نشطة “
3- قناة يوتيوب سيو صح : https://www.youtube.com/msrylive “قناة نشطة “
4- صفحة سيو صح على جوجل بلس : https://plus.google.com/+Seos7 “قناة نشطة نسبياً “
5- أكونت سيو صح على تويتر : https://twitter.com/seo_s7 “قناة غير نشطة “
6- أكونت سيو صح على ساوند كلاود: https://soundcloud.com/seos7 “قناة غير نشطة “
7- أكونت سيو صح على سلايد شير: http://www.slideshare.net/seos7 “قناة غير نشطة “

ما تنساش, إنتا محتاج برضه تعرف إذا كان في أي تواجد للمنافس اللي بتحلله على الموبايل ورلد اللي ممكن ما يظهرش من خلال جوجل سيرش…
عشان تبحث في Appstore استخدم https://fnd.io
عشان تبحث في Play store استخدم https://play.google.com/store
وما تنساش تبحث كمان في انستجرام إلخ إلخ..

بعد استكشاف القنوات الرئيسية, هتبدأ في تناولهم قناه ورا التانية لدراسة البيانات الكمية والنوعية للتحركات داخل عالم الإنترنت من خلالهم..

أولاً دراسة وتحليل مواقع المنافسين بصورة أولية:

في البداية هتكون محتاج تعرف الموقع ده ” الدومين ” تبع مين بالظبط, وياترى هوا شركة ولا فرد؟
بإستخدام خدمة Whois من شركة Godaddy هتقدر تعرف بيانات كتير جداً عن الدومين نفسه: https://who.godaddy.com

نتيجة تطبيق ده على مثال seos7.com ودانا للنتايج التالية:
الموقع بدأ في 12 أغسطس 2013, صاحبه إسمه أحمد عزت, وطلعلنا بيانات الاتصال بيه وايميله

لمحة جانبية: إنتا ممكن تستخدم البيانات دي كمفردات بحث عن التحركات أونلاين للشخص نفسه أو المؤسسة صاحبة الموقع, وده هيوصلك لنتايج برضه ممكن تكون مهمة وإنتا في مرحلة جمع المعلومات والدراسة, زي في مثالنا الحالي إنك تعرف مين أحمد عزت بالتفصيل, خبرته ومعلوماته ودراسته وسنه وعلاقاته وايه الخطوات اللي بيعملها أونلاين اللي بتخدم على البراند بتاعه…
على جانب آخر, في سنة 2015 أصبح للأشخاص قوة أكبر أحياناً من قوة البراند اللي بيشتغلوا فيه أو حتى أصحابه, على سبيل المثال ستيف جوبز وآبل, أو مارك زوكربرج وفيسبوك… متابعة وتحليل تحركات مارك زوكربرج نفسها تعتبر من الجوانب المهمة في دراسة تحركات فيسبوك…

الخطوة التانية, هي تحليل الموقع نفسه وتفصيصه, على سبيل المثال من ناحية التكنولوجي المستخدمة فيه, ونظام إدارة المحتوى فيه, السيرفر, وملاحظات أكواد العلانات او المراقبة والتحليل اللي بيستخدمها المنافس.
وهنا هنستخدم في البداية أداة https://builtwith.com اللي هتعرفنا التفاصيل التقنية للموقع بسلاسة.

نتيجة تطبيق ده على مثال seos7.com ودانا للنتايج التالية:
نظام إدارة المحتوى ” بلوجر Blogger ” , بيستخدم cloudflare , بيتابع الزوار من خلال فيسبوك Custom Audience , بيراقب تحركات الزوار من خلال Crazyegg , بيتابع الاحصائيات من خلال Google Analytics , الموقع مفعل من Alexa وبيستخدم أدوات أكتر للقياس والمراقبة زي تويتر اناليتكس… وأدوات تانية لعمل الريتارجيتنج والريماركيتنج زي Perfect Audience وأدوات إختبار سلوك المستخدمين وإجراء التعديلات السريعة زي Optimizely

لمحة جانبية: معرفة التكنولوجي والأدوات اللي بيستخدمها المنافس في الموقع بتاعه ممكن تساعدك كتير على جانبين مهمين, الجانب الأولاني إنك تشوف إيه ناقصك من الأدوات دي وتبدأ تستخدمه, والجانب التاني إنك تقدر تعرف إمكانياته واصلة لحد فين وحدوده إيه وإزاي تقدر تتفوق عليه تكنولوجياً.
على سبيل المثال في موقع seos7.com الموقع معتمد على إدارة المحتوى من خلال blogger وده معناه إن حدود إمكانياته في تقديم موقع متقدم أو خواص إضافية للمستخدمين, او توفير طريقة تصفح أفضل من دي للمستخدمين هيكون شيء صعب جداً عليه, بالتالي لو إنتا موقع منافس وقررت تعمل نفس الفكرة بإستخدام تقنية إدارة محتوى أفضل زي wordpress فأنتا هتتفوق عليه في النقطة دي.
مثال تاني, لو إنتا منافس لازم تستخدم كلاود فليير لو ما كنتش لسه بتستخدمه, ولازم تفكر في إستخدام Crazyegg وتفعل Alexa وتستخدم ادوات Optimizely لإختبار سلوك المستخدمين…

الخطوة التالتة, هناخد نظرة سريعة في تحليل الموقع كمستخدمين وسرعة الموقع ونسخة الموبايل, نوع المحتوى وكميته.

الموقع مجاني, مش محتاج إشتراك لدخوله, مافيهوش أقسام خاصة بالمشتركين.
الألوان الرئيسية أبيض مع أزرق ورمادي.
تصميم الموقع بسيط جداً, فيه قائمة رئيسية في الهيدر فيها 4 زراير تنقل سريع فقط واللوجو والسيرش.
وفيه قائمة جانبية أو منطقة سايد بار للودجات, فيها مجموعة من الإعلانات الداخلية, وأساليب للتواصل ولرفع معدلات التفاعل داخل الموقع.

لقياس سرعة الموقع هنستخدم: http://tools.pingdom.com أو https://developers.google.com/speed/pagespeed/insights
ومن هنا هنعمل تست لنسخة الموبايل: https://www.google.com/webmasters/tools/mobile-friendly

أما من حيث المحتوى, الموقع بيتضمن 9 أقسام, منهم 4 موجودين في القائمة الرئيسية في الهيدر, وخمس تقسيمات غير ظاهرين في الهيدر.
بخصوص نوع المحتوى, فمن خلال نظرة في الموقع ومعرفتنا بنظام إدارة المحتوى, فالموقع عبارة عن تدوينات أو مقالات, وأوقات بيقدمها في شكل فيديو, بالإضافة إلى مجموعة من الكورسات والادوات اللي بيتطلب تحميلها على جهازك لتشغيلها.
كمية المحتوى, نقدر نعرفها من خلال الويدجت الموجودة في الجانب الأيمن من الموقع ” الأرشيف ” واللي منها هنقدر نعرف إن الموقع ده إتنشر فيه 85 مقال أو تدوينة, بمعدل 3 مقالات شهرياً بيمثل 2.5% من إجمالي المحتوى المنشور… وكانت أنشط الشهور هي بداية الموقع ” أغسطس – سبتمبر 2013 ”
معدل كتابة المقالات في موقع سيو صح

أكتر الموضوعات زيارة هي:
ربح المال من الانترنت – كيف تربح أكثر من 700 دولار شهرياً
الربح من الانترنت 3 طرق لربح 5000 دولار شهرياً
أفضل 10 مواقع للحصول على باك لينك
الدليل الكامل لـ SEO المواقع الإخبارية
اليوم الأول من كورس SEO 3.0 – تسويق المحتوى
خطوة بخطوة – إصعد بأى موقع للصفحة الأولى خلال 30 يوم
العمل من المنزل فى ثلاث خطوات
5 طرق لجلب زوار بدون سيو
كيف تكتب موضوع يصعد للصفحة الأولى فى 5 خطوات
كيف تحسن من شكل نتائجك فى محركات البحث Schema Markup

الخطوة الرابعة, ودي هناخد فيها نظرة أعمق في تحليل الموقع من حيث الزيارات المتوقعة وتعامل الزوار معاه, ومحاولة إستكشاف سلوك المستخدمين للموقع وطبيعتهم:

في الخطوة دي هنستخدم مجموعة من الأدوات, زي ( Alexa – Similarweb – Statscrop ) وأنصحك إنك تحاول تجربهم كلهم وتختار منهم أكتر الأدوات راحة بالنسبة لكن وتحاول تحصل على إشتراك مدفوع ليها عشان تديك بيانات أكتر بكتير من المتاحة مجاناً…

في البداية هنستخدم Alexa – هكذا وجدنا اباءنا يستخدمون أليكسا – لكن الميزة هنا إن الموقع ده مفعل من قبل أليكسا, زي ما احنا اكتشفنا خلال التحليل التقني للموقع في البداية, فده معناه إننا هناخد من أليكسا أرقام تعتبر موثوقة إلى حد ما…

من أليكسا بتقدر تعرف الترتيب العالمي والمحلي للموقع وسط باقي المواقع العالمية ومعدل تقدم الموقع, توقعات للدول اللي جاية منها الزيارات, وعدد الصفحات اللى بيزورها المستخدم في السايت, والوقت اللي بيقضيه فيه, أهم الكلمات المفتاحية اللي المستخدمين بيبحثوا بيها عشان يوصلوا للموقع, نسبة السيرش من إجمالي زيارات الموقع…

بتطبيق إستخدام أليكسا على موقع سيو صح http://www.alexa.com/siteinfo/seos7.com

كانت النتيجة إن الموقع ترتيبه العالمي 35,151 وترتيبه على مصر 537, معظم زواره من مصر بنسبة 48% ثم السعودية 17% والمغرب 15% واليمن 4% والجزائر 3% ثم الأردن 2% *أرقام تقريبية وقريبة من النتائج المقارنة بإستخدام similarweb

الزيارات من الدول لموقع سيو صح

الزائر بيقضي حوالي 3 دقايق ونص داخل موقع سيو صح, وبيقلب حوالي صفحتين إلى 3 صفحات. *أرقام تقريبية وقريبة من النتائج المقارنة بإستخدام similarweb

seos7-engagement
ومن أهم النقط اللي ممكن تاخد عنها توقعات من خلال أليكسا, وخاصة لو كان الموقع مفعل من أليكسا ” زي ما إحنا اكتشفنا في حالة سيو صح في الخطوة الأولى ” هي النقطة الخاصة بطبيعة المستخدمين اللي بيزوروا الموقع, شوف الصورة:
seo-s7-Audience Demographics

نقطة كمان مهمة, هي الكلمات المفتاحية اللي الناس بتستخدمها في السيرش ثم تدخل على موقع سيو صح, ودي من أهم المميزات في موقع أليكسا…
في عند سيو صح حوالي 5,254 كلمة بحث الناس بتستخدمها وبينجح موقع سيو صح في الحصول على ترافيك منها, أهمهم:

الكلمات المفتاحية لموقع سيو صح

لو عاوز تحمل الملف الكامل بكل الكلمات المفتاحية لموقع سيو صح ونسبتها في الترافيك اللي بيحققوا, تقدر تعمل ده كمان من خلال أليكسا, ودي من أفضل المميزات الموجودة في أليكسا…
في موقع سيو صح, ممكن تحمل الملف من هنا: تحليل الكلمات المفتاحية لموقع سيو صح

ميزة كمان في تحليلات أليكسا, إنها بتطلعلك كمان المنافسين للموقع ده بيستهدفوا كلمات إيه, ومنها تقدر تطلع إنتا كمان أفكار من الموقع اللي بتحلله + المنافسين بتوعه 😉

من خلال أليكسا كمان تقدر تعرف مصادر زيارات الموقع, وأهم القنوات اللي منها بيجي زوار الموقع, في حالة سيو صح, حوالي 40% من الزوار من السيرش, و 20% من الزوار من السوشيال, و 40% بين زوار مباشرين أو قادمون من مواقع أخرى…
مصادر زيارات سيو صح

من المعلومات المهمة بالنسبة لك, إنك تشوف معدل تقدم الموقع, هل هوا في الطالع ولا في النازل ولا اموره مستقرة؟ وده تقدر تعرفه من خلال الرسم البياني اللي بيوضح ترتيب الموقع خلال فترة زمنية معينة مداها 3 سنين بحد أقصى..

سيو صح - ترتيب أليكسا

في معلومات كتير تقدر تعرفها من خلال تحليل الموقع بإستخدام أليكسا, منها توقع لعدد الزوار شهرياً لو الموقع اللي بتشتغل عليه في أمريكا, كندا, انجلترا, ألمانيا فرنسا, أسبانيا ” للأسف غير متاحة للدول العربية ”
ولكن في أدوات كتير لتحليل المواقع, ممكن تعتمد عليها برضه للحصول على أرقام تقريبية, ولكن يفضل أنك تستخدم النسخة المدفوعة منها وليس المجانية لمزيد من الدقة في الارقام التقريبية, زي:
similarweb.com واللي منه ممكن نشوف إن الأرقام الإفتراضية للزيارات الشهرية لموقع سيو صح حوالي 40 ألف زائر شهرياً. مع الأخذ في الإعتبار إن الأداة دي في نسختها الحالية عندها مشكلة مع حساب الزيارات القادمة من الموبايل ولا تحتسبها إلا في النسخة المدفوعة…

seo-s7-visits

ومن مواقع الإحصائيات الشهيرة أيضاً statscrop.com و compete.com واللي منهم ممكن تعرف مجموعة من المعلومات اللي يمكن تهمك, زي الألوان الغالبة في الموقع:

ألوان موقع سيو صح

 

وبكدة نبقى وصلنا لنهاية الجزء الأول من تحليل تحركات ” سيو صح ” من خلال الإنترنت… نلتقي بعد قليل إن شاء الله مع الجزء التاني ونكمل تحليل نشاطات سيو صح من خلال الديجتال ودراسة إحصائياتها بمناسبة مرور سنتين على إنطلاق الفكرة 😉

الخلاصة, وقائمة الأدوات اللي جبنا سيرتها هنا:

البحث في متجر تطبيقات آبل آيفون: https://fnd.io
البحث في متجر تطبيقات جوجل بلاي: https://play.google.com/store
معرفة معلومات عن صاحب إسم النطاق ” الدومين ” : https://who.godaddy.com
تحليل طريقة بناء الموقع والتقنيات المستخدمة فيه: https://builtwith.com
قياس سرعة تحميل الموقع: http://tools.pingdom.com
قياس سرعة الموقع: https://developers.google.com/speed/pagespeed/insights
قياس سرعة الموقع: https://www.google.com/webmasters/tools/mobile-friendly
أدوات توقع إحصائيات المواقع: http://www.alexa.com
http://www.similarweb.com
http://www.statscrop.com
http:///www.compete.com

 

شكراً لوقتك, زرار شيير موجود تحت شوية لو حبيت تستخدمه هيكون شيء يشجعني جداً إني أخلص الجزء التاني 🙂

 

Facebooktwittergoogle_plusredditpinterestlinkedinmail